ILOA nakai e koe ko hai e tau tagata taane nei ne tutala a Iakopo ki ai? He mole e loga e aho ne fenoga atu ai, ne feleveia a Iakopo mo lautolu he tapa vaikeli. Hane leveki a lautolu he tau mamoe ha lautolu. Ne hūhū a Iakopo: ‘O mai a mutolu i fe?’

‘Mai Karana,’ he talahau e lautolu.

‘Iloa nakai e mutolu a Lapana?’ he hūhū e Iakopo.

‘E,’ he tali e lautolu. ‘Kitiala, hane hau e tama fifine haana ko Rahela mo e tau mamoe haana.’ Kitia nakai e koe a Rahela hane hau i kunā?

Magaaho ne kitia e Iakopo a Rahela mo e tau mamoe he agikolo haana ko Lapana, ne fano a ia mo e fuluhi kehe e maka he vai keli ke fakainu e tau mamoe. Ti figita e Iakopo a Rahela mo e tala age ko hai a ia. Ne fiafia lahi a Rahela ti fano a ia ki kaina mo e tala age ke he matua taane haana ko Lapana.

Ne fiafia lahi a Lapana ke nofo a Iakopo mo ia. Ti ko e magaaho ne ole a Iakopo ke mau mo Rahela, ne fiafia a Lapana. Ka kua tala age a ia ki a Iakopo ke gahua he fonua haana ke he fitu e tau ke moua a Rahela. Ha kua loto lahi a Iakopo ki a Rahela ne taute e ia e mena nei. Ka ko e magaaho ne hoko ai ke mau, iloa nakai e koe e mena ne tupu?

Ne age e Lapana e tama fifine fakamua haana ko Lea ki a Iakopo ka e nakai ko Rahela. Magaaho ne talia e Iakopo ke gahua ma Lapana ke fitu foki e tau, ne age foki e Lapana a Rahela mo hoana haana. He tau vahā ia ne fakaatā he Atua e tau tagata taane ke loga e hoana. Ka ko e magaaho nei, tuga ni ne fakakite he Tohi Tapu, kua lata e tagata taane ke taha ni e hoana.