TAHA he tau matakavi ne o atu e tau tagata nonofo i ai he mole e Fakapuke ne higoa ko Uro. Kua eke ia mo maaga aoga lahi ne ha ha i ai foki falu kaina fulufuluola. Ka ko e tau tagata i ai kua tapuaki ke he tau atua fakavai. Ne taute pihia foki e lautolu i Papelu. Ko e tau tagata i Uro mo Papelu ne nakai tuga a Noa mo e haana tama taane ko Semu, ne fekafekau tumau ni ki a Iehova.

Fakahiku ai, he 350 e tau he mole e fakapuke, ne mate e tagata tua fakamooli ko Noa. Ua ni e tau he mole ti fanau e tagata taane ne kitia e koe he fakatino nei. Ko ia ko e tagata uho lahi ke he Atua. Ko e higoa haana ko Aperahamo. Ne nofo a ia mo e magafaoa haana he maaga ia ko Uro.

Taha aho ne tala age a Iehova ki a Aperahamo: ‘Toka e koe a Uro mo e tau magafaoa haau, ti ō ke he motu ka fakakite atu e au ki a koe.’ Omaoma nakai a Aperahamo ke he Atua mo e toka hifo e tau mena hagahaga mitaki oti i Uro? E, omaoma a ia. Ti kakano ni ha ko e omaoma tumau ha Aperahamo ke he Atua ati talahaua ai a ia ko e kapitiga he Atua.

Ne o atu foki falu magafaoa ha Aperahamo fakalataha mo ia he magaaho ne toka e ia a Uro. Ne fano foki e matua taane haana ko Taraha. Pihia foki mo e tama he matakainaga haana ko Lota. Ti fano foki e hoana ha Aperahamo ko Sara. Fai magaaho ti hohoko oti a lautolu ke he matakavi ne higoa ko Karana, ko e mena ne mate ai a Taraha. Kua mamao lahi a lautolu mai i Uro.

Fai magaaho he mole ne toka e Aperahamo mo e magafaoa haana a Karana ti o atu ke he motu ne higoa ko Kanana. He matakavi ia ne pehē a Iehova: ‘To foaki atu e au e motu nei ma e tau fanau haau.’ Ne nofo a Aperahamo i Kanana ti nofo a ia he tau fale ie.

Ne kamata e Atua ke lagomatai a Aperahamo ti tupu lahi ai haana tau fuifui mamoe mo e falu manu foki, ti totou teau e tau fekafekau. Ka ko ia mo Sara kua nakai fai tama fanau a laua.

Magaaho ne 99 e tau moui ha Aperahamo, ne pehē a Iehova: ‘Ko e maveheaga haaku to eke a koe mo matua taane ke he tau motu loga.’ Ka e maeke fēfē e mena nei, ha kua fuakau lahi tuai a Aperahamo mo Sara he magaaho nei ke fai tama?