MANATU nakai e koe e mogo ne logona hagaao ke he tau fuata tokotolu nei? E, ko lautolu ko e tau kapitiga ha Tanielu ne nakai talia ke kai e tau mena ne ai mitaki ma lautolu. Ne fakahigoa he tau Papelonia a lautolu ko Sataraka, Mesako mo Apetiniko. Ka e onoono la ki a lautolu mogonei. Ko e ha kua nakai fakaveveli fakafohifo a lautolu ke he tupua makimaki nei ke tuga e tau tagata oti? O mai la ke kumikumi ki ai.

Manatu nakai e koe e tau fakatufono ne tohia e Iehova ne fakahigoa ko e Tau Fakatufono Hogofulu? Ko e fakamuaaki he tau fakatufono nei ko e: ‘Aua neke tapuaki a koe ke he tau atua kehe ka ko au ni.’ Ko e tau fuata nei kua omaoma ke he fakatufono ia, pete ni ko e mena nakai mukamuka ke taute.

Ko Nepukanesa ko e patuiki ha Papelonia, ne ui atu ke he tau tagata talahaua tokologa ke fakalilifu e tupua nei ne fakatū e ia. Ko e oti laia e vagahau haana ke he tau tagata oti: ‘Ka logona e mutolu e leo he tau pū, tau kitara, katoa mo e tau akau fakatagi kehekehe oti, kia fakaveveli fakafohifo a mutolu mo e hufeilo ke he tupua auro nei. Ko e ha tagata ka nakai fakaveli fakafohifo mo e hufeilo, to liti a ia he magaaho ia ni ki loto he gutuumu puhopuho.’

Magaaho ne iloa e Nepukanesa kua nakai fakaveveli fakafohifo a Sataraka, Mesako mo Apetiniko, ne ita lahi a ia. Ne poaki a ia ke tamai a lautolu ki a ia. Ne age e ia taha magaaho foki ke fakaveveli fakafohifo a lautolu. Ka kua falanaki e tau fuata taane ki a Iehova. ‘Ko e Atua kua fekafekau a mautolu ki ai kua maeke ke fakahao a mautolu,’ he tala age e lautolu ki a Nepukanesa. ‘Pete ni ka nakai fakahao e ia a mautolu, to nakai fakaveveli fakafohifo a mautolu ke he tupua auro haau.’

He logona e mena nei, ne holo ki mua e ita ha Nepukanesa. Na fai gutuumu ne tata mai ti poaki a ia: ‘Kia tafu fakalahi e gutuumu ke lagafitu e mua atu e kakā ke he mena ne fa mahani!’ Ti fekau e ia e tau tagata ne mua e malolō he kautau haana ke līlī a Sataraka, Mesako mo Apetiniko mo e tolo a lautolu ke he gutuumu. Ne vela lahi mahaki e gutuumu ti kua mamate e tau tagata malolō he tau alelo afi. Ka e kua e tau fuata tokotolu ne tolo e lautolu ki loto?

Ne onoono e patuiki ki loto he gutuumu, ti matakutaku lahi a ia. ‘Nakai kia na līlī e tautolu tokotolu e tagata taane mo e tolo a lautolu ke he gutuumu kakā?’ he hūhū e ia.

‘E, na taute pihia e tautolu,’ he tali he tau fekafekau haana.

‘Ka kua kitia e au tokofā e tagata taane ne ō viko i loto he afi,’ he talahau e ia. ‘Ne nakai līlī a lautolu, ti nakai fakamamahi he afi a lautolu. Ti ko ia ke fāaki kua tuga e atua.’ Ne fakatata atu e patuiki ke he gutu he gutuumu ti ui atu: ‘Sataraka! Mesako! Apetiniko! O mai a ki fafo, ko e tau fekafekau he Atua Mua Ue Atu!’

He o mai a lautolu ki fafo, ne kitia he tau tagata oti kua nakai mamahi a lautolu. Ati pehē e patuiki: ‘Kia fakaheke ke he Atua ha Sataraka, Mesako, mo Apetiniko! Ne fakafano e ia haana agelu ke laveaki a lautolu ha kua nakai fakaveveli fakafohifo a lautolu ke hufeilo ke he taha atua ka ko e ha lautolu ni.’

Nakai kia ko e fakafifitakiaga mitaki anei he tua fakamooli ki a Iehova ma tautolu ke mumuitua ki ai?