Ne kamata e kelea muitui he lalolagi he talahau e Satani e pikopiko fakamua. Ko Satani ko e agelu mitaki katoatoa he kamataaga, ka e “nakai tumau ni a ia ke he mena moli.” (Ioane 8:44) Ne ha ha ia ia e manako ma e tapuakiaga ne tonuhia ni ke he Atua. Ne pikopiko a Satani ke he fifine fakamua ko Eva ti fakaohooho ki ai ke omaoma ki a ia ka e nakai ke he Atua. Ne fakalataha a Atamu mo Eva he liuliu ke he Atua. Ko e fifiliaga ha Atamu ne takitaki ke he matematekelea mo e mate.​—Totou Kenese 3:1-6, 19.

He tala age a Satani ke liuliu a Eva ke he Atua, ne kamata a ia ke totoko ke he pule, po ke tuaga he Atua ko e Tokoluga Ue Atu. Ko e laulahi he tau tagata ne fakalataha mo Satani he tiaki e Atua ko e Pule ha lautolu. Ti eke a Satani mo “iki he lalolagi nei.”​—Totou Ioane 14:30; 1 Ioane 5:19.

Ko e tau gahua oti he Atua kua mitaki katoatoa. Ko e tau tagata mo e tau agelu ne tufuga he Atua ne maeke ke omaoma katoatoa ke he Atua. (Teutaronome 32:4, 5) Ne tufuga he Atua a tautolu mo e tokanoaaga ke fifili he taute e mena mitaki mo e taute e mena kelea muitui. Ko e tokanoaaga ia kua foaki ki a tautolu e puhala ke fakakite e fakaalofa ma e Atua.​—Totou Iakopo 1:13-15; 1 Ioane 5:3.

He fakakaupā e magaaho, ne fakaatā e Iehova e totokoaga ke he pule katoatoa haana. Ko e ha? Ke fakakite e nakai fai laliaga ke pule tokotaha kua aoga ke he tau tagata. (Fakamatalaaga 7:29; 8:9) He mole e 6,000 e tau he fakamauaga tala he tagata, kua maaliali e fakamooliaga. Ko e tau pule he tagata ne kaumahala  ke utakehe e felakutaki, kolokolovao, nakai fakafili tonu, po ke gagao.​—Totou Ieremia 10:23; Roma 9:17.

He fakatatai mo e pule he tagata, kua aoga e pule he Atua ki a lautolu kua talia ai. (Isaia 48:17, 18) Nakai leva, to tamai e Iehova e fakaotiaga ke he tau fakatufono oti he tagata. Ko e tau tagata ni ne manako ke he pule he Atua ka nonofo he lalolagi.​—Isaia 11:9.​—Totou Tanielu 2:44.

Ne totoku e Satani kua nakai fai tagata ke fekafekau ki a Iehova mai he fakaalofa nakai lotokai. To manako nakai a koe ke totoko e pikopiko ia? Maeke a koe! Kua fakaatā he fakauka he Atua a tautolu oti ke fakakite kua fiafia a tautolu ke he pule he Atua po ke pule he tagata. Kua fakakite e tautolu e fifiliaga ha tautolu he puhala kua momoui a tautolu.​—Totou Iopu 1:8-12; Tau Fakatai 27:11.

Maeke ia tautolu ke fifili e Atua mo Pule ha tautolu he kumi mo e fakagahua e tapuakiaga mooli ne fakavē ke he Kupu he Atua ko e Tohi Tapu. (Ioane 4:23) Maeke a tautolu ke tiaki a Satani ko e pule ha tautolu he fakamamao mai he tau mena politika mo e felakutaki, tuga ne taute e Iesu.​—Totou Ioane 17:14.

Fakaaoga e Satani e malolō haana ke fakatupu aki e tau mahani feuaki ne hagahaga kelea. Ka tiaki e tautolu e tau mahani pihia, liga vaiga po ke totoko he falu kapitiga mo e tau magafaoa a tautolu. (1 Peteru 4:3, 4) Ti ha ha ia tautolu e fifiliaga. To feoaki nakai a tautolu mo e tau tagata kua ofania e Atua? To omaoma nakai e tautolu haana tau matafakatufono pulotu mo e fakaalofa? Ka taute e tautolu, kua fakamooli e tautolu kua pikopiko a Satani he pehē a ia, i lalo he peehiaga to nakai fai ka taute e mena ne talahau he Atua.​—Totou 1 Korinito 6:9, 10; 15:33.

Ko e fakaalofa he Atua ma e tau tagata kua fakamooli to fakaotioti e kelea muitui mo e matematekelea. Ko lautolu kua fakakite na talia e lautolu e mena nei to fiafia tukulagi e moui ke he lalolagi.​—Totou Ioane 3:16.