KITIA la e lupe kua hifo mai ke he ulu he tagata taane. Ko e tagata ia ko Iesu. He mogonei kua kavi ke he 30 e tau haana he moui. Ti ko e tagata nā mo ia ko Ioane. Kua fitā e fai mena a tautolu ne iloa hagaao ki a ia. Manatu nakai e koe he mogo ne fano a Maria ke ahiahi e matakainaga haana ko Elisapeta, ti hopohopo e tama mukemuke i loto he manava ha Elisapeta he fiafia? Ko e tama ia ne nakai la fanau ko Ioane. Ka ko e heigoa ha Ioane mo Iesu kua taute he mogonei?

Ko e fakauku hifo laia e Ioane a Iesu ki loto he Vailele ko Ioritana. Ko e puhala anei ka papatiso e tagata. Fakamua, ne fakauku hifo a ia ki loto he vai, ti liu ta hake mai. Ha kua taute pihia e Ioane ke he tau tagata, ne fakahigoa a ia ko Ioane ko e Papatiso. Ka ko e ha ne papatiso e Ioane a Iesu?

Ne taute pihia e Ioane ha kua hau a Iesu mo e ole ki a Ioane ke papatiso a ia. Kua papatiso e Ioane e tau tagata ne manako ke fakakite kua tokihala mooli a lautolu ke he tau mena kelea ha lautolu ne taute. Ka kua taute nakai e Iesu ha mena kelea ke fakatokihala ki ai? Nakai, ai fakaai a Iesu, ha ko ia ko e Tama he Atua ni mai he lagi. Ti ole a ia ki a Ioane ke papatiso a ia ma e taha kakano foki. O mai la ke kitia e kakano ia.

Ato hau a Iesu ki a Ioane hinei, ko ia ko e tagata kamuta. Ko e tagata kamuta ne talaga e tau koloa mai he tau vala akau, tuga e tau laulau mo e tau nofoa mo e tau nofoa loloa. Ko e taane ha Maria ko Iosefa ko e tagata kamuta, ti fakaako e ia a Iesu ke pihia foki. Ka e nakai fakafano mai e Iehova e Tama haana ke he lalolagi ke eke mo tagata kamuta. Kua fai gahua pauaki a ia ma haana ke taute, ti kua hoko tuai e magaaho ma Iesu ke kamata ai. Ke fakakite kua hau a ia mogonei ke taute e finagalo he Matua haana, ne ole a Iesu ki a Ioane ke papatiso a ia. Fiafia nakai e Atua ke he mena nei?

E fiafia, he magaaho ne hake mai a Iesu he vai, ko e leo mai he lagi ne pehē: ‘Ko e haku a tama fakahele hanā, kua fiafia na au kia ia.’ Na tuga kua hafagi e lagi ti hifo mai e lupe nei ki a Iesu. Ka e nakai ko e lupe mooli. Na tino mai tuga e lupe. Ka ko e agaga tapu mooli he Atua e mena ia.

Kua loga e mena ha Iesu mogonei ke manamanatu ki ai, ti fano a ia ke he matakavi tokanoa ke he 40 e aho. Ne hau a Satani ki a ia he matakavi ia. Lagatolu ne lali a Satani ke fakaohooho a Iesu ke taute taha mena ne totoko ke he tau fakatufono he Atua. Ka e nakai mahalo a Iesu ke taute pihia.

He mole e mena ia, ne liu atu a Iesu mo e feleveia mo e falu tagata ne eke mo tau tutaki fakamua haana. Ko e tau higoa he falu ia lautolu ko Aneterea, Peteru (fakahigoa foki ko Simona), Filipo mo Natanielu (ne fakahigoa foki ko Patolomaio). Ne o atu a Iesu mo e tau tutaki foou nei ke he magamotu ko Kalilaia. I Kalilaia ne tutū a lautolu he maaga ha Natanielu ko Kana. Ne fano a Iesu ke he galue lahi he fakamauaga i ai, ti taute e mana fakamua haana. Iloa nakai e koe e mana ia? Ne fakafaliu e ia e vai ke he uaina.