Na gahuahua e tau agaaga! Ha ha i ai he kautu agaaga nakai kitia, e tau agaaga mitaki mo e kelea. Ko lautolu kia ko e tau peresona ne nonofo mo e mamate he lalolagi?

Nakai, nakai ko lautolu. Kaeke ke mate e tagata, ko ia e taane po ke fifine kua nakai taatu ke he lalolagi agaaga, tuga he manatu he tau tagata tokologa. Iloa fēfē e tautolu e mena nei? Ko e kakano ha kua talahau mai pihia he Tohi Tapu. Ko e Tohi Tapu ko e tohi he kupu mooli ne puhala mai he Atua mooli tokotaha, ko e haana higoa ko Iehova. Na tufugatia e Iehova e tau tagata; ti iloa mitaki e ia e mena ka tupu ki a lautolu ka mamate.​—Salamo 83:18; 2 Timoteo 3:16.

Kua pehē mai e Tohi Tapu na tufugatia he Atua a Atamu, ko e tagata uluaki, “mai . . . he efuefu he kelekele.” (Kenese 2:7, NW ) Ne tuku he Atua a ia he Parataiso, ko e kaina haia ko Etena. Ane mai ke omaoma e Atamu e fakatufono ha Iehova, a po kua nakai mate a ia; kua moui agaia a ia he lalolagi he vahā nei. Ka ko e magaaho ne moumou pauaki ai e Atamu e fakatufono he Atua, ne pehē atu e Atua ki a ia: “[To] liu a koe ke he kelekele; ha ko e mena eke mai ai a koe; ha ko e efuefu ni a koe, to liu foki a koe ke he efuefu.”​—Kenese 3:19.

Ko e heigoa e kakano he mena nei? Mooli, ko fe a Atamu he magaaho to tufuga e Iehova a ia mai he efuefu? Kua nakai ha ha i ai a ia he ha mena taha. Nakai ko ia ko e agaaga nakai la fanau mai he lagi. Ne nakai gahuahua a ia. Ti ko e magaaho ne pehē ai a Iehova ki a Atamu ke “liu . . . ke he kelekele,” ko e kakano haana ke mate a Atamu. Ka e nakai laka atu a ia ke he kautu agaaga. Ha kua mate, kua  liu foki a Atamu galo e moui, kua nakai tuai gahuahua. Ko e kakano he mate ko e galo kehe he moui.

Ka e kua e falu kua mamate? Nakai kia gahuahua foki a lautolu? Kua tali mai he Tohi Tapu:

• “Kua hoko oti [tau tagata mo e tau manu] ni ke he mena taha; mai he efuefu oti kana, kua liliu atu oti foki ke he efuefu.”—Fakamatalaaga 3:20.

• “Ko lautolu ne mamate nakai iloa e lautolu ha mena.”—Fakamatalaaga 9:5.

• “Ko e fakaalofa foki ha lautolu, mo e ha lautolu a ita, mo e ha lautolu a mahekeheke, kua mole atu ia.”—Fakamatalaaga 9:6.

• “Kua nakai fai gahua, po ke manamanatu, po ke mena kua iloa, po ke iloilo ke he tukuaga, kua fina atu ki ai a koe.”—Fakamatalaaga 9:10.

• “Kua liu [e tagata] ke he kelekele ne eke aki a ia, ko e aho ia ni kua mate ai hana tau manatu.”—Salamo 146:4.

 Kua uka lahi kia ki a koe ke talia e tau tohiaga tapu nei? Kaeke kua pihia, kia manamanatu la ke he mena nei: Ke he loga he tau magafaoa, ko e tagata taane ka gahua tupe ke leveki aki e magafaoa. Kaeke ke mate e tagata taane, kua fa mahani e magafaoa ke matematekelea ha ko e tau mena uka. Ko e falu a magaaho kua nakai moua he hoana mo e fanau ha tupe lahi ke fakatau aki e tau mena kai. Neke taute fakakelea he tau fī he tagata taane a lautolu. Ko e mogonei hūhū hifo la ki a koe ni: ‘Kaeke ke moui agaia e tagata taane ia he lalolagi agaaga, ti ko e ha ne nakai matutaki ai a ia ke leveki haana magafaoa? Ko e ha ne nakai puipui ai e ia haana magafaoa mai he tau tagata kelea?’ Ko e kakano ni ha kua hako e tau tohiaga tapu. Ko e tagata taane kua nakai fai moui, kua nakai maeke ke taute ha mena taha.​—Salamo 115:17.

Ko e pehē kia e kakano he mena nei ko e tau tagata ka mamate to nakai liliu ke momoui foki? Nakai, nakai kakano pihia. To tutala a tautolu ke he liu tutū mai he magaaho fakamui. Ka ko e kakano pehē, kua nakai iloa he tau tagata mamate e tau gahua haau ne taute. Kua nakai kitia e lautolu a koe, nakai logona a koe, po ke tutala ki a koe. Kua nakai lata ke matakutaku a koe ki a lautolu. Kua nakai maeke ke lagomatai e lautolu a koe, mo e nakai fakakelea e lautolu a koe.​—Fakamatalaaga 9:4; Isaia 26:14.