ILOA nakai e koe ko e ha kua hēhē fakavalavala he tagata nei e tapulu haana? Ko Iehova ne tala age ki a ia ke taute pihia. Ko e tagata nei ko e perofeta he Atua ko Ahia. Iloa nakai e koe ko e heigoa e perofeta? Ko ia ko e tagata ne tala age tuai he Atua e mena ka tupu.

Ko Ahia a ē ne tutala ki a Ierepoamo. Ko Ierepoamo e tagata ne kotofa e Solomona ke taute falu gahua talaga haana. Magaaho ne feleveia a Ahia mo Ierepoamo he puhalatū nei, ne taute e Ahia e mena matakehe. Ne aaki e ia e tapulu foou haana ne tui ti hēhē ke he 12 e vala. Ti tala age a ia ki a Ierepoamo: ‘Uta 10 e vala ma haau.’ Iloa nakai e koe e kakano ne age ai e Ahia ki a Ierepoamo 10 e vala?

Ne fakamaama e Ahia to utakehe e Iehova e kautu mai ia Solomona. Pehē a ia to age e Iehova 10 e magafaoa ki a Ierepoamo. Kakano e mena nei to ua ni e magafaoa ka toe hifo ma e tama taane ha Solomona ko Rehopoamo ke pule ki ai.

Magaaho ne logona e Solomona e talahauaga ha Ahia ki a Ierepoamo ti ita lahi ai a ia. Ne lali a ia ke kelipopo a Ierepoamo. Ka e hola a Ierepoamo ki Aikupito. Fai magaaho he mole ti mate a Solomona. Ne patuiki a ia ke he 40 e tau, ka ko e magaaho nei kua patuiki e tama taane haana ko Rehopoamo. I Aikupito, ne logona e Ierepoamo kua mate tuai a Solomona, ti liu mai a ia ki Isaraela.

Nakai ko e patuiki mitaki a Rehopoamo. Ne mua atu e vale haana ke he tau tagata ke he vale he matua haana ko Solomona he magaaho fakamua. Ne o atu a Ierepoamo mo e falu tagata talahaua ke he Patuiki ko Rehopoamo mo e ole ki a ia ke mahani mitaki ke he tau tagata. Ka e ai fanogonogo a Rehopoamo. Ne mua atu e mahani vale haana he magaaho nei. Ti fakatū he tau tagata a Ierepoamo mo patuiki ke he magafaoa toko 10, ka ko e tau magafaoa tokoua ha Peniamina mo Iuta ne fakatumau ni a lautolu ke toka a Rehopoamo mo patuiki ha lautolu.

Nakai manako a Ierepoamo ke he tau tagata haana ke ō ki Ierusalema ke tapuaki he faituga ha Iehova. Ti taute e ia ua e punua povi auro ti fekau e tau tagata he magafaoa toko 10 ke tapuaki ki ai. Nakai leva ti puke e motu he mahani kolokolovao mo e favale.

Kua matematekelea foki e kautu he magafaoa tokoua. Nakaila lima e tau he mole e patuiki a Rehopoamo, ne hau e patuiki ha Aikupito ke tau ki a Ierusalema. Ne loga e tau koloa uho ne uta e ia mai he faituga ha Iehova. Ti ko e magaaho kū ni ne mau maopoopo ai e faituga ke tuga he magaaho ne talaga ai.