1 Nofoaga he Tau Patuiki 10:1-14
10 NE tau e tau tagata Filisitia mo Isaraela; ti fehola e tau tagata Isaraela ki mua he tau tagata Filisitia; ne veveli a lautolu mo e tuina ai a lautolu ke he mouga ko Kilepoa.
2 Ti tutuli fakalahi he tau tagata Filisitia a Saulo mo e hana tau tama tane; ti keli ai he tau tagata Filisitia a Ionatana, mo Apinatapu, mo Makisua, ko e tau tama a Saulo.
3 Ne mamafa e tau kia Saulo, ne moua atu a ia he tau fana he tau tagata fana, ne tuina lahi a ia he tau fana he tau tagata fana.
4 Ti pehe age a Saulo ke he hana hoa, Kia aki e koe hau a pelu, mo e hoka aki e koe au; neke hohoko mai e tau tagata nakai peritome na, mo e eke fakakelea mai e lautolu kia au; ka e nakai mafai hana hoa he matakutaku lahi a ia; to toto e Saulo e pelu mo e fakaveli ai ki luga hana.
5 Ne kitia he hoa hana kua mate a Saulo, ti fakaveli foki a ia ki luga he pelu, ti mate ai a ia.
6 Ti mamate ai a Saulo mo e hana tau tama tane tokotolu, mo e hana magafaoa oti ne mamate fakalataha.
7 Ne kitia he tau tagata Isaraela oti ha ha i ai ke he pahua, kua fehola a lautolu, kua mamate foki a Saulo mo e hana tau tama tane; ti tiaki e lautolu e tau maga ha lautolu mo e fehola a lautolu; ti o mai e tau tagata Filisitia mo e nonofo ai.
8 Kua hoko ke he aho a pogipogi ti o age e tau tagata Filisitia ke akiaki e tau tapulu ha lautolu kua keli; ti moua ai e lautolu a Saulo mo e hana tau tama tane kua takaveli ai ke he mouga ko Kilepoa.
9 Ne aki ai e lautolu hana tau tapulu, ti uta e lautolu hana ulu mo e hana tau kanavaakau; ti fakafano atu ai e lautolu ke he motu he tau tagata Filisitia ke uta takai ai, ke fakamatala ai ke he tau tupua ha lautolu, katoa mo e motu.
10 Ti tuku e lautolu hana tau tapulu ke he fale he atua ha lautolu, mo e fakamau ai e lautolu hana gati ulu ke he fale a Takono.
11 Kua logona he tau tagata Iapesa-Kiliata oti e tau mena oti ne eke he tau tagata Filisitia kia Saulo,
12 Ti mamatike ai e tau tagata malolo oti, mo e uta e lautolu e tino a Saulo, mo e tau tino he hana tau tama tane, mo e ta mai ai ki Iapesa, ti tanu ai e lautolu ha lautolu a tau hui atua, i lalo he tapeneto i Iapesa, mo e fakakanopogi po fitu ai a lautolu.
13 Ne mate a Saulo ha ko e hana holifono ne holifono ai a ia kia Iehova, ko e kupu a Iehova nakai ni omaoma a ia ki ai, ne huhu atu foki a ia ke he taha ne ha i ai e agaga talahau tuai, ke kumi ki ai.
14 Ka e nakai kumi a ia kia Iehova, ko e mena ia ne keli e ia a ia; mo e liliu atu ai e kautu kia Tavita ko e tama a Iese.