1 Korinito 7:1-40
7 KA ko e tau mena ne tohi mai ai e mutolu kia au, kua mitaki ka nakai piki e tagata ke he fifine;
2 Ka ko e feuaki, kia igatia e tane mo e hana hoana, kia igatia foki e fifine mo e hana tane.
3 Kia uta he tane ke he hoana e mahani mitaki kua lata, kia pihia foki e hoana ke he tane.
4 Nakai pule e hoana ke he hana tino ni, ka ko e tane; ti pihia foki e tane, kua nakai pule a ia ke he hana tino ni, ka ko e hoana.
5 Aua neke totoko e taha ke he taha, ka ko e tau aho gahoa hokoia ka loto fakalataha ki ai a mua, kia hagao atu a mua ke he fakakanopogi mo e liogi; ti liu foki fakalataha a mua, neke kamatamata e Satani a mua he nakai fahia a mua he fakauka ai.
6 Kua tala atu e au e mena ia ke pule ai a mutolu, ka e nakai ko e poaki.
7 Ka ko e haku a loto kia tuga na au e tau tagata oti kana; ka e igatia mo e hana mena fakaalofa noa kua moua mai he Atua, ko e taha mena ke he taha tagata mo e taha mena ke he taha tagata.
8 Ko e haku a kupu hanai kia lautolu kua nonofo noa katoa mo e tau fifine takape, kua mitaki ka nonofo pihia a lautolu tuga au nai.
9 Kaeke kua nakai maeke ia lautolu ke fakauka, kia fai hoana mo e fai tane a lautolu, nukua mitaki ke fai hoana, ka e kelea he vela.
10 Kua tala atu foki au kia lautolu kua fai hoana mo e fai tane, ka e nakai ko au, ka ko e Iki, Aua neke fano kehe e hoana mo e hana tane,
11 Kaeke foki kua fano kehe, kia nofo noa pihia a ia po ke fakafeilo mo e hana tane; aua foki neke mavehe e tane mo e hana hoana ni.
12 Ka ko lautolu kua toe ko e haku a kupu nai kia lautolu, ka e nakai ko e Iki; kaeke ke ha ha ia taha matakainaga e hoana kua nakai tua, kua loto ke nonofo mo ia, aua neke mavehe mo ia.
13 Ko e fifine foki, kaeke ke ha i ai e tane kua nakai tua kua loto ke nonofo mo ia, aua neke mavehe a ia mo ia.
14 Ha kua fakatapu he hoana e tane kua nakai tua; kua fakatapu foki he tane e hoana kua nakai tua; ane mai nakai pihia po kua kelea ha mutolu a tau fanau; ka ko e ainei, kua tapu a lautolu.
15 Kaeke ke fano kehe a ia kua nakai tua, kia toka a ia ke fano kehe ai. Nakai fakatupa e matakainaga po ke mahakitaga ka pihia; ka kua ui a tautolu he Atua kia mafola ai.
16 Ha kua iloa fefe e koe ko e hoana, to moui hāu a tane kia koe? Ko koe foki, ko e tane, kua iloa fefe a koe to moui e hoana hāu kia koe?
17 Ka kia takitokotaha mo e mahani tuga e tufatufa mai he Atua kia ia; kia takitokotaha mo e mahani tuga e ui a ia he Iki. Kua pihia foki haku a fakatonu atu ke he tau ekalesia oti.
18 Kaeke kua peritome taha kua ui ki ai, aua neke eke a ia mo tagata nakai peritome; kaeke kua nakai peritome e taha kua ui ki ai, aua neke peritome a ia.
19 Ko e mena noa e peritome, ko e mena noa foki e nakai peritome, ka ko e omaoma ke he tau poaki he Atua kua mitaki ia.
20 Kia takitokotaha mo e nofo mau ke he mena ne nofo ai ka kua ui kia ia.
21 Kua ui kia a koe ka ko e tupa? Aua neke manatu ki ai; kaeke kua maeke ke moua e tokanoaaga, kia eke la, ti mitaki ai.
22 Ha ko ia, ko e tupa, kua ui he Iki, ko e tagata toka noa he Iki a ia; kua pihia foki a ia, ko e tagata toka noa, kua ui ki ai, ko e tupa a ia a Keriso.
23 Kua fakafua a mutolu ke he totogi, aua neke eke a mutolu mo tau tupa ke he tau tagata.
24 Ko e tau matakainaga na e, kia takitokotaha mo e nofo mau ki mua he Atua ke he mena ne ui ai a ia.
25 Ka ko e tau tamafine tote, nakai moua e au ha poaki mai he Iki kia lautolu; ka kua tala atu e au haku a taofi, ko au foki kua ofania he Iki ke fakamoli ai.
26 Hanai, ko e haku a taofi kua mitaki e mena ia ha ko e matematekelea he vaha nai, kua mitaki ke nofo pihia e tagata.
27 Kua fakamau kia a koe ke he hoana? ua kumi e koe ke vevete; kua noa kia a koe mo e hoana? ua kumi hoana a koe.
28 Kaeke kua fai hoana tuai a koe, nakai hala ai a koe; kaeke foki kua fai tane e tamafine tote nakai hala ai a ia; ka e moua a lautolu kua pihia he matematekelea ke he tino. Ka e nakai fia fakamamafa atu au kia mutolu.
29 Ka ko e haku a tala atu nai, ko e tau matakainaga na e, kua gahoa e tau aho kua toe kia tuga he nakai fai hoana, a lautolu kua fai hoana;
30 Ko lautolu kua tagi tuga he nakai tagi; ko lautolu kua fiafia tuga he nakai fiafia; ko lautolu kua fakafua tuga he nakai fai mena;
31 Ko lautolu kua toto e tau mena he lalolagi nai tuga he nakai toto fakalahi ki ai; ha ko e mena mole atu e mahani he lalolagi nai.
32 Kua loto au kia noa a mutolu mo e fakaatukehe. Kua fakaatukehe a ia kua nakai fai hoana ke he tau mena he Iki, po ke fakafiafia fefe a ia ke he Iki;
33 Ka ko ia kua fai hoana kua fakaatukehe a ia ke he tau mena he lalolagi, po ke fakafiafia fefe e ia hana hoana.
34 Kua kehe foki e fifine fai tane, mo e tamāfine tote; kua fakaatukehe a ia kua nofo noa ke he tau mena he Iki, kia tapu ai a ia, ko e tino katoa mo e agaga; ka ko ia kua fai tane kua fakaatukehe ke he tau mena he lalolagi, po ke fakafiafia fefe hana tane.
35 Kua tala atu e au e tau kupu nai kia mutolu kia aoga ai kia mutolu; nakai ke liti ai e au e matahele kia mutolu, ka kia fulufuluola ai, kia fekafekau fakamitaki ke he Iki mo e loto nakai fakalavelave.
36 Kaeke kua manatu taha kua mahani fuafuakelea ke he tamafine hana, ka lahi tuai a ia, mo e mena aoga foki ke pihia kia eke a e ia e mena kua loto ki ai, nakai hala ai a ia, kia fakalataha a laua mo e hana tane.
37 Ka ko ia kua mau hana loto, ka nakai fai mena ke lekua ai, ti ha ha ia ia e pule ke he hana loto, mo e mau e manatu he hana loto ke he mena nai ke taofi ai hana tamāfine tote, kua mitaki hana mena kua eke.
38 Hanai, ko ia kua fakafaitane hana tama fifine kua mitaki hana mena kua eke, ka ko ia kua nakai fakafaitane a ia kua mua e mitaki he hana mena kua eke.
39 Kua lili e fifine ke he fakatufono he moui hana tane; kaeke kua mate hana tane, ti toka noa ai a ia ke fakalataha mo e tane kua loto ki ai, ka kia lata mo e Iki.
40 Kaeke ke nofo noa pihia a ia, kua mua hana monuina, ko e taofi haku haia; kua manatu foki au ha ha ia au e Agaga he Atua.