MAGAAHO ne matematekelea ai e tau Isaraela, ne tagi atu a lautolu ki a Iehova. Ti tali atu a Iehova ki a lautolu he foaki age e tau takitaki malolō ke lagomatai a lautolu. Ne fakahigoa he Tohi Tapu e tau takitaki nei ko e tau fakafili. Ko Iosua ko e fakafili fakamua, mo e falu he tau fakafili ne mumui mai ia ia ne higoa ko Otinielu, Ehuta mo Samekara. Ka e tokoua he tau tagata ne lagomatai a Isaraela ko e tau fifine ne higoa ko Tapora mo Iaeli.

Ko Tapora ko e perofeta fifine. Ne foaki age e Iehova e tau fakailoaaga ki a ia hagaao ke he vahā i mua, ti tala age e ia ke he tau tagata e tau mena ne talahau e Iehova. Ko Tapora foki ko e fakafili. Ne nofo a ia i lalo he taha paama pauaki he motu matiketike, ti o mai e tau tagata ki a ia ke kumi lagomatai ma e tau lekua ha lautolu.

He magahala nei ko Iapino e patuiki ha Kanana. Ne 900 e kariota tau haana. Kua malolō lahi e kautau haana ti tokologa he tau Isaraela kua fakaohooho mo tau tupa ha Iapino. Ko e higoa he takitaki kau he kautau he Patuiki ko Iapino ko Sisera.

Taha aho ne fakailoa atu e Tapora ke hau e Fakafili ko Parako, mo e pehē atu ki a ia: ‘Kua pehē mai a Iehova: “Uta 10,000 tagata mo e takitaki atu a lautolu ke he Mouga ko Taporā. I ai to ta atu e au a Sisera ki a koe. To foaki atu e au e kautū ki a koe, ki luga ia ia mo e haana kautau.”’

Ne tala age a Parako ki a Tapora: ‘To fano au kaeke ke hau a koe mo au.’ Ne fano a Tapora, ka e pehē a ia ki a Parako: ‘To nakai moua e koe e lilifu ka kautū, ha ko e mena to tuku e Iehova a Sisera ke he lima he fifine.’ Ti ko e mena ha nei ne tupu.

Kua hifo mai a Parako he Mouga ko Taporā ke feleveia mo e tau kautau ha Sisera. Ka e amanaki ni a Iehova ti fakato e fakapuke, ti tokologa e kautau he fī ne tomo. Ne hifo mai a Sisera he haana kariota ti hola kehe.

Nakai leva ti hau a Sisera ke he fale ie ha Iaeli. Ti uiina e Iaeli a ia ki fale, mo e age e huhu ke inu ai. Kua tauveli mohe a ia ha ko e mena nei ti nakai leva ti pulumohea a ia. Ti uta e Iaeli e fao he fale ie mo e pao ke he ulu he tagata kelea nei. Magaaho fakamui, ne hau ai a Parako ti fakakite age e ia a Sisera kua mate! Ti kitia ai e koe kua fakamooli tuai e mena ne talahau e Tapora.

Fakahiku ni ti kelipopo foki e Patuiki ko Iapino, ti fai magaaho e tau Isaraela he nonofo mafola ai.