KO E aposetolo ko Peteru a nā ne tū, ti ko e falu he tau kapitiga haana i tua ia ia. Ka ko e ha kua fakaveli fakafohifo e tagata nā ki a Peteru? Lata nakai a ia ke taute e mena ia? Iloa nakai e koe ko hai a ia?

Ko e tagata ia ko Konelio. Ko ia ko e takitaki kautau Roma. Ne nakai iloa e Konelio a Peteru, ka kua tala age ki a ia ke uiina a Peteru ke he fale haana. O mai la ke kumikumi ko e tupu fēfē e mena nei.

Ko e tau tutaki fakamua ha Iesu ko e tau Iutaia, ka e nakai ko e Iutaia a Konelio. Ka kua fakaalofa a ia ke he Atua, liogi ki a ia, ti loga e tau mena mitaki haana ne taute ma e tau tagata. He taha afiafi ne hau e agelu ki a ia mo e pehē: ‘Kua fiafia e Atua ki a koe, mo e to tali e ia e tau liogi haau. Fakafano atu e falu tagata ke tamai e tagata ne higoa ko Peteru. Kua nofo a ia i Iopa he fale ha Simona he tapa tahi.’

He mogoia ni, ne fakafano atu e Konelio e falu tagata ke kumi a Peteru. He aho hake, mogo ne tata e tau tagata ki Iopa, ko Peteru haia i luga he tua fale ha Simona. I ai, ne omoomoi he Atua a Peteru ke manatu kua kitia e ia e ie lahi kua hifo mai he lagi. I luga he ie ko e tau vahega manu kehekehe oti. Hagaao ke he fakatufono he Atua, ko e tau manu nakai meā anei ke kai, ka kua pehē e leo: ‘Matike ā ma Peteru. Tamate ai mo e kai.’

‘Nakai!’ he tali e Peteru. ‘Ne nakai kai e au ha mena kua nakai meā.’ Ka kua tala age e leo ki a Peteru: ‘Aua neke ui kua nakai meā e tau mena ne talahau he Atua kua meā he mogonei.’ Lagatolu ne tupu e mena nei. He manamanatu agaia a Peteru ke he kakano he tau mena oti nei, ne hohoko mai e tau tagata ne fakafano mai e Konelio ke he fale ti ole ke kitia a Peteru.

Ne hifo a Peteru ke he poko i lalo ti pehē: ‘Ko au hanei kua kumi e mutolu. Ko e ha ne o mai a mutolu?’ Magaaho ne tala age he tau tagata ko e agelu ne tala age ki a Konelio ke uiina a Peteru ke he fale haana, ne talia e Peteru ke ō mo lautolu. He aho hake ne o atu a Peteru mo e tau kapitiga haana ke aahi a Konelio i Kaisaria.

Ne kua fakapotopoto mai e Konelio e tau magafaoa mo e tau kapitiga tata haana. Mogo ne hoko mai a Peteru, ne feleveia a Konelio mo ia. Ne fakaveli fakafōhifo a ia ke he tau hui a Peteru, tuga ne kitia e koe hinei. Ka kua pehē a Peteru: ‘Tū ki luga; ko au ni ko e tagata.’ E, kua fakakite mai he Tohi Tapu kua nakai hako ke fakaveli fakafohifo mo e tapuaki ke he tagata. Kua lata a tautolu ke tapuaki hokoia ni ki a Iehova.

Ne fakamatala a Peteru mogonei ki a lautolu kua fakapotopoto mai. ‘Kitia e au kua talia he Atua e tau tagata oti kana kua manako ke fekafekau ki a ia,’ he talahau e Peteru. He tutala agaia a ia, ne fakafano mai he Atua e agaaga tapu haana, ti kamata e tau tagata ke tutala ke he tau vagahau kehekehe. Ne ofomate e tau tutaki Iutaia ne o mai mo Peteru, ha kua manatu a lautolu na fiafia hokoia ni e Atua ke he tau Iutaia. Ti fakaako ai ki a lautolu ko e mena nakai mailoga he Atua, kua mua e mitaki po ke mua e aoga he taha lanu tagata ke he taha lanu tagata. Ko e mena mitaki nakai a ia ma tautolu oti ke manatu?