1 Nofoaga he Tau Patuiki 20:1-8
20 KUA hoko ke he vaha, kua liu hoko mai e tau, ko e vaha foki ia ne o age ai e tau patuiki ke tau ti takitaki atu e Ioapo e tau tagata ne mua he malolo he kau, mo e moumou ai e ia e motu he fanau a Amoni, ti fina atu a ia mo e pa takai e ia a Rapa. Ka kua nofo a Tavita i Ierusalema. Kua keli e Ioapo a Rapa, mo e ulu moumou ai e ia.
2 Ti uta e Tavita e foufou he patuiki ha lautolu mai he fufuga hana, ti kitia ai e lautolu ko e hana mamafa ko e taleni auro, ha ha i ai foki e tau maka uho; ti tuku ai ke he fufuga a Tavita; ne ta mai foki e ia e tau mena he maga ne fofo he tau kua loga lahi ni.
3 Ne takitaki atu e ia e tau tagata ha ha i ai, mo e tuku atu e ia a lautolu ke he tau kili, mo e tau hoehoe lapatoa, mo e tau toki. Ne eke pihia foki e Tavita ke he tau maga oti he fanau a Amoni. Ti liliu atu ai a Tavita mo e motu oti ki Ierusalema.
4 Kua mole atu e tau mena na, ti tau ai mo e tau tagata Filisitia i Kasera. Ko e aho ia ni ne keli ai e Sipekai ko e tagata Usa, a Sapa ko e taha ia he fanau a Rafā; ti mahala ai a lautolu.
5 Kua tau foki a lautolu mo e tau tagata Filisitia. Ti keli ai e Elehanana ko e tama a Iaira a Laime ko e matakainaga a Koriato ko e tagata Kata; ko e fuata he tao hana kua tuga ne akau fakalava he tagata lalaga ie.
6 Kua tau foki a lautolu i Kata; ha ha i ai e tagata tokoluga, ne takiono e tau matalima hana ti takiono hana tau matahui, ko e uafulu ma fa ia e katoatoa, ko e taha foki ia he fanau a Rafā.
7 Ne fakafiu a ia ke he tau tagata Isaraela, ti keli ai a ia e Ionatana ko e tama a Sama ko e matakainaga a Tavita.
8 Ko lautolu na ne fanau a lautolu kia Rafā i Kata. Ti mamate a lautolu ke he lima a Tavita mo e tau lima he hana tau fekafekau.