ONOONO la ke he tau mena he tagata nei hane tanu i lalo he fale ie haana! Ko e tapulu fulufuluola, mo e tepu auro mo e tau vala ario. Ne fofō ai e ia mai he maaga ko Ieriko. Ka ko e heigoa kua lata ke taute aki e tau mena i Ieriko? Manatu nakai e koe?

Kua lata e tau mena ia ke moumou, mo e uta e tau auro mo e tau ario ke he tokaaga koloa he faituga ha Iehova. Ti kua nakai omaoma e tau tagata nei ke he Atua. Ne kaiha e lautolu e tau mena he Atua. Ko e higoa he tagata ko Akana, ti ko lautolu kua ha ha mo ia ko e falu he magafaoa haana. O mai la ke kitekite ko e heigoa ka tupu.

He mole e kaiha e Akana e tau mena nei, ne fakafano atu e Iosua e falu tagata ke tau atu ke he maaga ko Ai. Ka kua kaumahala a lautolu he tau. Ne mamate e falu, ka e fehola e faoa ne toe. Ti momoko lahi a Iosua. Kua fakaveli fakafohifo a ia ke he kelekele ti liogi ki a Iehova: ‘Ko e ha ne fakaatā e koe e mena nei ke tupu ki a mautolu?’

Ne tali e Iehova: ‘Kia matike ā! Kua hala a Isaraela. Ne uta e lautolu falu mena kua lata ke moumou po ke foaki age ke he faituga ha Iehova. Kua kaiha e lautolu e tapulu fulufuluola mo e fufū ai. To nakai fakamonuina e au a mutolu ato fakaotioti e tau mena ia, mo e tagata ne fofō e tau mena nei.’ Pehē a Iehova to fakakite e ia ki a Iosua e tagata kelea ia.

Ti fakapotopoto mai e Iosua e tau tagata oti, ti moua ai e Iehova e tagata kelea ko Akana. Ne pehē a Akana: ‘Kua hala tuai au. Ne kitia e au e tapulu fulufuluola, mo e tepu auro mo e tau vala ario. Ne manako lahi au ki ai ti uta ai e au. To moua ai e mutolu haia ne tanu i loto he fale ie haaku.’

Magaaho ne moua e tau mena nei ti tamai ai ki a Iosua, ne pehē a ia ki a Akana: ‘Kua fakalavelave mai e koe ki a mautolu he ha? Mogonei to fakalavelave atu a Iehova ki a koe!’ He mogoia ne pinimaka he tau tagata oti a Akana mo e magafaoa haana ti mamate. Fakakite nakai he mena ia kua nakai lata ia tautolu ke fofō e tau mena ne nakai ko e ha tautolu?

He magaaho fakamui ne liliu atu e tau Isaraela ke tau atu ki Ai. He mogonei, ne lagomatai e Iehova e tau tagata haana ti kautu a lautolu he tau.