KITIA la a Iesu ne nofo he mena nei. Kua fakaako e ia e tau tagata oti nei he mouga i Kalilaia. Ko lautolu ne nonofo tata atu ki a ia ko e tau tutaki haana. Na fifili e ia toko 12 mai ia lautolu ke eke mo tau aposetolo haana. Ko e tau aposetolo ko e tau tutaki pauaki ha Iesu. Iloa nakai e koe e tau higoa ha lautolu?

Ko Simona Peteru mo e matakainaga haana ko Aneterea. Ti ko Iakopo mo Ioane, ko e tau lafu foki. Taha aposetolo foki ne higoa ko Iakopo, mo e taha ne higoa ko Simona. Ua e aposetolo ne higoa ko Iuta. Taha ko Iuta Isakariota, mo e taha Iuta ne iloa foki ko Tataio. Ti ha i ai a Filipo mo Natanielu (ne higoa foki ko Patolomaio), mo Mataio mo Toma.

He liliu mai i Samaria, ne kamata a Iesu ke fakamatala, ko e fakamuaaki laia anei: ‘Kua tata mai tuai e kautu he lagi.’ Iloa nakai e koe ko e heigoa e kautu ia? Ko e fakatufono mooli he Atua. Ko Iesu e patuiki. To pule mai a ia he lagi mo e tamai e mafola ke he lalolagi. Ko e lalolagi katoa to taute he kautu he Atua ke eke mo parataiso fulufuluola.

Kua fakaako e Iesu e tau tagata he mena nei hagaao ke he kautu. ‘Kua lata ia mutolu ke liogi pehē,’ he fakamaama e ia. ‘Ha mautolu a Matua na e ha ha he lagi, kia tapu haau a higoa. Kia hoko mai haau a kautu. Kia eke haau a finagalo ke he lalolagi nei, tuga ni ne eke ke he lagi.’ Tokologa e tagata ne fakahigoa e mena nei ‘Ko e Liogi he Iki.’ Fakahigoa ai he falu ko e ‘Ha Mautolu a Matua.’ Maeke nakai a koe ke talahau e liogi katoa?

Kua fakaako foki e Iesu e tau tagata ke he puhala kua lata ia lautolu ke taute atu ke he falu. ‘Taute ke he falu e mena kua loto a koe ma lautolu ke taute ki a koe,’ he talahau e ia. Fiafia nakai a koe ka fehagai e falu ki a koe ke he puhala totonu? Ti ko e pehē a Iesu, kua lata ia tautolu ke mahani totonu atu ke he tau tagata. To nakai kia mitaki ka pihia oti e tau tagata he lalolagi parataiso?