To nakai fakaata e Iehova e tau tagata kelea ke moumou e Parataiso. Ko e tau kapitiga ni hana ka nonofo i ai. Ko e heigoa e mena ka tupu ke he tau tagata kelea? Ke moua e tali, manamanatu ke he tala moli ki a Noa. Kua totou afe e tau tau ne moui ai a Noa i tuai. Ko e tagata mitaki a ia ne lali fakalahi tumau ke taute e finagalo a Iehova. Ka ko e falu tagata he lalolagi ne taute e tau mena kelea. Ti tala age a Iehova ki a Noa kua amanaki a ia ke fakahoko e fakapukeaga ke moumou aki e tau tagata mahani kelea oti ia. Ne tala age a ia ki a Noa ke ta e vaka ke maeke ia ia mo e magafaoa hana ke hao ka hoko mai e Fakapukeaga.—Kenese 6:9-18.

Ne ta e Noa mo e magafaoa hana e vaka. Ne hataki e Noa e tau tagata ko e hoko fai e Fakapukeaga, ka e nakai fanogonogo a lautolu ki a ia. Ne matutaki a lautolu ke taute e tau mena kelea. He mau e vaka he ta, ne uta e Noa e tau manu ke he vaka, ti o a ia mo e magafaoa hana foki ki loto. Ti fakahoko e Iehova e afa lahi. To ai e uha ke 40 e aho ti 40 e po. Ne hufia e lalolagi oti ke he vai.—Kenese 7:7-12.

 Ne mamate oti e tau tagata mahani kelea, ka ko Noa ni mo e magafaoa hana ne hao. Ne fakahao mai e Iehova a lautolu he Fakapukeaga ke he lalolagi mea he mahani kelea. (Kenese 7:22, 23) Kua talahau mai he Tohi Tapu to hoko mai foki taha magaaho ka liu foki a Iehova ke moumou a lautolu kua fakaheu ke taute e mena kua hako. To nakai fakamahakava e tau tagata mitaki. To nonofo tukulagi a lautolu ke he lalolagi Parataiso.—2 Peteru 2:5, 6, 9.

Tokologa e tau tagata he vaha nei ne taute e tau mena kelea. Kua puke e lalolagi he kelea. Ne fekau tumau e Iehova hana Tau Fakamoli ke hataki e tau tagata, ka e tokologa kua nakai fanogonogo ke he tau kupu a Iehova. Nakai manako a lautolu ke hiki ha lautolu a tau puhala. Nakai manako a lautolu ke talia e mena ne talahau he Atua hagaao ke he hako mo e hepe. Ko e heigoa ka tupu ke he tau tagata nei? To hiki nakai a lautolu a taha aho? To tokologa ka nakai hiki. Hane hoko mai e magaaho ka fakamahakava e tau tagata mahani kelea mo e to nakai liu momoui foki.—Salamo 92:7.

To nakai moumou e lalolagi; to taute ai ke parataiso. Ko lautolu kua eke mo tau kapitiga he Atua to momoui tukulagi ke he Parataiso he lalolagi.—Salamo 37:29.