Tokovalu ne tagata ne hao mai he Fakapuke, ka e fai magaaho ti malikiti hake e numera ke totou afe. Ti 352 e tau he mole e Fakapuke ti fanau a Aperahamo. Iloa e tautolu e Atua ne fakamooli haana maveheaga ke age ki a Aperahamo e tama taane ne higoa ko Isaako. Ti mai he tau tama taane tokoua ha Isaako, ne fifili he Atua a Iakopo.

Lahi e magafaoa a Iakopo, ko e 12 e tama taane mo e fai tama fifine foki. Kua vihiatia he tau fanau taane toko 10 e tehina ha lautolu ko Iosefa ti fakafua atu a ia ke fakatupa ki Aikupito. Magaaho fakamui, ne eke a Iosefa mo taha takitaki lahi i Aikupito. Ko e magaaho ne to ai e hoge lahi, ne kamatamata e Iosefa haana tau lafu ke kitia kua hiki nakai ha lautolu a tau loto. Fakahiku, ti hiki e magafaoa katoa a Iakopo ko e tau Isaraela ki Aikupito. Tupu e mena nei he 290 e tau he mole e fanau a Aperahamo.

Ke he 215 e tau i mua ne nonofo e tau Isaraela i Aikupito. Mole e mate a Iosefa ti eke a lautolu mo tau fekafekau i ai. Fai magaaho ti fanau a Mose, ti fakaaoga he Atua a ia ke laveaki e tau Isaraela mai i Aikupito. Ko e katoatoa ko e 857 e tau ne putoia ke he fakamauaga tuai he Vala UA.