1 Korinito 12:1-31
12 HANAI, ko e tau matakainaga na e, kua loto au ke iloa ai e mutolu e tonu he tau mena fakaalofa he Agaga.
2 Kua iloa e mutolu ko e vaha ne eke a mutolu mo tau motu kehe, ti takitaki fano ai a mutolu ke he tau tupua nakai vagahau, tuga he takitaki fakahanoa e mutolu.
3 Ko e mena ia kua fakailoa atu ai e au kia mutolu, nakai fakai ha tagata kua vagahau ke he Agaga he Atua ke talahau e ia kua anetema a Iesu; ti nakai maeke foki ia taha ke talahaua ko Iesu ko e Iki, ka noa mo e Agaga Tapu.
4 Kua kehekehe e tau mena fakaalofa, ka e taha ni e Agaga;
5 Kua kehekehe foki e tau fekafekauaga, ka e taha ni e Iki;
6 Kua kehekehe foki e tau mana, ka e taha ni e Atua, ko ia kua gahua ke he tau mena oti ke he tau tagata oti kana.
7 Kua igatia e tagata mo e foaki ki ai e fakakiteaga he Agaga kia tupu ai e mitaki.
8 Ha kua foaki mai he Agaga ke he taha e kupu he iloilo; kia taha ko e kupu he maama, kua lata mo e Agaga gaia;
9 Kia taha, ko e talia fakatonu ke he Agaga gaia; kia taha, ko e tau mena fakaalofa ke fakamalolo aki e tau gagao ke he Agaga gaia;
10 Kia taha ke eke mana; kia taha, ke perofeta; kia taha, ke mailoga agaga; kia taha, ko e tau vagahau kehekehe; kia taha, ke fakamatala e tau vagahau.
11 Kua gahua ni e tau mena oti ia ke he Agaga taha ia ni, kua tufatufa ke he tau tagata kia igatia mo e hana mena, tuga e finagalo ki ai a ia.
12 Ha kua tuga e tino, ne taha a ia, mo e loga hana tau fahi tino, ka e pete ni kua loga e tau fahi tino, ko e tino taha ia; kua pihia foki a Keriso.
13 Ha ko e mena tokotaha foki e Agaga kua papatiso ai a tautolu oti ke he tino taha, po ke tau tagata Iutaia, po ke tau tagata Heleni, po ke tau tupa, po ke tau tagata toka noa; mo e fakainu foki a tautolu oti ke he Agaga tokotaha.
14 Ha ko e tino foki, nakai ko e fahi tino taha ia, ka ko e tau fahi tino loga.
15 Kaeke ke pehe mai e hui, Ha ko e mena nakai ko e lima au, nakai ha he tino au; ko e moli kia kua nakai ha he tino a ia?
16 Kaeke ke pehe mai e teliga, Ha ko e mena nakai ko e mata au, nakai ha he tino au; ko e moli kia, kua nakai ha he tino a ia?
17 Kane mai ko e mata hokoia e tino oti, to fanogonogo fefe? Kaeke ko e fanogonogo hokoia e tino oti, to hohogi fefe?
18 Ka ko e hanai, kua toka he Atua e tau fahi tino takitaha ke he tino, tuga e finagalo ki ai a ia.
19 Kane mai ko e fahi tino taha e tau mena oti ia, to fefe e tino?
20 Hanai, kua loga e tau fahi tino, ka e taha ni e tino.
21 Nakai maeke foki ke he mata ke tala age ke he lima, Nakai aoga a koe kia au; ti nakai maeke foki ke he ulu ke tala age ke he tau hui, Nakai aoga a mua kia au.
22 Ka ko e tau fahi tino kua talahaua kua lolelole, kua mua ha lautolu a aoga;
23 Mo e tau fahi tino kua talahaua e tautolu kua kelea, kua au atu he eke fakamitaki ai; ti homo ai e mitaki he tau mena kua talahaua kua kelea.
24 Ka kua nakai nofogati e tau fahi tino ha tautolu kua talahaua kua mitaki; kua fakalata foki he Atua e tino katoa, kua au atu foki e mitaki kua age e ia ke he tau fahi tino kua lolelole,
25 Kia nakai ha i ai ke he tino e feveheaki, ka kia feleoleoaki e tau fahi tino oti kana.
26 Kaeke foki ke mamahi e taha fahi tino, ti mamahi fakalataha ai e tau fahi tino oti; ka nava ke he taha fahi tino, ti fiafia fakalataha ai e tau fahi tino oti.
27 Ka ko mutolu, ko e tino a Keriso a mutolu, mo e tau fahi tino takitokotaha.
28 Kua fakatu foki he Atua ke he ekalesia, fakamua ko e tau aposetolo, ko e ua e tau perofeta, ko e tolu e tau akoako, ti tutaki ai a lautolu, kua eke mana mo e tau mena fakaalofa ke fakamalolo aki e tau gagao, ko e tau lagomatai, ko e tau takitaki, ko e tau vagahau kehekehe.
29 Ko e tau aposetolo oti kia? ko e tau perofeta oti kia? ko e tau akoako oti kia? ko lautolu kua eke mana oti kia?
30 Kua igatia oti kia mo e tau mena fakaalofa ke fakamalolo aki e tau gagao? kua vagahau oti kia ke he tau vagahau kehekehe? kua fakamatala oti kia?
31 Kia foli a mutolu ke he tau mena fakaalofa kua mua; ka e fakakite e au kia mutolu e puhala kua mua he mitaki.