KUA lagataha nakai e taute e koe e maveheaga ti uka ke fakamooli he magaaho fakamui? Ne taute pihia he tagata he fakatino nei, ko e mena haia kua momoko lahi a ia. Ko e tagata taane ko e fakafili malolō ha Isaraela ne higoa ko Iefeta.

Moui a Iefeta he magahala ne nakai tapuaki e tau Isaraela ki a Iehova. Kua liu foki a lautolu taute e tau mena kelea. Ti fakaatā e Iehova e tau tagata Amoni ke fakamamahi a lautolu. Kua omoi he mena nei e tau Isaraela ke tagi atu ki a Iehova: ‘Kua hala tuai a mautolu ki a koe. Fakamolemole laveaki a mautolu!’

Kua tokihala e tau tagata ha ko e tau mena kelea ne taute e lautolu. Kua fakakite e lautolu e tokihala ha lautolu he liu tapuaki ki a Iehova. Ti liu foki a Iehova lagomatai a lautolu.

Kua fifili he tau tagata a Iefeta ke tau atu ke he tau tagata kelea ha Amoni. Ne manako lahi a Iefeta ke lagomatai e Iehova a ia he tau. Ti mavehe a ia ki a Iehova: ‘Ka eke ke tuku mai e koe e kautū ki a au ke he tau Amoni, ko e tagata fakamua ka hu mai he fale haaku ke fonofono au ka liu mai he haaku a kautūaga, to foaki atu e au ki a koe.’

Ne fanogonogo a Iehova ke he maveheaga ha Iefeta, ti lagomatai e ia a ia ke kautū he tau. Magaaho ne liu a Iefeta ki kaina, iloa nakai e koe ko hai ne hu mai mua ke fonofono a ia? Ko e tama fifine haana, ko e tama ni a ia haana. ‘Oi te, haku tama fifine na e!’ he tagi atu e Iefeta. ‘Kua fakamomoko mai e koe au. Ka kua taute tuai e au e maveheaga ki a Iehova, ti nakai maeke ke liuaki mai haaku a kupu.’

He magaaho ne iloa he tama fifine ha Iefeta e maveheaga haana, fakamua ne momoko foki a ia. Ha ko e kakano to toka e ia haana matua taane mo e tau kapitiga. Ka e to fakaaoga e ia e moui haana ne toe ke fekafekau ki a Iehova he faituga i Sailo. Ti tala age a ia ke he haana matua taane: ‘Ka taute e koe e maveheaga ki a Iehova, ati fakamooli ai ni e koe.’

Ti fano e tama fifine ha Iefeta ki Sailo, mo e fekafekau a ia he moui katoa haana ki a Iehova he faituga. He tau tau takitaha, fā e aho ne o atu e tau fifine Isaraela ke feleveia mo ia i ai, ti fiafia auloa a lautolu. Ne ofania he tau tagata e tama fifine ha Iefeta ha ko ia ko e fekafekau mitaki ha Iehova.