“Ne tupu hake au he maaga tote he faahi tokelau,” talahau e Dauda mai i Siera Leone. “Ko e vahā ne tote agaia ai au ko e tama taane, ne taufetoko ai e magafaoa haaku mo e taha magafaoa ha ko e vala kelekele. Ne lali a laua tokoua ke moua e vala kelekele nei. Ke fakatonu e matakupu, kua hea atu ai ke hau e tagata taane taute vailakau. Ne age e ia e fakaata ke he taha tagata taane, ti uufi aki e ie tea a ia. Nakai leva ti kamata agataha e tagata taane i loto he ie ke vivivivi mo e kavakava. Hane onoono a ia ke he fakaata, ne ofo a ia mo e vagahau: ‘Kua kitia e au e tagata taane fuakau hane hau! Ne tui a ia he taute tea. Loa a ia mo e fuakau, hina e ulu, mo e fano a ia fakakokukoku.”

“Ko e fakamaama a ia he Matua taane tupuna! Ko e magaaho ia ni ti heketia ai a ia, mo e hea fakatūtū: ‘Ka nakai talitonu a mutolu ke he tau mena ne talahau e au, ati o mai la ke onoono ni e mutolu!’ Mooli, kua nakai fai tagata ia mautolu ne malolō ke taute e mena ia! Kua fakamilino hifo he tagata taane taute vailakau a ia ha kua ganagana takai aki e vailakau fakataulatua ne hui aki e tau laukou mo e vala vai ti tuku he tuivai.”

“Ne pehē e ‘Matua taane tupuna’ he vagahau mai i loto he fakaata, ko e vala kelekele he magafaoa ha mautolu a nei. Kua tala age a ia ke he matua fifine tupuna haaku ke gahua ni a ia he vala kelekele mo e nakai tupetupe. Kua talia he magafaoa he taha faahi e fakafiliaga nei. Kua fakatonu tuai e matakupu.”

 Ko e tau tauteaga mena pihia kua aga mau he motu ko Aferika Lalo. Ko e matakavi nei, ne tuga ni e falu a vala he lalolagi, nakai maeke ke totou e tau miliona tagata ne talitonu ko e tau tagata mamate kua taatu a lautolu ke he lalolagi agaaga, ke maeke ia lautolu ke kitekite mo e pule mai ke he tau momoui he tau tagata he lalolagi. Mooli nakai e taliaaga tonu nei? Momoui mooli nakai e tau tagata mamate? Ka nakai mooli, ti ko hai a lautolu ia ne talahau ko e tau agaaga he tau tagata mamate? Kua aoga lahi ni ke iloa e tautolu e tau tali hako ke he tau hūhū nei. Ha ko e matakupu ke he moui mo e mate.