Ka ha ha ia koe e kapitiga kua nava mo e fakalilifu e koe, lali a koe ke tuga a ia. “Kua mahani mitaki, mo e tututonu a Iehova,” he talahau he Tohi Tapu. (Salamo 25:8) Ke eke mo kapitiga he Atua, kua lata ia tautolu ke mitaki mo e tututonu. Pehe e Tohi Tapu: “Kia fifitaki a mutolu ke he Atua tuga e tau fanau fakahelehele. Kia mahani a mutolu mo e fakaalofa.” (Efeso 5:1, 2) Ko e falu puhala anei ke taute e mena ia:

Kia lagomatai ke he falu. ‘Kia mahani mitaki a tautolu ke he tau tagata oti kana.’—Kalatia 6:10.

Gahua fakamalolo. “Ko e tagata kaiha aua neke liu kaiha foki, ka e mitaki ke fakamalolo a ia ke gahua ke he tau lima hana ke he mena mitaki.”—Efeso 4:28.

Fakatumau ke mea fakatino mo e mahani. “Kia fakamea e tautolu a tautolu ke he tau mena oti ke kelea ai e tino katoa mo e agaga, kia fakakatoatoa ai e tau mahani mitaki mo e matakutaku ke he Atua.”—2 Korinito 7:1.

 Fakakite e fakaalofa mo e fakalilifu ke he tau tagata takitaha he magafaoa hau. “Kia takitokotaha a mutolu gotoa mo e fakaalofa atu ke he hana hoana, tuga e fakaalofa a ia kia ia ni; ka ko e fifine kia fakalilifu a ia ke he hana tane. Ko mutolu na, ko e tau fanau, kia omaoma ke he tau matua ha mutolu.”—Efeso 5:33–6:1.

Fakakite e fakaalofa ke he falu. “Kia feofanaki a tautolu, ha ko e mena mai he Atua e fakaalofa.”—1 Ioane 4:7.

Omaoma ke he tau fakatufono he motu. “Kia omaoma e tau tagata oti kana ke he tau [fakatufono] . . . kia ta atu ke he tau tagata oti kana ha lautolu a tau mena; ko e poa kia lautolu kua lata ki ai e poa.”—Roma 13:1, 7.