1 Nofoaga he Tau Patuiki 12:1-40
12 KO lautolu hanai ne o age kia Tavita ki Tikelaka he nofo ai a ia ha ko Saulo ko e tama a Kiso; ko e tau toa a lautolu ko e tau tagata ne lagomatai he tau.
2 Ha ha ia lautolu e tau kaufana, ne liti e lautolu e tau maka, mo e fana e lautolu e tau fana ke he tau kaufana, ke he lima matau katoa mo e lima hema. Ko e falu ia he tau matakainaga a Saulo, ko e tau tagata Peniamina a lautolu.
3 Ko Aisera ko e tui ne mua a ia, mo Ioasa ko e tau tama a Semi ko e tagata Kipea; mo Iesielu, mo Peleta, ko e tau tama a Asemaveta; mo Peraka, mo Iehu ko e tagata Anatota.
4 Ko Isemaia ko e tagata Kipeona, ko e tagata malolo a ia he tokotolugofulu, ne pule foki a ia ke he tokotolugofulu, mo Ieremia, mo Iahasielu, mo Iokana, mo Iehosapa ko e tagata Ketere,
5 Ko Elusai, mo Ierimoto, mo Pealia, mo Semaraia, mo Sefataia, ko e tagata Harufi,
6 Ko Elekana, mo Isea, mo Asareelu, mo Ioesera, mo Iasapama ko e tau tagata Koru;
7 Ko Ioela, mo Sepatia, ko e tau tama a Ierohama i Ketori,
8 Ne vevehe mai he tau tagata Kato kia Tavita ke he taue ke he vao, ko e tau toa malolo ko e tau tagata kua tauteute ke tau, kua mahani a lautolu mo e akau pāpā mo e tao; ko e tau mata ha lautolu foki kua tuga ne tau mata he tau leona, ne mafiti lahi foki a lautolu po ke tau sevi he tau mouga;
9 Ko Esera ko e tagata ne mua, ko Opetaia ne tokoua aki, ko Eliapo ne tokotolu aki,
10 Ko Misemana ne tokofa aki, ko Ieremia ne toko lima aki,
11 Ko Atai ne tokoono aki, ko Elielu ne tokofitu aki,
12 Ko Iohanana ne tokovalu aki, ko Elesapata ne tokohiva aki,
13 Ko Ieremia ne tokohogofulu aki, ko Makapanai ne tokohogofulu ma taha aki.
14 Ko e tau tagata hanā he fanau a Kato ne eke mo tau takitaki kau; ko ia ne tote ia lautolu ne lata a ia mo e taha teau e tagata, ka ko ia ne mua ia lautolu ne lata a ia mo e taha afe tagata.
15 Ko lautolu na ne o ke he fahi atu a Ioritana ke he mahina fakamua he tau he lofia hana tau kauvai oti; ti tutuli kehe e lautolu a lautolu oti kua nonofo he tau pahua, ko lautolu ha ha he faahi uta katoa mo lautolu ha ha he faahi lalo.
16 Ne o mai foki falu he fanau a Peniamina mo Iuta ke he taue kia Tavita.
17 Ti fina atu a Tavita kia lautolu, mo e vagahau atu, kua pehe atu kia lautolu, Kaeke kua o mai a mutolu kia au mo e mafola ke lagomatai mai kia au, to loto fakalataha a tautolu mo mutolu; ka ko e mena kaeke kua o mai a mutolu ke afo au kia lautolu kua fai fi mai kia au, he nakai ha ia au ha mahani favale, kia fofoga mai e Atua he tau matua ha tautolu, mo e akonaki atu ai e ia.
18 Ti ha ha i luga a Amasai e Agaga ko ia ne mua ke he tokotolugofulu, kua pehe atu a ia, Tavita na e ha ha ia koe a mautolu nai, ko e tama a Iese na e, kua kau a tautolu mo koe; kia monuina a koe, kia monuina ni, kia monuina foki a lautolu kua lagomatai kia koe; ha kua lagomatai hau a Atua kia koe. Ti talia e Tavita a lautolu, mo e eke e ia a lautolu mo tau takitaki kau.
19 Ne fehola mai foki falu ia Manase kia Tavita, he hau a ia mo e tau tagata Filisitia ke tau ai ke he tau mo Saulo; ka e nakai lagomatai a lautolu kia lautolu; ha ko e mena fakafano kehe he tau iki Filisitia a Tavita ke lata mo e pulega ha lautolu, kua pehe age, To hola atu a ia ke he iki hana ko Saulo mo e tau ulu ha tautolu.
20 Ne fano a ia ki Tikelaka, ti fehola mai kia ia falu a tagata ia Manase, ko Atama, mo Iosapata, mo Ietielu, mo Mekaeli, mo Iosapata, mo Elihu, mo Siletai, ko e tau takitaki kau he tau takitokoafe a Manase.
21 Ne lagomatai a lautolu kia Tavita ke tau mo e tau kau, ha ko e tau toa malolo a lautolu oti, ko e tau takitaki kau foki a lautolu.
22 Ko e vaha ia ne o age e tau tagata ke he taha aho mo e taha aho kia Tavita ke lagomatai kia ia, kua eke mo kau lahi, tuga ne kau he Atua.
23 Ko e katoatoa he totou he tau tagata kua tauteute ke tau hanai, ne o age a lautolu kia Tavita ki Heperona ke fakamafoki mai kia ia e kautu a Saulo, ke lata mo e kupu a Iehova.
24 Ko e fanau a Iuta ha ha i ai kia lautolu e tau akau pāpā, ne ono e afe mo e valu e teau tagata, kua tauteute ke tau.
25 Ko e fanau a Simeona ko e tau toa malolo ke tau, ne fitu e afe mo e taha teau e tagata.
26 Ko e fanau a Levi ne fa e afe mo e ono e teau tagata.
27 Ko Iehoiata foki ko e takitaki he magafaoa a Arona, ha ha ia ia tolu e afe mo e fitu e teau tagata;
28 Ko Satoka ko e fuata ko e toa malolo, mo e toko uafulu ma ua e takitaki kau he magafaoa he hana matua.
29 Ko e tau tagata he magafaoa a Peniamina ko e magafaoa a Saulo, ne tolu e afe; ha kua hoko mai ke he vaha ia ne leveki ai he tokologa ia lautolu ke he magafaoa a Saulo.
30 Ko e tau tagata he fanau a Efaraimo, ko e ua e afe mo e valu e teau tagata, ko e tau toa malolo ne talahaua a lautolu ke he tau magafaoa he tau matua ha lautolu.
31 Ko e tau tagata he taha veveheaga he magafaoa a Manase, ko e hogofulu ma valu e afe, ne talahaua ke he tau higoa ha lautolu, ke o mai ke eke a Tavita mo patuiki.
32 Ko e tau tagata he fanau a Isakara, ne pulotu a lautolu he manamanatu ke iloa ai e tau mena kua lata ke eke e Isaraela ke he tau vaha, ko e tau tui ne mua ne ua e teau a lautolu, ne fanogonogo mai foki kia lautolu e tau matakainaga oti ha lautolu.
33 Ko e tau tagata Sepulona ko lautolu kua maeke ke o atu ke tau, kua tauteute ke tau mo e tau kanavaakau oti ke tau ai, ne limagofulu e afe, ko e tau tagata kua mahani ke tatanaki atu ke tau; nakai fakauaua a lautolu.
34 Ko e tau tagata Nafatali foki, ko e tau takitaki kau taha e afe, katoa mo e tau tagata tolugofulu e afe ti fitu e afe ne fai akau pāpā mo e tau tao.
35 Ko e tau tagata Tano, kua tauteute ke tau, ne uafulu ma valu e afe mo e ono e teau.
36 Ko e tau tagata Asera ko lautolu ne maeke ke o atu ke tau kua tauteute ke tau, ko e fagofulu e afe tagata.
37 Ne o mai foki he fahi atu a Ioritana ko e tau tagata Reupena, mo e tau tagata Kato, mo e taha veveheaga he magafaoa a Manase, ha ha i ai kia lautolu e tau kanavaakau oti ke tau ai, ko e taha teau e afe mo e uafulu e afe tagata.
38 Ko e tau kau oti ia ko e tau tagata tau ni a lautolu, ko e tau tagata kua mahani ke tatanaki atu ke tau, ne o mai a lautolu ki Heperona mo e loto katoa ke eke a Tavita mo patuiki a Isaraela oti; katoa mo lautolu oti ne toe i Isaraela ne loto fakalataha a lautolu ke eke a Tavita mo patuiki.
39 Ti ha ha i ai a lautolu mo Tavita tolu e aho, kua kai a lautolu mo e inu, ha kua taute mena ai he tau matakainaga ha lautolu ma lautolu.
40 Ko lautolu foki ne fetataakl mo lautolu, ke hoko atu ki Isakara, mo Sepulona, mo Nafatali, ne ta mai e lautolu e tau areto ki luga he tau asini, mo e tau kamela, mo e tau falata, mo e tau povi, ko e tau mena kai ne eke aki he falaoa, mo e tau fakapotopotoaga fua mati, mo e tau fuhi fua vine tavaki, mo e uaina, mo e puke lolo, mo e tau povi, mo e tau mamoe loga lahi ni; ha ko e mena fiafia ni a Isaraela.