MAEKE e agahala ke eke mo kavega mamafa lahi. “Ha kua hoko ni haku a tau hala ki luga hoku ulu,” he tohia he Patuiki ko Tavita. “Tuga e kavega mamafa, kua pehia ai au.” (Salamo 38:4) Falu Kerisiano ne pehia he momoko lahi ue atu, ti manamanatu to nakai fakamagalo e Iehova a lautolu. (2 Korinito 2:7) Hako nakai e manatu ia? Pete ni he taute e tau agahala kelea lahi, kua kakano kia to nakai fakamagalo e Iehova a koe? Nakai pihia!

Nakai tiaki e Iehova e tau tagata agahala ne tokihala. Ka e lagomatai e ia a lautolu! He tala fakatai hagaao ke he tama taane ne galo, ne fakatatai e Iesu a Iehova ke he matua taane loto fakaalofa ka ko e tama taane haana ne toka e magafaoa mo e tutuli e puhala moui matahavala. He fai magaaho, ne fifili e tama taane ke liu ki kaina. “Kua kitia a ia [tama taane] he hana matua tane, ka kua mamao a ia, ati hofihofi ai hana fakaalofa, kua poi atu a ia mo e peka ke he hana ua, kua figita kia ia.” (Luka 15:11-20) Manako nakai a koe ke fakatata atu ki a Iehova ka e logona hifo “kua mamao” mai ia ia? Tuga e matua taane he fakataiaga ha Iesu, kua fakaalofa hofihofi foki a Iehova ki a koe. Kua makai a ia ke liu fakafeleveia atu ki a koe.

Ka e kua ka manatu e koe, kua mua e kelea he tau agahala haau po ke loga lahi ke fakamagalo e Iehova? Fakamolemole manamanatu ke he uiina ha Iehova ne fakamau he Isaia 1:18: “Kia o mai a a mutolu, ke pulega [ke fakahako] a tautolu,” he talahau e Iehova. “Pete he tuga e ie kula ha mutolu a tau hala, to hina ia po ke kiona.” E, ko e tau agahala foki ne tuga e fakahū kula ke he ie tea kua maeke a Iehova ke fakamagalo.

Nakai manako a Iehova ke matematekelea tumau a koe he kelea e loto manamanatu ha ko e agahala. Ti maeke fēfē a koe ke moua e mafola mai he fakamagaloaga he Atua mo e loto manamanatu meā? Manamanatu ke he ua e lakaaga ne taute he Patuiki ko Tavita. Fakamua, ne pehē a ia: “To fakakite e au haku a holifono kia Iehova.” (Salamo 32:5) Manatu, ko Iehova kua fitā e uiina a koe ke liogi ki a ia mo e “pulega [ke fakahako]” e tuaga mo ia. Talia e uiina ia. Talahau e tau agahala haau ki a Iehova, mo e fakakite e tau logonaaga haau ki a ia. Ha ko e tau mena ne tutupu ki a Tavita, ne mauokafua a ia ke liogi: “Fakamea e koe au he haku a tau hala. . . . ko e Atua na e, nakai vihiatia e koe e loto malipilipi mo e pehia.”​—Salamo 51:2, 17.

Ke uaaki, moua e Tavita e lagomatai mai he hukui ne kotofa he Atua, ko e perofeta ko Natano. (2 Samuela 12:13) He vahā nei, foaki mai e Iehova e tau motua he fakapotopotoaga ne kua fakaako ke lagomatai a lautolu ne tokihala ke liuaki mai e tuaga kapitiga ha lautolu mo Iehova. Ka fano a  koe ke he tau motua, to fakaaoga e lautolu e tau kupu Tohi Tapu mo e tau liogi mafanatia ke fakatotoka e loto haau, fakatote hifo po ke utakehe e tau logonaaga lolelole, mo e lagomatai a koe ke malolō fakaagaaga.​—Iakopo 5:14-16.

Mooli ai, liga logona hifo e koe ko e talahau atu he tau agahala haau ki a Iehova ko e Atua mo e tutala ke he tau motua ko e mena kua uka lahi mahaki ke taute e koe. Pihia foki e tau logonaaga ha Tavita. Fai magaaho a ia ne “fakamate” hagaao ke he tau agahala haana. (Salamo 32:3) Ka e he magaaho fakamui, ne loto fakaaue a ia ke he aoga he talahau atu e tau agahala haana mo e fakahako e puhala moui haana.

Ko e mena ne aoga lahi ki a Tavita, ne liu a ia fiafia. Ne tohi e ia: “Uhoaki e tagata kua fakamagalo hana tau holifono, kua tanumia hana tau hala.” (Salamo 32:1) Liogi foki a ia: “Ko e Iki [Iehova] na e, kia vevete mai e koe haku tau laugutu; ti tokutoku atu haku gutu hāu a fakahekeaga.” (Salamo 51:15) He fakatokanoa mai a ia he haana agahala mo e loto fakaaue ke he fakamagaloaga he Atua, ne omoomoi a Tavita ke tutala age ke he falu hagaao ki a Iehova.

Manako a Iehova ke iloa e koe e fiafia mai he loto manamanatu meā. Ti manako foki a ia ke tutala a koe ke he falu hagaao ki a ia mo e haana tau finagalo, mai he loto fiafia mo e fakamooli ka e nakai fakatauhele he tau logonaaga agahala. (Salamo 65:1-4) Manatu e uiina haana ke “holoholo kehe ai ha mutolu a tau hala, kia hoko mai ai foki e tau tau ke okioki ai mai mua he Iki [Iehova].”​—Gahua 3:19.

Ko e mena pihia ne tupu ki a Martha. Talahau e ia: “Fakatumau e tama taane haaku ke fakafano mai ki a au e tau mekasini Watchtower mo e Awake! Ne liu fakahaga au ke kapitiga mo Iehova. Ko e vala ne mua atu he uka he liu mai ko e ole ma e fakamagaloaga ke he tau agahala oti haaku ne taute. Ka e fakahiku ai, ne liogi au ke he Atua mo e ole atu ki a ia ke fakamagalo mai au. Kua uka ke talia ko e 40 e tau he mole to liu mai au ki a Iehova. Ko e moui haaku ko e fakamooliaga pete he loga e tau tau ne mole, kua maeke e taha ke liu mai ke fekafekau ke he Atua mo e moua haana fakaalofa.”