1 Nofoaga he Tau Patuiki 19:1-19
19 KUA mole atu e tau mena ia, ti mate e patuiki he fanau a Amoni ko Nahasa; ti eke e tama hana mo patuiki ke hukui aki a ia.
2 Ti pehe age a Tavita, To fakaalofa atu au kia Hanuno, ko e tama a Nahasa, he fakaalofa mai hana matua tane kia au. Ti fakafano age ai e Tavita e tau fekau ke fakamafana a ia ha ko e hana matua tane. Kua hohoko atu e tau fekafekau a Tavita ke he motu he fanau a Amoni kia Hanuno ke fakamafana a ia.
3 Ka e pehe age e tau iki he fanau a Amoni kia Hanuno, Piko kia a koe kua fakaalofa mai a Tavita ke he matua hau, kua fakafano mai e ia e tau tagata ke fakamafana a koe? Nakai kia o mai hana tau fekafekau kia koe ke kitekite, mo e moumou, mo e toko ke he motu?
4 Ti toto atu e Hanuno ke he tau fekafekau a Tavita, kua hifi e ia ha lautolu a tau hafe, mo e hehele ai e ia ha lautolu a tau tapulu ke he lotoga, ke hoko ke he tau patupula ha lautolu; ti fakafano atu e ia a lautolu.
5 Kua o atu e falu mo e tala atu kia Tavita e tau mena ne eke ke he tau tagata ia, ti fakafano age e ia e falu ke fonofono a lautolu ha kua ma lahi ni e tau tagata ia. Kua pehe age foki e patuiki, Kia nonofo a mutolu i Ieriko ato tutupu ai e tau hafe ha mutolu, ti liliu mai a mutolu.
6 Kua kitia he fanau a Amoni kua vihiatia e Tavita a lautolu, ti fakafano age e Hanuno mo e fanau a Amoni taha e afe taleni ario ke tuku fenoga atu kia lautolu i Mesopotamia, mo Suria-maaka, mo Sopa, ke ta mai ai e tau kariota, mo e kau heke solofanua, ke lagomatai a lautolu.
7 Kua ta age e lautolu e totogi kau mo e moua mai ai e lautolu tolugofulu ma ua e afe kariota mo e patuiki a Maaka mo e hana tau tagata, ne o mai a lautolu mo e heapi ai a lautolu ki mua a Mitepa. Kua fakapotopoto mai foki e fanau a Amoni he tau maga ha lautolu, mo e o mai a lautolu ke tau.
8 Kua logona e Tavita, ti fakafano age e ia a Ioapo mo e kau oti ko e tau tagata malolo.
9 Ti o age e fanau a Amoni mo e tatanaki atu a lautolu ke tau ke he gutuhala he maga; ka ko e tau patuiki ne o mai ne nonofo kehe a lautolu ke he vao.
10 Kua kitia e Ioapo kua hagao mai e tau kia ia i mua mo tua, ti fifili e ia falu mai he tau fuata oti a Isaraela, ti tatanaki atu e ia a lautolu ke tau ke he tau tagata Suria.
11 Ka ko lautolu ne toe he motu ne tuku atu e ia a lautolu ke he pule he matakainaga hana ko Apisai, ti tatanaki atu a lautolu ke tau mo e fanau a Amoni.
12 Ti pehe age a ia, Kaeke ke kautu mai he tau tagata Suria kia au, ti lagomatai mai a koe kia au; ka ko e mena kaeke ke kautu he fanau a Amoni kia koe, to lagomatai au kia koe.
13 Kia fakamanavalahi ā, ti fakamalolo ā tautolu ma e motu ha tautolu, ma e tau maga foki he Atua ha tautolu; ka kia eke e Iehova e mena kua finagalo a ia ki ai.
14 Ti fakatata atu a Ioapo mo e tau tagata ha ha ia ia ke he tau tagata Suria ke tau; ti fehola a lautolu mai mua hana.
15 Kua kitia he fanau a Amoni kua fehola e tau tagata Suria, ti fehola foki a lautolu i mua he matakainaga hana ko Apisai, mo e o atu a lautolu ke he maga. Ti fano a Ioapo ki Ierusalema.
16 Kua kitia he tau tagata Suria kua mahala a lautolu ki mua he tau tagata Isaraela, ti fakafano atu e lautolu e tau fekau mo e ta mai ai e lautolu e tau tagata Suria he fahi atu he vailele; ko Sopaka foki ko e takitaki kau a Hatatesa ne mua a ia kia lautolu.
17 Kua talahau ai kia Tavita; ti fakapotopoto ai e ia a Isaraela oti, ti o a lautolu ke he fahi atu a Ioritana, mo e hohoko atu kia lautolu, ti tatanaki atu e lautolu ke tau kia lautolu. Kua tatanaki atu e Tavita ke tau ke he tau tagata Suria, ti tau a lautolu mo ia.
18 Ti fehola e tau tagata Suria ki mua a Isaraela, ti keli e Tavita ia Suria e tau tagata ne heke he tau kariota ne fitu e afe, mo e fagofulu e afe tagata ne o he tau hui ha lautolu, ne tamate foki e lautolu e takitaki kau ko Sopaka.
19 Kua kitia he tau fekafekau a Hatatesa kua mahala a lautolu ki mua a Isaraela, ti fakafeilo a lautolu mo Tavita, mo e fekafekau a lautolu kia ia; ti nakai mafai e tau tagata Suria ke lagomatai foki ke he fanau a Amoni.