1 Korinito 1:1-31
1 KO au ko Paulo kua ui mai ke eke mo aposetolo a Iesu Keriso, ke he finagalo he Atua, katoa mo Sosene ko e matakainaga;
2 Ko e tohi ha maua hanai ke he ekalesia he Atua ha i Korinito, ko lautolu kua fakatapu e Keriso Iesu, kua ui mai ke eke mo tau tagata fakatapu, katoa mo lautolu oti kua ui atu ke he tau mena oti kana, ke he higoa a Iesu Keriso, ha tautolu a Iki ke he motu ha lautolu katoa mo tautolu.
3 Kia ha ha ia mutolu e fakaalofa noa mo e monuina mai he Atua ko e Matua ha tautolu, mo e Iki ko Iesu Keriso.
4 Kua fakaaue atu au ke he haku a Atua nakai noa ha ko mutolu, ha ko e fakaalofa noa he Atua kua foaki mai kia mutolu ha ia Keriso Iesu.
5 Ha kua fakamuhukoloa a mutolu ia ia ke he tau mena oti, ke he tau kupu oti mo e tau maama oti kana,
6 Tuga ne talahauaga kia Keriso kua fakamoli ai kia mutolu;
7 Ti kua nakai nonofogati ai a mutolu ke he taha mena fakaalofa noa, kua fakatalitali a mutolu ke he fakakiteaga he Iki ha tautolu ko Iesu Keriso;
8 Ko ia foki ke fakatumau a mutolu ato hohoko ke he fakahikuaga, kia nakai fai mena ke fakahala ai a mutolu ke he aho he Iki ha tautolu ko Iesu Keriso.
9 Kua fakamoli e Atua, ko ia kua ui mai kia mutolu kia fakafetui mo e Tama hana, ko Iesu Keriso ha tautolu a Iki.
10 Ko e tau matakainaga na e, kua ole atu au kia mutolu ke he higoa he Iki ha tautolu ko Iesu Keriso, kia taha ha mutolu a tau kupu oti kana, neke tupu ai e tau veveheaga kia mutolu; ka kia fakalataha a mutolu ke he loto taha mo e manatu taha.
11 Ha ko e mena kua fakailoa mai a mutolu, haku a tau matakainaga na e, kia au he falu he faoa a Kaloe, ha ha ia mutolu e taufetoko.
12 Ko e haku a kupu hanai, kua takitokotaha a mutolu mo e pehe, Ko au ha Paulo, Ko au ha Apolo, Ko au ha Kefa, Ko au ha Keriso.
13 Kua vevehe kia a Keriso? Ne fakasatauro kia a Paulo ke lukutoto aki a mutolu? Ne papatiso kia a mutolu ke he higoa a Paulo?
14 Kua fakaaue atu au ke he Atua he nakai papatiso e au taha ia mutolu, ka ko Keripo ni mo Kaio;
15 Neke pehe mai taha, Kua papatiso atu e au ke he haku a higoa.
16 Ne papatiso foki e au e magafaoa a Setefana; ka e nakai iloa e au po ke ne papatiso e au taha.
17 Ha ko e mena nakai fekau mai e Keriso au ke papatiso, ka kia fakamatala atu e vagahau mitaki; nakai ko e iloilo ke he kupu, neke uta e satauro a Keriso mo mena nakai aoga.
18 Ha ko e kupu ke he satauro ko e mena goagoa ia kia lautolu kua malaia; ka ko e malolo he Atua ia kia tautolu kua fakamomoui.
19 Ha ko e mena kua tohi, To fakaoti e au e iloilo he tau tagata iloilo, to eke foki e au e pulotu he tau tagata pulotu mo mena nakai aoga.
20 Ko fe e tagata iloilo? Ko fe e tagata tohi kupu? Ko fe e tagata taufetoko he lalolagi nai? Nakai kia eke he Atua e iloilo he lalolagi nai mo mena goagoa?
21 Ha ko e iloilo he Atua kua nakai iloa e Atua he lalolagi ke he iloilo ha lautolu, ti finagalo ai e Atua ke fakamomoui a lautolu kua tua ke he goagoa he fakamatalaaga.
22 Ha kua ole he tau tagata Iutaia e fakamailoga, ti kumi he tau tagata Heleni e iloilo.
23 Ha ko mautolu kua fakamatala atu e mautolu e Keriso kua fakasatauro ko e mena haia ke fakatupetupe ai e tau tagata lutaia, ka ko e mena goagoa ke he tau tagata Heleni;
24 Ka ko e tau tagata kua ui ki ai, ko e tau Iutaia katoa mo e tau Heleni, kua eke a Keriso mo malolo he Atua mo e iloilo he Atua kia lautolu.
25 Ha ko e goagoa he Atua kua mua hana iloilo ke he iloilo he tau tagata; ko e lolelole foki he Atua; kua mua hana malolo ke he malolo he tau tagata.
26 Ha kua iloa e mutolu e uiina ne ui mai ai a mutolu, ko e tau matakainaga na e, nakai tokologa e tau tagata pulotu ke he tau mena he tino kua uiina, nakai tokologa e tau tagata malolo, nakai tokologa e tau iki;
27 Ka kua fifili he Atua e tau mena goagoa he lalolagi ke fakama ai e tau tagata iloilo, mo e tau mena lolelole he lalolagi kua fifili he Atua ke fakama ai e tau mena malolo;
28 Mo e tau mena he tau lalo tagata, mo e tau mena fakateaga he lalolagi nai, katoa mo e tau mena nakai ha i ai, kua fifili he Atua ke fakaotioti ai e tau mena ha ha i ai;
29 Kia nakai fai mena ke hula ai ha tagata ki mua hana.
30 Ka kua tupu mai ia ia a mutolu ha ha i ai ia Keriso Iesu, ko ia kua eke ma tautolu ko e iloilo mai he Atua, ko e tututonu foki, mo e fakatapu, mo e fakamouiaga;
31 Kua tuga e kupu ne tohi, Ko ia kua hula kia hula a ia ke he Iki.