1 Korinito 14:1-40
14 KIA kumi fakamakutu a mutolu e fakaalofa; kia foli foki ke he tau mena fakaalofa he Agaga, ka e mua ni kia perofeta ai a mutolu.
2 Ha ko ia kua vagahau ke he vagahau kehe, nakai vagahau a ia ke he tau tagata, ka ko e Atua ni; ha ko e mena nakai logona e taha, ka e vagahau a ia ke he Agaga ke he tau mena galo;
3 Ka ko ia kua perofeta age kua vagahau a ia ke he tau tagata kia fakamafana ai, mo e lagomatai ai, mo e tomatoma ai.
4 Ko ia kua vagahau ke he vagahau kehe, kua fakamafana e ia a ia; ka ko ia kua perofeta age, kua fakamafana e ia e ekalesia.
5 Kua loto au kia vagahau a mutolu oti ke he tau vagahau kehekehe, ka e au atu ni e loto kia perofeta age a mutolu; nukua mua a ia kua perofeta kia ia kua vagahau ke he tau vagahau kehekehe, kaeke ke nakai fakamatala e ia kia moua he ekalesia e fakamafanatia.
6 Hanai, ko e tau matakainaga na e, kaeke ke fina atu au kia mutolu mo e vagahau ke he tau vagahau kehekehe, to aoga ha ha au kia mutolu, kaeke ke nakai vagahau atu kia mutolu ke he fakakiteaga, po ke maama, po ke perofetaaga, poke fakaako atu?
7 Kua pihia foki e tau mena nakai moui kua fakatagi mai, po ke kofe, po ke kitara, kaeke ke nakai mailoga e tau leo, to iloa fefe kia e mena kua fakatagi mai, po ke tā mai ke he kitara?
8 Ha ko e mena kaeke ke nakai mailoga e leo he pu, ko hai kia ke taute ke he tau?
9 Kua pihia foki a mutolu, kaeke ke nakai vagahau atu ke he tau alelo ha mutolu e tau kupu maama, to iloa fefe e kupu kua fakamata la ai? ha ko e mena vagahau atu a mutolu ke he pulagi.
10 Ligaliga loga e tau leo ke he lalolagi, ka e igatia a lautolu mo e hana kakano.
11 Hanai, kaeke kua nakai iloa e au e kakano he leo, ti eke au mo tagata he motu kehe kia ia kua vagahau mai; kua eke foki a ia kua vagahau mai mo tagata he motu kehe kia au.
12 Kia pihia foki a mutolu, ha ha ne foli ke he tau mena fakaalofa he agaga, kia kumi ai e mutolu ke loga ai, kia fakamafanatia ai e ekalesia.
13 Ko e hanai, ko ia kua vagahau ke he vagahau kehe, kia liogi a ia kia maeke ia ia ke fakamatala ai.
14 Ha ko e mena kaeke ke liogi au ke he vagahau kehe, kua liogi haku a agaga, ka kua teao haku a manamanatu,
15 Ti kua fefe kia? To liogi foki au ke he agaga, ti liogi foki au ke he manamanatu; to lologo au ke he agaga, ti lologo foki ke he manamanatu.
16 Ka nakai pihia, ka fakaaue a koe ke he agaga po ke maeke fefe ia ia kua nofo ke he mena kua nofo ai e tagata goagoa ke amene mai ke he hau a fakaaue, ka kua nakai logona e ia hau a tau kupu?
17 Ha kua fakaaue fakamitaki a koe, ka e nakai fakamafanatia e taha.
18 Kua fakaaue au ke he haku a Atua, he mua haku a vagahau ke he tau vagahau kehekehe kia mutolu oti kana;
19 Ka e mitaki kia au ke vagahau ke he ekalesia e tau kupu ne lima mo e haku a manamanatu, kia fakaako ai e falu, ka e kelea kia au ke vagahau e tau kupu afe mo afe ke he vagahau kehe.
20 Ko e tau matakainaga na e, ua eke a mutolu mo tau tama iki ke he manamanatu; ka e eke a mutolu mo tau tama mukemuke ke he kelea, ka kia eke mo tau tagata lalahi ke he manamanatu.
21 Kua tohi ke he fakatufono, Kua pehe mai e Iki, To vagahau atu au ke he motu nai ke he tau vagahau kehe mo e tau laugutu kehe; ka e pete ni he pihia, nakai fanogonogo mai a lautolu kia au.
22 Hanai, ko e tau vagahau kehekehe ko e fakamailoga ia, nakai kia lautolu kua tua, ka ko lautolu kua nakai tua; ka ko e perofeta age, ko e fakamailoga ia ma lautolu kua tua, ka e nakai ko lautolu kua nakai tua.
23 Kaeke foki ke fakapotopoto e ekalesia oti ke he mena taha, mo e vagavagahau kehekehe a lautolu oti, ka huhū mai e falu kua goagoa, po ke falu kua nakai tua, nakai kia talahau e lautolu kua heketia a mutolu?
24 Kaeke ke perofeta mai oti, ti hu mai ai taha kua nakai tua, po ke taha kua goagoa kua fakailoa a ia e lautolu ke he hala, kua fakafili a ia e lautolu oti,
25 Ati maliali mai e tau mena galo he hana loto, ti fakaveli ai a ia mo e hufeilo ke he Atua, mo e tala age, ko e moli ha ha ia mutolu e Atua.
26 Hanai, ko e tau matakainaga na e, po ke fefe? Ka fakapotopoto mai a mutolu, ti igatia a mutolu mo e salamo, po ke fakaakoaga, po ke vagahau kehe, po ke fakakiteaga, po ke fakamatalaaga; kia eke e tau mena oti kia tupu ai e fakamafanaaga.
27 Kaeke ke vagahau taha ke he vagahau kehe, kia fakahiku ke he tokoua po ke tokotolu, kua fetogiaki; ti fakamatala ai e taha.
28 Kaeke foki nakai ha i ai taha ke fakamatala, aua neke vagahau a ia ke he ekalesia, ka kia vagahau a ia kia ia ni katoa mo e Atua.
29 Kia vagahau e tokoua a perofeta po ke tokotolu, ka e fakafili e falu.
30 Kaeke kua fakakite mai ha mena kia taha kua nofo mai, kia fakanono e tagata fakamua.
31 Ha kua maeke ia mutolu oti ke perofeta takitokotaha, kia fakaako ai a mutolu oti, kia fakamafanatia foki a mutolu oti.
32 Kua omaoma foki e tau agaga he tau perofeta ke he tau perofeta.
33 Ha ko e Atua nakai ko e Atua ha i ai e fakaagitau, ka ko e mafola; pihia mo e tau ekalesia oti he tau tagata kua fakatapu.
34 Kia fakafenono e tau fifine ha mutolu ke he tau ekalesia; ha ko e mena nakai tuku atu kia lautolu ke vagahau; ka kia omaoma a lautolu, kua pihia mai foki e poaki mai he fakatufono.
35 Kaeke foki kua fia iloa e lautolu ha mena, kia huhu age ai a lautolu ke he tau tane ha lautolu ke he tau fale ha lautolu; ha ko e mena nakai gali ke vagahau e fifine ke he ekalesia.
36 Ne fina atu kia e kupu he Atua mai ia mutolu? po ko mutolu hoko mutolu kia ne hohoko e kupu he Atua ki ai?
37 Kaeke kua talahaua taha ko e perofeta a ia, po ke tagata ha i ai e Agaga, kia iloa mitaki e ia ko e tau mena kua tohi atu nai e au kia mutolu, ko e tau poaki haia he Iki.
38 Kaeke kua nakai iloa e taha tagata, kia toka a ia ke nakai iloa.
39 Ko e hanai, ko e tau matakainaga na e, kia foli a mutolu ke perofeta; aua foki neke hataki ke vagahau ke he tau vagahau kehekehe.
40 Kia eke e tau mena oti mo e fulufuluola mo e taute fakamitaki.