1 Korinito 4:1-21
4 KIA manatu pehe e tau tagata kia mautolu, ko e tau fekafekau a Keriso, ko e tau fekafekau foki kua toka ki ai e tau mena galo he Atua.
2 Hanai, kua lata mo e tau fekafekau kua toka ki ai e tau mena, kia takitokotaha mo e fakamoli.
3 Ka ko e mena tote ni kia au ke fakafili mai a mutolu kia au, po ke fakafiliaga he tau tagata; kua nakai fakafili foki e au a au.
4 Ha ko e mena nakai iloa hifo e au ke he hoku loto ha mena hehe, ka e nakai talahaua tututonu au he mena ia; ka ko ia kua fakafili mai au ko e Iki haia.
5 Hanai, aua neke fakafili e mutolu ha mena ka nakaila hoko ke he vaha, ato haele mai e Iki, ko ia ke fakamaama mai e tau mena galo he pouli, ke fakakite mai foki e tau fifiliaga he tau loto; ti moua ai foki takitokotaha e talahauaga mitaki mai he Atua.
6 Ko e tau matakainaga na e, kua fakalatalata e au e tau mena ia kia maua mo Apolo ha ko mutolu, kia ako ai a mutolu kia maua; kia nakai mua ha mutolu a manatu ke he mena kua tohi, kia nakai fakaikaluga a mutolu ha ko e taha, ka e totoko ke he taha.
7 Ha ko hai kia kua eke a koe mo tagata kehe? Ko e heigoa foki e mena ha ha ia koe kua nakai foaki atu ai? Kaeke foki kua foaki atu kia koe, ti ko e heigoa e mena kua hula ai a koe tuga e mena kua nakai foaki atu ni?
8 Kua makona tuai ainei a mutolu, kua maukoloa tuai ainei a mutolu, kua uta a mutolu mo tau patuiki ka e nakai ha i ai a mautolu; kane mai ko e tau patuiki a mutolu po kua mitaki ni kia au, kia uta foki a mautolu mo tau patuiki fakalataha mo mutolu.
9 Nukua manatu au kua fakakite fakamui atu he Atua a mautolu ko e tau aposetolo po ke tau tagata kua kotofa ke mamate; ha kua eke a mautolu mo kitekiteaga ke he lalolagi, ko e tau agelu katoa mo e tau tagata.
10 Kua goagoa a mautolu ha ko Keriso, ka ko mutolu kua iloilo a mutolu kia Keriso; kua lolelole a mautolu, ka ko mutolu kua malolo a mutolu; kua lilifu a mutolu, ka ko mautolu kua fakakelea a mautolu.
11 Kua hoko mai ni ke he magaaho nai kua fia kai a mautolu, to fia inu, to nakai fai felevehi, to tatuki to hekepefano;
12 Ha ne tukumate a mautolu he gahua ke he tau lima ha mautolu; kua eke fakakelea mai a mautolu, kua fakamonuina atu e mautolu; kua favale mai kia mautolu, kua fakamanavalahi a mautolu;
13 Kua tauamuamu kia mautolu, kua olelalo atu a mautolu; kua eke a mautolu mo tau otaota he lalolagi, ko e tau efuefu foki he tau mena oti kana, kua hoko ni ke he aho nai.
14 Nakai tohi atu au e tau mena nai kia mutolu ke fakama aki a mutolu, ka kia tomatoma atu kia mutolu ko e haku a tau fanau fakahelehele.
15 Ha ko e mena pete ni he hogofulu e afe ha mutolu a tau takitaki tama ha ha ia Keriso, ka e nakai tokologa e tau matua tane ha mutolu; nukua fanau e au a mutolu kia Keriso Iesu ke he vagahau mitaki.
16 Ko e mena ia kua ole atu ai au kia mutolu ke fifitaki mai kia au.
17 Ko e mena ia kua fekau atu ai e au a Timoteo kia mutolu, ko e haku a tama fakahele haia, mo e fakamoli ke he gahua he Iki, to fakamanatu e ia a mutolu ke he haku a mahani ke he tau kupu a Keriso, tuga he fakaako atu au ke he tau mena oti ke he tau ekalesia oti.
18 Ka kua fakaikaluga e falu, tuga ne mena nakai fina atu au kia mutolu.
19 Ka e fina atu vave au kia mutolu ka finagalo e Iki ki ai; ti iloa ai e au nakai ko e tau kupu, ka ko e malolo ha lautolu kua fakaikaluga.
20 Ha ko e kautu he Atua nakai ha i ai ke he tau kupu, ka ko e malolo.
21 Kua loto a mutolu ke ha? Ke fina atu kia au kia mutolu mo e fahi, po ke fakaalofa mo e loto totonu?