1 Nofoaga he Tau Patuiki 14:1-17
14 TI fakafano mai he patuiki a Turo ko Hairamo e tau fekau kia Tavita, ti ta mai ai e ia e tau akau ko e tau arasi mo e tau tufuga ati fale, kia ta e lautolu e fale māna.
2 Ti iloa e Tavita kua fakamau e Iehova a ia ke eke mo patuiki a Isaraela, ha kua fakatokoluga ai hana kautu ha ko e motu hana ko Isaraela.
3 Ti eke foki e Tavita e tau hoana māna i Ierusalema, ti fanau ai foki e tau tama tane mo e tau tama fifine kia Tavita.
4 Ko e tau higoa hanai he fanau ne fanau kia ia i Ierusalema; ko Samua, mo Sopapa, mo Natano, mo Solomona,
5 Mo Ivara, mo Elisua, mo Elifaleta,
6 Mo Nokaha, mo Nefeku, mo Iafia,
7 Ko Elisama, mo Peeliata, mo Elifaleta.
8 Kua logona he tau tagata Filisitia kua fakauku a Tavita ke eke mo patuiki a Isaraela oti, ti o hake ai e tau tagata Filisitia oti ke kumi a Tavita. Kua logona foki e Tavita ti fina atu a ia kia lautolu.
9 Ti o atu e tau tagata Filisitia mo e fofola ai a lautolu ke he pahua he tau tagata Refa.
10 Ti huhu atu a Tavita ke he Atua kua pehe atu, To hake nakai au ke tau mo e tau tagata Filisitia? To tuku mai nakai e koe a lautolu ke he lima haku? Ti pehe mai a Iehova kia ia, Kia hake a, ha ko e mena to tuku atu e au a lautolu ke he lima hau.
11 Kua o atu a lautolu ki Paala-Faresa, ti keli e Tavita a lautolu ke he mena ia; ti pehe. age a Tavita, Kua oho mai e Atua kia lautolu kia fai fi mai kia au, tuga ne oho mai e vai, ti moua a lautolu he haku lima. Ko e mena ia ne fakahigoa ai e lautolu e mena ia ko Paala-Faresa.
12 Kua tiaki e lautolu e tau atua ha lautolu ke he mena ia; ti poaki age e Tavita, ti huhunu ai e lautolu ia ke he afi.
13 Kua liu fakapotopoto ai foki e tau tagata Filisitia mo e fofola ai a lautolu ke he pahua.
14 Ti huhu atu foki a Tavita ke he Atua; ti pehe mai e Atua kia ia, Aua neke hake a koe ke mui atu kia lautolu, kia fano takai a koe ki tua ha lautolu, ti fina atu a koe kia lautolu tata age ke he tau akau ko e tau pēka.
15 Ka logona ai e koe ke he tau tapunu akau ko e tau pēka e tomumu he tau tagata ne o, ti fano a koe ke tau; ha kua fina atu e Atua ki mua hau ke keli e kau he tau tagata Filisitia.
16 Ti eke e Tavita tuga ne poaki mai ai he Atua kia ia. Ne keli e lautolu e kau he tau tagata Filisitia, kua kamata mai i Kipeona ke hoko atu ki Kasera.
17 Kua hoko atu e ogo kia Tavita ke he tau motu oti; kua tuku foki e Iehova e matakutaku kia ia ke he tau motu oti.