KUA ua e tau he mole, ka e nofo agaia a Iosefa he fale puipui. Ne nimo he tagata taute uaina a ia. Ti hoko ke he taha pō ne miti a Farao ke he ua e miti pauaki, ti manamanatu a ia ke he kakano he tau miti. Kitia nakai e koe a ia ne mohe he mena nā? He pogipogi hake ne hea atu a Farao ke he tau tagata iloilo haana mo e tala age ki a lautolu e tau mena kua miti a ia ki ai. Ka kua nakai maeke ia lautolu ke tala age e kakano he tau miti haana.

Fakahiku ai ne manatu he tagata taute uaina a Iosefa he magaaho nei. Ne pehē a ia ki a Farao: ‘Magaaho ne tuku au he fale puipui ne ha ha i ai e taha tagata ne maeke ke fakakakano e tau miti.’ He magaaho ia ni ne poaki a Farao ke tamai a Iosefa he fale puipui.

Ne tala age e Farao ki a Iosefa e tau miti haana: ‘Ne kitia e au fitu e povi gako mo e tino mitaki. Ti kitia e au fitu e povi feko mo e pipili.’ Ti kai he tau povi pipili e tau povi gako.

‘He miti haaku ke uaaki, ne kitia e au fitu e huki saito kua lahi mo e mitaki ne tupu mai he matapatu taha. Ti kitia foki e au e huki saito ne fitu ne ikiiki mo e fifigo. Ti kamata e tau huki saito ikiiki ke folo fua e tau huki saito mitaki ne fitu.’

Ne pehē a Iosefa ki a Farao: ‘Kua taha ni e kakano he ua e miti. Ko e fitu e povi gako mo e fitu e huki saito mitaki kua kakano ko e fitu e tau, ti ko e fitu e povi pipili mo e fitu e huki saito ikiiki kua kakano ko e fitu foki e tau. To fitu e tau ka mahu ai a Aikupito he loga e tau mena kai ka tutupu. Mo e to fitu foki e tau ka gahoa e tau mena kai.’

Ti tala age a Iosefa ki a Farao: ‘Kotofa taha tagata pulotu ke pule ke he fakapotopoto maiaga he tau mena kai he fitu e tau mitaki. Ti to nakai hoge e tau tagata he fitu e tau hake ka gahoa lahi e tau mena kai.’

Ne fiafia a Farao ke he manatu ia. Ti fifili e ia a Iosefa ke fakapotopoto mai e tau mena kai, mo e tanaki ai. Ha ko e hagai ki a Farao, ne eke a Iosefa mo tagata kua mua e tokoluga i Aikupito.

Valu e tau he mole he magaaho ne to ai e hoge, ne kitia e Iosefa falu tagata taane hane o mai. Iloa nakai e koe ko hai a lautolu ia? Ne ha ai, ko e lafu taokete toko 10 haana! Kua fakafano atu he matua taane a lautolu ki Aikupito ha kua teitei oti tuai e tau mena kai ha lautolu he kaina i Kanana. Ne iloa e Iosefa e lafu haana, ka e nakai iloa e lautolu a ia. Iloa nakai e koe ko e ha? Ha kua motua tuai a Iosefa, ti kua tui a ia he vahega tapulu kehe.

Ne manatu e Iosefa he magaaho ne tote a ia e miti hagaao ke he lafu haana ne o mai ke fakaveli fakafohifo ki a ia. Manatu nakai e koe he totou ke he tala ia? Ti kua kitia ai e Iosefa ko e Atua ne fakafano atu a ia ki Aikupito ma e kakano mitaki. Ko e heigoa he manatu e koe e mena ne taute e Iosefa? O mai la ke kitia.