KUA lauia e tau tagata oti he fakaatukehe​—pihia foki mo e tau tagata he Atua. “Ko e tau manamanatu loga [fakaatukehe] he haku a loto” kua pehia lahi au, he tohi he taha tagata ne tohia e salamo. (Salamo 94:19) Pehē a Iesu ke he magahala he tau aho fakamui, ko e “fakaatukehe he tau mena he mouiaga nai” ka paleko lahi ai ke fekafekau ki a Iehova. (Luka 21:34) Ka e kua a koe? Kua fakaatukehe nakai a koe ha ko e tau lekua ke moua e tupe, matematekelea he magafaoa, po ke tupetupe ke he malolō tino? Lagomatai fēfē e Iehova a koe ke fahia ki ai?

Nakai maeke a tautolu hokoia ni ke fehagai mo e fakaatukehe. “Kua matematekelea a mautolu ke he tau mena oti,” ne tohi he aposetolo ko Paulo. “Kua fakahakuhaku a mautolu . . . kua palu hifo a mautolu.” Ka e pehē foki a ia hagaao ki a tautolu, to “nakai fakaatukehe,” “nakai mahalohalo noa” mo e “nakai mahaikava.” Ko e heigoa ne lagomatai a tautolu ke fakauka? Ko e ‘malolo lahi ue atu’​—ko e malolō mai he Atua mua ue atu, ko Iehova.​—2 Korinito 4:7-9.

Liu manatu ke he puhala ne moua e koe e ‘malolo lahi ue atu’ he vahā fakamua. Manatu nakai e koe e lauga atihake ne fakamalolō e haau a loto fakaaue ma e fakaalofa fakamooli ha Iehova? Malolō nakai e tua haau ke he tau maveheaga ha Iehova he magaaho ne fakaako e koe e falu tagata hagaao ke he amaamanakiaga he Parataiso? He magaaho ne ō atu a tautolu ke he tau feleveiaaga Kerisiano mo e atihake e tua he taha mo e taha, ne moua e tautolu e malolō ke fakauka ke he tau fakaatukehe he moui mo e moua e mafola he loto ke maeke ia tautolu ke fekafekau ki a Iehova mo e fiafia.

Mooli ai, liga fehagai a koe mo e loga e tau peehiaga kehekehe. Ma e fakatai, ole mai a Iehova ki a tautolu ke kumikumi fakamua e Kautu mo e fakatumau e puhala moui fakaagaaga. (Mataio 6:33; Luka 13:24) Ka e kua ka mategūgū a koe ha ko e totoko mai he taha mena, nakai malolō e tino, po ke tau matematekelea he magafaoa? Kua lahi kia e magaaho mo e malolō haau ke gahua tupe ti nakai fahia ke fakalataha mo e fakapotopotoaga? Fehagai mo e loga e tau mena kua lata he moui​—ti tote e magaaho mo e malolō ke leveki aki​—liga holo ki mua e fakahakuhaku haau. Liga manamanatu foki a koe kua lahi mahaki e manako ha Iehova mai ia koe.

Maama e Iehova. Nakai amanaki mai a Iehova ki a tautolu ha mena kua nakai maeke ia tautolu ke taute. Mailoga foki e ia kua lata ia tautolu ke fai magaaho ke liu malolō e tino mo e manamanatuaga mai he tupetupe.​—Salamo 103:13, 14.

Ma e fakatai, manamanatu ke he puhala ne leveki e Iehova e perofeta ko Elia. He magaaho ne hola a Elia ke he tutakale ha ko e fakaagitau mo e matakutaku, akonaki nakai e Iehova e perofeta ia mo e fekau ke liu ke he haana a kotofaaga? Nakai. Lagaua  e fakafano atu e Iehova e agelu ke fafagu fakaeneene a Elia mo e age e mena kai ke kai a ia. Pete ia, he 40 e aho he mole, ne fakaatukehe mo e matakutaku agaia a Elia. Ko e heigoa foki ha Iehova ne taute ke lagomatai aki a ia? Fakamua, ne fakakite e Iehova na maeke a ia ke puipui a Elia. Uaaki, ne fakamafana e Iehova a Elia mo e “leo tote ne vagahau mai fakatekiteki.” Fakahiku ai, ne fakakite age e Iehova na toko afe mo e afe foki a lautolu ne tapuaki fakamooli ke he Atua. Nakai leva, ne liu a Elia eke mo perofeta malolō mo e fakamakutu. (1 Tau Patuiki 19:1-19) Ko e fakaakoaga? He magaaho ne tupetupe lahi a Elia, ne fakakite e Iehova e fakauka mo e fakaalofa hofihofi ki a ia. Nakai la hiki ia a Iehova. Ti leveki pihia foki e ia a tautolu.

Manamanatu fakamitaki ke he mena haau ka foaki age ki a Iehova. Ua fakatatai e tau gahua haau kua maeke ke taute mogonei mo e tau gahua haau ne fa taute fakamua. Ke fakatai: Ko e tagata poitufi ne fakamaoki e haana poi ke he loga e mahina po ke tau tau, kua nakai maeke ke liu mai ti matutaki ke he puhala fakamua haana. Ka kua kamata a ia ke fakatoka fakahaga e tau foliaga ikiiki ke liu moua e malolō mo e fakamanava loa. Ko e tau Kerisiano kua tuga e tau tagata tafepoi. Ne taute pihia e lautolu mo e tokaloto e foliaga. (1 Korinito 9:24-27) Ka e kua he tutuli ke taha e foliaga fakaagaaga kua maeke ia koe ke moua mogonei? Ma e fakatai, liga fakatoka e koe e foliaga ke finatu ke he feleveiaaga he fakapotopotoaga. Ole ki a Iehova ke lagomatai a koe ke hokotia ke he haau a foliaga. He liu a koe ke malolō fakaagaaga, to “kamata e mutolu mo e kitekite, kua mitaki a Iehova.” (Salamo 34:8) Manatu ko e ha mena ni haau ka taute ke fakakite e fakaalofa haau ma Iehova​—pete he tote​—kua uho ki a ia.​—Luka 21:1-4.

Fakamalolō fēfē e Iehova a June ke liu mai ki a ia? Pehē a ia: “Liogi tumau au ki a Iehova, he ole ki a ia ke lagomatai au. Ti tala mai he figona haaku hagaao ke he toloaga he taone ne nofo ai au. Ne fifili au ke finatu ke he taha e aho he toloaga ia. Ko e fiafia ha ia he liu ke fakalataha mo e tau tagata ha Iehova! Ko e toloaga ia ne moua e au e atihakeaga ne fakatali au ki ai. Mogonei kua fiafia lahi au ke liu fekafekau ki a Iehova. Fai kakano lahi e moui ki a au. Mua atu, he iloa e au kua nakai lata au ke vevehe kehe po ke taute mena tokotaha. Fakaaue ai ha kua fai magaaho agaia ke liu mai au.”