TALA 29
Kakano ne Hola Ai a Mose
ONOONO la ki a Mose kua hola mai i Aikupito. Kitia nakai e koe e tau tagata taane hane tutuli a ia? Iloa nakai e koe ko e ha ne manako a laua ke tamate a Mose? O mai la ke kumikumi ko e maeke nakai a tautolu ke iloa.
Ne moui hake a Mose he fale a Farao, ko e patuiki ha Aikupito. Kua eke a ia mo tagata lotomatala mo e talahaua. Na iloa e Mose ne nakai ko e Aikupito a ia, ka ko e tau matua mooli haana ko e tau tupa Isaraela.
Hoko ke he taha aho, magaaho ne 40 e tau tau haana, ne fifili a Mose ke fano ke fakakia kua fēfē e tau tagata haana. To lahi e kelea e levekiaga ki a lautolu. Kitia e ia e tagata Aikupito ne keli e tupa Isaraela. Ne kitekite fano a Mose, ti magaaho ne kitia e ia kua nakai ha i ai ha tagata, ne keli e ia e tagata Aikupito, ti mate e tagata Aikupito. Ne tanu e Mose a ia he oneone.
He aho hake, ne liu atu a Mose ke fakakia e tau tagata haana. Ne manatu a ia kua maeke a ia ke lagomatai a lautolu ke nakai liu ke fakatupa foki. Ka kua kitia e ia tokoua e tagata Isaraela ne latau, ti pehē a Mose ke he tagata ne hepe: ‘Ko e keli mo ha e koe e matakainaga haau?’
Ne pehē e tagata taane: ‘Ko hai ne kotofa a koe mo iki mo e fakafili ha mautolu? To kelipopo foki kia e koe au tuga ne kelipopo e koe e tagata Aikupito?’
Ne matakutaku a Mose he magaaho nei. Iloa e ia kua iloa tuai he tau tagata e mena ne taute e ia ke he tagata Aikupito. Ne logona foki e Farao e mena ia, ti fakafano atu e ia e tau tagata taane ke kelipopo a Mose. Ko e mena haia ati hola a Mose mai i Aikupito.
Magaaho ne toka e Mose a Aikupito, ne fano mamao a ia ke he motu ko Mitiana. Ne feleveia a ia mo e magafaoa ha Ieteru he matakavi ia, ti faihoana ke he taha he tau tama fifine haana ne higoa ko Sipora. Ne eke a Mose mo tagata leveki manu ti leveki e ia e tau mamoe ha Ieteru. Ke he 40 e tau, ne nofo a ia he motu ko Mitiana. Kua 80 tuai e tau tau haana mogonei. Ti hoko ke he taha aho, he leveki a Mose he tau mamoe ha Ieteru, ne tupu e mena ofoofogia ne hiki e moui katoa ha Mose. Fufuke la e laupepa, ti o mai ke kitia ko e heigoa e mena ofoofogia nei.
