1 Nofoaga he Tau Patuiki 15:1-29
15 KUA eke foki e Tavita e fale māna ke he maga a Tavita, mo e taute e ia e mena ma e puha he Atua, kua eke ai foki e fale ie ma e puha.
2 Ti pehe atu a Tavita, Nakai lata ke he falu ke uta e puha he Atua ka ko e tau tagata Levi; ha kua fifili e Iehova a lautolu ke uta e puha he Atua, mo e fekafekau tukulagi a lautolu kia ia.
3 Ti fakapotopoto ai e Tavita a Isaraela oti i Ierusalema, ke ta hake e puha a Iehova ke he mena kua taute e ia ke toka ai.
4 Kua fakapotopoto foki e Tavita e fanau a Arona, mo e tau tagata Levi;
5 Ko e fanau a Koato; ko Urielu ko e iki katoa mo e hana tau matakainaga ne taha teau ti uafulu e tagata.
6 Ko e fanau a Merari; ko Asaia ko e iki, katoa mo e hana tau matakainaga ne ua e teau ti uafulu e tagata.
7 Ko e fanau a Keresoma; ko Ioelu ko e iki, katoa mo e hana tau matakainaga ne taha e teau ti tolugofulu e tagata.
8 Ko e fanau a Elisafano; ko Semaio ko e iki, katoa mo e hana tau matakainaga ne ua e teau tagata.
9 Ko e fanau a Heperona; ko e iki ko Elielu, katoa mo e hana tau matakainaga ne toko valugofulu.
10 Ko e fanau a Usialu; ko e iki ko Aminatapu, katoa mo e hana tau matakainaga ne taha e teau ti hogofulu ma ua e tagata.
11 Ti ui atu a Tavita ke he tau ekepoa ko Satoka, mo Aviata, mo e tau tagata Levi, mo Urielu, mo Asaia, mo Ioelu, mo Semaia, mo Elielu, mo Aminatapu,
12 Kua pehe atu a ia kia lautolu, ko mutolu ko e tau tui he tau magafaoa he tau matua he tau tagata Levi, kia fakatapu e mutolu a mutolu, katoa mo e tau matakainaga ha mutolu, kia ta hake e mutolu e puha a Iehova ko e Atua a Isaraela ke he mena kua taute e au ke toka ai.
13 Ha kua oho mai a Iehova ha tautolu a Atua kia tautolu, he nakai ta mai ai fakamua e mutolu; he nakai kumi e tautolu a ia ke lata mo e fakatufono.
14 Ti fakatapu ai he tau ekepoa mo e tau tagata Levi a lautolu ke ta hake ai e puha a Iehova ko e Atua a Isaraela.
15 Ti tauloto he fanau he tau tagata Levi e puha he Atua ke he tau akau ke tauloto aki ke he tau fulima ha lautolu, tuga ne poaki mai e Mose ke lata mo e kupu a Iehova.
16 Kua pehe atu a Tavita ke he tau iki he tau tagata Levi, kia kotofa e lautolu falu he tau matakainaga ha lautolu ke uhu lologo ke he tau akau fakatagi, ko e tau napeli, mo e tau kitara, mo e tau kumepalo, ke lologo ai mo e leo lahi mo e fiafia ai a lautolu.
17 Kua kotofa he tau tagata Levi a Hemana ko e tama a Ioelu, ne kotofa foki mai he tau matakainaga hana, a Asafo ko e tama a Perekia, ne kotofa foki mai he tau matakainaga ha lautolu ko e fanau a Merari, ko Etano ko e tama a Kusaia.
18 Ko e tau matakainaga foki ha lautolu ne mumui age kia lautolu, ko Sakaria, ko Peni, mo Iaasielu, mo Semiramotu, mo Ikielu, mo Uni, ko Eliapo, mo Penaia, mo Maaseia, mo Matitia, mo Elipelehu, mo Mikemau, mo Opeta-etoma, mo Ieielu, ko e tau leoleo gutuhala.
19 Ko e tau tagata uhu lologo hanai; ko Hemana, ko Asafo, mo Etano, ne kotofa a lautolu mo e tau kumepalo apa kula ke fakatagi.
20 Ko Sakaria foki, mo Asielu, mo Semiramotu, mo Ikielu, mo Uni, mo Eliapo, mo Maaseia, mo Penaia, ne kotofa a lautolu mo e tau napeli ke he Alemota;
21 Ko Matitia, mo Elipelehu, mo Mikenau, mo Opeta-etoma, mo Ieielu, mo Asasia, ha ha i ai kia lautolu e tau kitara ke he Seminita, ke takitaki ai e lologo.
22 Ko Kenania foki ko e iki he tau tagata Levi, ko e tagata uhu lologo a ia, ne fakaako ai e ia e tau lologo, he pulotu a ia.
23 Ko Perekia foki mo Elekana ko e tau leoleo gutuhala a laua ma e puha.
24 Ko Sepania, mo Iosafata, mo Natanielu, mo Amasai, mo Sakaria, mo Penaia, mo Elisara, ko e tau ekepoa ne ulo e lautolu e tau pu ki mua he puha he Atua. Ko Opeta-etoma, mo Ikia, ko e tau leoleo gutuhala a laua ma e puha.
25 Kua o atu a Tavita mo e tau patu Isaraela, mo e tau iki he tau tokoafe ke ta mai e puha he maveheaga a Iehova mo e fiafia mai he fale a Opeta-etoma.
26 Ne lagomatai he Atua ke he tau tagata Levi ne uta e puha he maveheaga a Iehova; ti eke ai e lautolu fitu e povi tane mo poa, mo e fitu e mamoe tane.
27 Kua tapulu a Tavita ke he tapulu ie lino, ne pihia foki e tau tagata Levi oti ne uta e puha, mo e tau tagata uhu lologo, mo Kenania ko e tagata uhu lologo ne mua, mo e tau tagata uhu lologo. Ne tapulu foki a Tavita ke he efota ie lino.
28 Kua ta hake e Isaraela oti e puha he maveheaga a Iehova mo e kalaga, mo e leo he sofaro, mo e tau pu, mo e tau kumepalo, kua ta foki e tau napeli, mo e tau kitara.
29 Kua hoko e puha he maveheaga a Iehova ke he maga a Tavita, ti kitekite mai a Mekala ko e tama a Saulo he fakamaama, ti kitia e ia e patuiki ko Tavita kua koli mo e lologo ki mua a Iehova ti fakavihia e ia a ia ke he hana loto.