1 Nofoaga he Tau Patuiki 18:1-17
18 KUA mole atu e tau mena ia, ti keli e Tavita e tau tagata Filisitia, mo e fakatokolalo ai e ia a lautolu; kua fofo foki e ia a Kata mo e hana tau maga mai he tau tagata Filisitia.
2 Kua keli foki e ia a Moapi; ti eke a Moapi mo tau tupa kia Tavita, ti ta mai ai e lautolu e tau poa.
3 Kua keli foki e Tavita a Hatatesa ko e patuiki a Sopa ke hoko atu ki Hamato, he fano a ia ke fakamau ai hana pule ke he vailele ko Eufirate.
4 Ti moua e Tavita ia ia, e tau kariota ne taha e afe, mo e tau tagata heke solofanua fitu e afe, mo e kau ne o he tau hui ha lautolu ko e uafulu e afe tagata; ti helehele e Tavita e tau hokohoko he tau hui he tau solofanua he tau kariota oti; ka e fakahao ai e ia māna ke lata mo e taha teau e kariota.
5 Ne o age e tau tagata Suria i Tamaseko ke lagomatai kia Hatatesa ko e patuiki a Sopa, ti keli ai e Tavita ia Suria uafulu e afe, ti ua e afe tagata.
6 Ti tuku ai e Tavita e tau kau leoleo i Suria i Tamaseko; kua eke e tau tagata Suria mo tau tupa kia Tavita, ti ta mai ai e lautolu e tau poa. Kua fakamoui e Iehova a Tavita ke he tau mena oti ne fano a ia ki ai.
7 Ti uta e Tavita e tau akau punuti auro ha ha i ai ke he tau fekafekau a Hatatesa, ti ta mai ai e ia ki Ierusalema.
8 Ne uta foki e Tavita e tau apakula loga ni i Tipeata mo Kuna ko e tau maga a Hatatesa, ne eke aki e Solomona e vai apakula, mo e tau pou, mo e tau kapiniu apakula.
9 Ne logona he patuiki a Hamato ko Tou, kua keli e Tavita e kau oti a Hatatesa ko e patuiki a Sopa,
10 Ti fakafano mai e ia hana tama tane ko Atorama ke he patuiki ko Tavita ke fakaalofa kia ia, mo e fakaaue atu kia ia, ha kua tau a ia mo Hatatesa mo e keli e ia a ia; ha ko e mena fa tau a Hatatesa mo Tou; ne ta mai foki e Atorama e tau kapiniu auro, mo e tau kapiniu ario, mo e tau kapiniu apakula.
11 Ne fakatapu foki he patuiki ko Tavita e tau mena ia kia Iehova, katoa mo e ario, mo e auro ne ta mai ai e ia he tau motu kehe oti nai, ko Etoma, mo Moapi, mo e fanau a Amoni, mo e tau tagata Filisitia, mo Amaleka.
12 Ne keli foki e Apisai ko e tama a Seruia, e tau tagata Etoma ke he pahua masima ko e hogofulu e afe ti valu e afe tagata.
13 Ti tuku ai e ia e tau kau leoleo i Etoma; ti eke e tau tagata Etoma oti mo tau tupa kia Tavita. Kua fakamoui e Iehova a Tavita ke he tau mena oti ne fano a ia ki ai.
14 Kua eke a Tavita mo patuiki a Isaraela oti, ti eke e ia e fakafiliaga mo e mahani tututonu ke he hana motu oti ni.
15 Ko Ioapo ko e tama a Seruia, kua pule a ia ke he kau; ko Iehosafata ko e tama a Ahiluta ko e fakamau kupu a ia;
16 Ko Satoka ko e tama a Ahitupu, mo Ahimeleke ko e tama a Aviata ko e tau ekepoa a laua; mo Savesa ko e tohikupu a ia;
17 Ko penaia ko e tama a Iehoiata ne pule a ia ke he kau he tau Kereti, mo e kau he tau Peleti; ko e tau tama tane foki a Tavita ko e tau tui ne mua a lautolu ke he tapa he patuiki.