KITIA nakai e koe ko hai ha Tina ne fano ke ahiahi? Kua fano a ia ke feleveia mo e falu tama fifine ne nonofo he motu ko Kanana. To fiafia nakai e matua taane haana ko Iakopo ke he mena nei? Ke lagomatai ke tali e hūhū nei, lali ke manatu e puhala ne onoono ki ai a Aperahamo mo Isaako ke he tau fifine Kanana.

Manako nakai a Aperahamo ke he tama taane haana ko Isaako ke fai hoana ke he taha fifine Kanana? Nakai, ai manako a ia. Manako nakai a Isaako mo Repeka ke he tama taane ha laua ko Iakopo ke fai hoana ke he fifine Kanana? Nakai, ai manako a laua. Iloa nakai e koe ko e ha?

Kakano ha kua tapuaki e tau tagata nei i Kanana ke he tau Atua fakavai. Nakai ko e tau tagata mitaki a lautolu ke fai taane mo e fai hoana ki ai, ti nakai ko e tau tagata mitaki a lautolu ke eke mo tau kapitiga tata. Ti maeke ia tautolu ke iloa kua nakai fiafia foki a Iakopo ke kapitiga e tama fifine haana mo e tau fifine Kanana nei.

Mooli ni, ne matematekelea a Tina. Kitia nakai e koe e tagata taane Kanana i loto he fakatino hane onoono atu ki a Tina? Ko e higoa haana ko Sikema. He fina atu a Tina he taha aho ke ahiahi, ne uta e Sikema a Tina ke momohe pulenoa mo ia. Kua hepe e mena nei, ha ko e tau tagata taane mo e tau fifine ni kua mau ne kua lata ke momohe tokoua. Ko e mena kelea nei ne taute e Sikema ki a Tina ne takitaki atu ke he falu matematekelea.

Magaaho ne logona he lafu tugaane ha Tina e mena ne tupu, ne ita lahi a lautolu. Tokoua ia lautolu, ko Simeona mo Levi, ne ita lahi ti uta e laua e tau pelu mo e o atu ke he maaga mo e feoho atu fakaofo ke he tau tagata. Ne kelipopo e laua mo e tau lafu ha laua a Sikema mo e tau tagata taane oti. Ne ita lahi a Iakopo ha kua taute he tau tama taane haana e mena kelea nei.

Tupu mai fēfē e tau lekua oti nei? Tupu mai ni ha kua fakatu kapitiga a Tina mo e tau tagata ne nakai omaoma e tau matafakatufono he Atua. To nakai manako a tautolu ke fakatu kapitiga pihia, to pihia nakai a tautolu?