KITIALA e tama mukemuke ne tagi, mo e totō e matalima he fifine. Ko Mose a ē. Iloa nakai e koe ko hai e fifine fulufuluola ia? Ko ia ko e tama fifine patuiki ha Aikupito, ko e tama fifine ha Farao.

Ne fufū he matua fifine ha Mose e tama mukemuke haana ato tolu e mahina he lahi, ha kua nakai manako a ia ke tamate he tau Aikupito a Mose. Ka e iloa e ia to liga moua he faoa a Mose, ti hanei e mena ne taute e ia ke fakahao aki a Mose.

Ne uta e ia e kato mo e taute ke ua tafe e vai ki loto. Ti tuku e ia a Mose i loto, ti fakatoka e kato he ulu kaho he kauvai he Vailele Naila. Ne tala age ke he mahakitaga ha Mose ko Miriama ke tu fakatata atu ke kitia ko e heigoa ka tupu.

Nakai leva ne hifo mai e tama fifine a Farao ke koukou he Vailele Naila. Ne ofo a ia he kitia e kato he ulu kaho. Ne fekau e ia e taha he tau fekafekau fifine haana: ‘Fano ke tamai e kato na ki a au.’ Magaaho ne veveu he tama fifine patuiki e kato, ne kitia e ia e tama mukemuke fulufuluola! Ko e tama mukemuke ko Mose hane tagi, ti fakaalofa e tama fifine patuiki ki a ia. Ne nakai manako a ia ke tamate e tama mukemuke.

Ti hau ai a Miriama. Maeke a koe ke kitia a ia i loto he fakatino. Ne hūhū a Miriama ke he tama fifine a Farao: ‘Fano nakai au mo e ui ke he taha fifine Isaraela ke fakahuhu e tama mukemuke ma haau?’

‘Fakamolemole ati fano a,’ he talahau he tama fifine patuiki.

Ti poi fakamafiti atu a Miriama ke tala age ke he matua fifine haana. Magaaho ne hau e matua fifine ha Mose ke he tama fifine patuiki, ne pehē e tama fifine patuiki: ‘Kia uta a e koe e tama nei mo e fakahuhu maaku, to ta atu e au e totogi ki a koe.’

Ati leveki ai he matua fifine ha Mose e tama ni haana. He magaaho fakamui ne lahi ai a Mose, ne uta he matua fifine haana a ia ke he tama fifine a Farao, ne hiki ai mo tama ni haana. Ko e kakano haia ne tupu hake ai a Mose he fale ha Farao.