1 Korinito 9:1-27
9 NAKAI kia ko e aposetolo au? nakai kia toka noa au? nakai kia kitia e au a Iesu Keriso ha tautolu a Iki? nakai kia ko e haku a gahua a mutolu ke he Iki?
2 Kaeke nakai ko e aposetolo au ke he fala tagata, ko e aposetolo ni au kia mutolu; ha ko mutolu ko e fakamoli haia he haku a aposetolo ke he Iki.
3 Ko e haku a fakatonu atu haia kia lautolu kua fakafili mai kia au.
4 Nakai kia pule a mautolu ke kai mena mo e inu?
5 Nakai kia pule a mautolu po ke takitaki fano e mahakitaga, ko e hoana, tuga e tau aposetolo oti, mo e tau matakainaga he Iki, mo Kefa?
6 Po ko maua mo Panapa hoko maua kia kua nakai pule ke toka ai e tau gahua ke he tau mena he tino?
7 Ko hai kua fano ke tau, ka e totogi ne ia a ia? Ko hai kia kua eke e ulu vine, ka e nakai kai hana tau fua? Po ko hai kua leveki e fuifui mamoe, ka e nakai kai e puke huhu he fuifui?
8 Kua vagahau atu kia e au e tau mena nai ke he tau kupu he tau tagata? ka e nakai kia pihia mai foki e fakatufono ke he tau mena nai?
9 Ha ko e mena tohi mai ke he fakatufono a Mose, Ua lili e koe e gutu he povi ka kua taholi e ia e tau saito. Ko e tau povi kia kua manatu e Atua ki ai?
10 Po ke talahau pihia kia e ia ha ko tautolu ni? Ha ko tautolu ni kua tohi mai ai, ha kua lata kia ia kua keli e kelekele ke keli ai mo e amaamanaki, ko ia foki kua taholi saito, kia taholi ai mo e amaamanaki, kia moua e ia e mena kua amaamanaki ki ai.
11 Kaeke kua gana atu e mautolu e tau mena ke lata mo e tau agaga kia mutolu, ko e mena lahi kia kaeke ke helehele mai e mautolu, ha mutolu a tau mena ke lata mo e tau tino?
12 Kaeke kua pule e falu kia mutolu nakai pule a mautolu he ha? ka e nakai eke e mautolu e pule ia; ka kua fakauka a mautolu ke he tau mena oti neke tuku atu e mautolu ha mena ke fakalavelave ai e vagahau mitaki kia Keriso.
13 Nakai kia iloa e mutolu, ko lautolu kua gahua ke he tau mena tapu kua kai e lautolu e tau mena mai he faituga? ko lautolu foki kua fekafekau ke he fatapoa kua fai tufaaga a lautolu fakalataha mo e fatapoa?
14 Kua pihia foki e poaki mai e Iki kia lautolu kua fakamatala e vagahau mitaki, kia moua e lautolu e tau mena he tino ke he fakamatalaaga he vagahau mitaki.
15 Ka e nakai eke au e taha mena he tau mena na, ti nakai tohi atu au ke he tau mena na kia eke pihia kia au; ha ko e mena mitaki kia au ke mate, ka e kelea ke fakaoti e taha haku a hula.
16 Ha ko e mena kaeke kua fakamatala atu e au e vagahau mitaki, nakai fai mena au ke hula ki ai, nukua nakai ha ha ia au e pule ke he mena ia; oi fakaalofa foki kia au, kaeke ke nakai fakamatala e au e vagahau mitaki.
17 Ha ko e mena kaeke kua eke e au e mena mo e loto ia, kua ha ha ia au e totogi; kaeke kua nakai eke mo e loto kua tuku mai kia au ke eke mo fekafekau ke he tanakiaga mena.
18 Haia, ko heinoa kia haku a totogi? Ko e hanei, ka fakamatala atu e au e vagahau mitaki, ke ta atu e au e vagahau mitaki a Keriso mo e nakai taui mai; kia nakai eke foki au haku a pule ke he vagahau mitaki.
19 Ha kua toka noa au he tau tagata oti, ti fakatupa ne au a au ke he tau tagata oti, kia au atu ai he tokologa ke moua e au.
20 Kua eke au mo tagata Iutaia ke he tau tagata Iutaia, kia moua e au e tau tagata lutaia; kua eke foki au mo tagata kua nofo mo e fakatufono kia lautolu kua nonofo mo e fakatufono, kia moua e au a lautolu kua nonofo mo e fakatufono;
21 Kua eke au mo tagata kua noa mo e fakatufono kia lautolu kua noa mo e fakatufono, (ka e nakai noa au mo e fakatufono ke he Atua, ka kua nofo mo e fakatufono kia Keriso,) kia moua e au a lautolu kua noa mo e fakatufono.
22 Kua eke au mo tagata lolelole kia lautolu kua lolelole, kia moua e au a lautolu kua lolelole; kua eke au mo tau mena oti ke he tau tagata oti kia momoui ai ni falu kia au.
23 Kua eke foki e au e mena nai ha ko e vagahau mitaki kia igatia fakalataha a tautolu mo au.
24 Nakai kia iloa e mutolu ko lautolu kua poitufi ke he male, kua poitufi oti ni, ka e tokotaha ni kua moua e palepale? Kia pihia ha mutolu a tafepoi, kia moua e mutolu.
25 Takitokotaha a lautolu kua laga ke he male mo e fakauka ke he tau mena oti, kua eke pihia e lautolu ke moua e lautolu e foufou popo vave, ka ko tautolu ke moua e foufou nakai tuai popo.
26 Ko au nai foki, kua poi pihia au, nakai fakahaupo; kua tau pihia au, nakai tuga e taumoto ke he matagi.
27 Ka kua tatuki e au hoku tino mo e fakatupa a ia, neke iloa a au kua tiaki, ko au kua fakamatala atu ke he falu a tagata.