He fakapaea ki Papelonia, ne loga e tau kamatamata ke he tua he tau Isaraela. Ne tolo a Sataraka, Mesako mo Apetiniko ke he gutuumu he afi kakā, ka e tamai he Atua a lautolu ki fafo kua momoui. Fai magaaho he mole e kaumahala a Papelonia he tau Metai mo e tau Peresia, ne liti a Tanielu ke he ana leona, ka kua puipui foki he Atua a ia he pāpā e tau gutu he tau leona.

Fakahiku, ne fakatoka noa he patuiki ha Peresia ko Kuresa e tau Isaraela. Ne liliu a lautolu ke he motu ha lautolu he mole ai e 70 e tau he uta fakapaea a lautolu ki Papelonia. Taha he tau mena fakamua ne taute e lautolu he mogo ne liliu ai ki Ierusalema ko e kamata ke talaga e faituga ha Iehova. Ka e nakai leva ti taofi he tau fī e gahua ha lautolu. Ti kavi ke he 22 e tau he mole e liliu atu ha lautolu ki Ierusalema ne mau ai e faituga he taute.

Taha vala foki, to fakaako a tautolu hagaao ke he fenoga ha Esera he liu ki Ierusalema ke fakafulufuluola e faituga. Ko e kavi ke he 47 e tau anei he mole e mau he faituga. Ti 13 e tau he mole e fenoga ha Esera, ko Nehemia ne lagomatai ke liu atihake e tau kaupā ha Ierusalema ne malona. Putoia ke he Vala LIMA ko e 152 e tau tau he fakamauaga tuai ke hoko ke he mogonei.