1 Ioane 1:1-10
1 KO e mena tali mai he kamataaga, ne fanogonogo ki ai a mautolu, ne kitekite ki ai e tau mata ha mautolu, ne mamata ki ai a mautolu, ne amoamo foki he tau lima ha mautolu, ke he Loko he moui;
2 Ne fakakite mai foki e moui, ne kitekite atu foki a mautolu, kua fakakite ai foki e mautolu kua talahau atu foki e mautolu kia mutolu e moui tukulagi, ko e moui ia ha he Matua, ka kua fakakite mai kia mautolu;)
3 Ko e mena ne kitekite ki ai a mautolu, mo e fanogonogo ki ai, kua talahau atu ai e mautolu kia mutolu, kia fakafetui a mutolu mo mautolu; ko mautolu foki kua fakafetui a mautolu mo e Matua, katoa mo e hana Tama ko Iesu Keriso.
4 Kua tohi atu foki e mautolu e tau mena nai kia mutolu, kia katoatoa ai ha mutolu a fiafia.
5 Ko e fekau a enei ne fanogonogo ai a mautolu kia ia, kua tala atu foki a mautolu kia mutolu, Ko e Atua, ko e maama a ia ti nakai toka ai ha pouli kia ia.
6 Kaeke ke tala age a tautolu, kua fakafetui a tautolu fakalataha mo ia, ka e eke e tautolu e tau mahani he pouli, kua pikopiko ai a tautolu, kua nakai eke foki e tautolu e mahani he kupu moli.
7 Kaeke kua eke e tautolu e tau mahani he maama, tuga he nofo a ia ke he maama, ati fakafetui ai fakalataha a tautolu, ko e taha ke he taha; ko e toto foki a Iesu Keriso hana Tama kua fakamea ai a tautolu he tau hala oti kana.
8 Kaeke ke pehe a tautolu, Nakai fai hala a tautolu, kua hehe tuai a tautolu kia tautolu, nakai nofo foki e kupu moli ki loto ia tautolu.
9 Kaeke ke fakakite e tau hala ha tautolu, kua fakamoli a ia mo e mahani tututonu ke fakamagalo ai e tau hala he tautolu, mo e fakamea a tautolu he tau mahani hepehepe oti kana.
10 Kaeke ke pehe a tautolu, Kua nakai fai hala a tautolu, ati eke ai e tautolu a ia mo pikopiko; nakai nofo foki hana kupu ki loto ia tautolu.