ONOONO la ke he tagata i loto he vai. Kua matematekelea lahi a ia, pihia nakai? Ko e folo fai he ika nā a ia! Iloa nakai e koe ko hai e tagata nei? Ko e higoa haana ko Iona. O mai la ke kitia ko e ha kua matematekelea lahi a ia.

Ko Iona ko e perofeta ha Iehova. Ne nakai leva e mate he perofeta ko Elisaio ti tala age a Iehova ki a Iona: ‘Kia fano ke he maaga lahi ko Nineva. Kua lahi ni e mahani kelea he tau tagata i ai, ti manako au ke tutala a koe ki a lautolu hagaao ke he mena ia.’

Ka e nakai fia fano a Iona. Ti heke a ia he vaka ne taute ke fano ke he taha faahi i Nineva. Ne nakai fiafia a Iehova ki a Iona ha kua hola a ia. Ne fakatō e ia e afā lahi. Kua malolō lahi ai ti hagahagakelea e vaka ke tomo. Ne matakutaku lahi e tau tagata gahua he vaka, ti ui atu a lautolu ke he tau atua ha lautolu ma e lagomatai.

Fakahiku ai, ne tala age a Iona ki a lautolu: ‘Na tapuaki au ki a Iehova, ko e Atua ne tufuga e lagi mo e lalolagi. Ti ko e hola au mai he taute e fekau ne ui e Iehova ki a au ke taute.’ Ti hūhū e tau tagata gahua he vaka: ‘Ko e heigoa kua lata ia mautolu ke taute ki a koe ke milino e afā?’

‘Kia liti au ki tahi, to maha e tahi,’ he ui e Iona. Ne nakai manako e tau tagata gahua he vaka ke taute e mena ia, ka kua tō lahi mahaki e afā ti fakahiku ai ne liti e lautolu a Iona ki tahi. He mogoia ni ne milino e afā, ti liu e tahi maha.

He tomo hifo a Iona ki loto he vai, ne folo he ika lahi a ia. Ka e nakai mate a ia. Ke he tolu e aho ti tolu e pō ne nofo a ia i loto he manava he ika. Ne tokihala a Iona ha kua nakai omaoma a ia ki a Iehova mo e fano ki Nineva. Ti iloa nakai e koe e mena ne taute e ia?

Ne liogi a Iona ki a Iehova ma e lagomatai. Ti taute e Iehova e ika ke fakalua mai a Iona ke he fuga kelekele mōmō. He mole e mena ia ne fano a Iona ki Nineva. Nakai kia fakaako he mena nei a tautolu ke he aoga he taute e tau mena ka talahau e Iehova?