1 Nofoaga he Tau Patuiki 29:1-30
29 NE pehe atu foki e patuiki ko Tavita ke he fakapotopotoaga oti, ko e tama haku ko Solomona, ko ia ni hokoia kua fifili he Atua, ko e tama tote a ia to lolelole, ti lahi ni e gahua, ha ko e mena nakai ko e fale ma e tau tagata ka ko e fale ma Iehova ko e Atua.
2 Kua taute e au mo e haku malolo katoa mo e fale he haku Atua, ko e auro ke eke aki e tau mena auro, mo e ario ke eke aki e tau mena ario, mo e apakula ke eke aki e tau mena apakula, mo e lapatoa ke eke aki e tau mena lapatoa, mo e tau akau ke eke aki e tau mena akau, mo e tau maka soama, mo e tau maka ke taute aki e tau mena, ko e tau maka kikila mo e tau maka kikila kehekehe, mo e tau maka uho oti, katoa mo e tau maka sesa loga ni.
3 Hanai foki, kua fiafia au ke he fale he haku Atua, ko e mena ia kua ta atu ai e au ma e fale he haku Atua haku a tau koloa ni, ko e auro mo e ario, ke lafilafi ke he tau mena kua taute ai e au ma e fale tapu,
4 Ne tolu e afe taleni auro, ko e auro mai Ofaira, mo e fitu e afe taleni ario ko e tau ario kua fakamea, ke fakakili aki e tau kaupa he tau fale.
5 Ko e auro ke eke aki e tau mena auro, mo e ario ke eke aki e tau mena ario, mo e tau gahua oti foki kua eke ke he tau lima he tau tufuga. Ko hai foki ke ta atu mo e fakamakai hana tau mena kia Iehova ke he aho nai?
6 Ti ta atu ai he tau tui ne mua e tau mena ne makai ki ai e tau loto ha lautolu, ti pihia foki mo e tau iki he tau magafaoa a Isaraela, mo e tau iki he tau takiafe, mo e tau iki he tau takiteau, katoa mo lautolu ne pule ke he tau gahua he patuiki.
7 Ne ta atu foki e lautolu ma e gahua he fale he Atua, lima e afe taleni auro mo e hogofulu e afe tareki, mo e hogofulu e afe taleni ario, mo e hogofulu ma valu e afe taleni apakula, mo e taha teau afe taleni lapatoa.
8 Ko lautolu foki ne toka ai e tau maka uho ne tuku atu ai e lautolu ke he koloa he fale a Iehova, ke he lima a Ikieli ko e tagata Keresona.
9 Ti fiafia ai e motu, ha kua foaki atu e lautolu mo e loto makai, ha kua foaki atu e lautolu mo e loto katoa mo e fakamakai kia Iehova. Ne fiafia foki e patuiki ko Tavita mo e fiafia lahi ni.
10 Ti fakaaue atu a Tavita kia Iehova ki mua he fakapotopotoaga oti mo e pehe atu a Tavita, Kia fakamonuina atu a koe Iehova na e, ko e Atua a Isaraela, ha mautolu a matua, mai i tuai tigahau to hoko ke he tukulagi.
11 Iehova na e, ko e hau ni e mua ue atu mo e malolo, mo e fulufuluola, mo e lilifu, mo e fakahekeaga; ha ko e mena ha ha ia koe e tau mena oti ke he lagi, mo e lalolagi; Iehova na e, hau ni e kautu, kua tokoluga ue atu a koe kua mua ue atu ni a koe he tau mena oti kana.
12 Mai ia koe e koloa mo e lilifu, ko koe ni kua pule ke he tau mena oti; ha ha he lima hau foki e mana mo e malolo, ha ha ia koe foki ke fakalilifu mo e fakamalolo ai e tau tagata oti kana.
13 Hanai, ha mautolu a Atua na e, kua fakaaue atu a mautolu kia koe, mo e fakaheke atu ke he hau a higoa lilifu.
14 Ka ko hai kia au nai? Ko hai foki haku motu, ne maeke ai kia mautolu, he eke poa mo e fakamakai pehenā a mautolu? Ko e mena mai ia koe e tau mena oti ni; ko e tau mena hau foki kua ta atu ai e mautolu kia koe.
15 Ha ko e tau tagata kehe a mautolu ki mua hau, mo e tau tagata paea a mautolu, tuga ne tau matua oti ni ha mautolu. Ko e tau aho ha mautolu ke he lalolagi kua tuga ne ata, ti nakai fai amaamanakiaga a mautolu.
16 Iehova na e, ha mautolu a Atua, ko e tau koloa oti nai kua taute e mautolu ke eke aki e fale māu, ma e hau a higoa tapu, mai ia koe ia, ko e hau foki e tau mena oti ia.
17 Haku Atua na e kua iloa e au kua kamatamata e koe e loto, mo e fiafia a koe ke he mahani tututonu. Ko au nai ko e mahani tonu he haku loto kua ta atu ai e au mo e fakamakai e tau mena oti na; hanai, kua kitia e au mo e fiafia e motu hau, kua nonofo mai i hinei ke eke poa mo e fakamakai kia koe.
18 Iehova na e, ko e Atua a Aperahamo, ko e Atua a Isaako, mo e Atua a Isaraela, ha mautolu a tau matua, kia toka ai tukulagi e tau mena nai ke he tau fatuakiloto he tau manatu he tau loto he motu hau, mo e fakatumau ai e tau loto ha lautolu kia koe;
19 Kia foaki foki e koe ke he tama haku ko Solomona e loto katoa ke omaoma ai a ia ke he hau a tau poaki, mo e hau a tau fakatufono, mo e hau a tau kotofaaga, ke eke foki e ia e tau mena oti nai, mo e ta ai e ia e faituga, kua taute ai e au ke lata ki ai.
20 Ne pehe atu foki a Tavita ke he fakapotopotoaga oti, Kia fakaaue atu a a mutolu kia Iehova ha mutolu a Atua. Ti fakaaue atu ai e fakapotopotoaga oti kia Iehova ko e Atua he tau matua ha lautolu, ne tukutukuhifo foki a lautolu, mo e fakaveveli fakafohifo ai a lautolu kia Iehova mo e patuiki.
21 Ko e aho a pogipogi, ka kua mole atu e aho ia, ne eke ai e lautolu e tau poa kia Iehova, mo e eke ai e lautolu e tau poa huhunu kia Iehova, ne taha e afe povi tane, ti taha e afe mamoe tane, ti taha foki e afe punua mamoe, katoa mo e ha lautolu a tau poa inu, mo e tau poa loga ma Isaraela oti;
22 Ne kai a lautolu mo e inu mo e fiafia lahi a lautolu ki mua a Iehova ke he aho ia. Ti kotofa e lautolu e tama a Tavita ko Solomona mo patuiki ha lautolu, ko e laga ua ia, mo e fakauku e lautolu a ia ma Iehova, ke eke mo iki ne mua, ne eke foki a Satoka mo ekepoa.
23 Ti nofo a Solomona ke he nofoaiki a Iehova ke eke mo patuiki ke hukui aki e matua hana ko Tavita; kua monuina foki a ia, ne fanogonogo foki kia ia a Isaraela oti.
24 Ko e tau iki ne mua oti foki, mo e tau toa, katoa foki mo e tau tama tane oti he patuiki ko Tavita, ne omaoma a lautolu ke he patuiki ko Solomona.
25 Ne fakatupu fakalahi e Iehova e lilifu a Solomona ki mua a Isaraela oti, mo e foaki atu e ia kia ia e lilifu ke lata mo e patuiki, nakai pihia ke he taha patuiki a Isaraela ne fakamua atu kia ia.
26 Ne eke a Tavita ko e tama a Iese mo patuiki a Isaraela oti.
27 Ko e tau aho ne eke a ia mo patuiki a Isaraela ko e fagofulu e tau tau; ko e fitu e tau ne eke a ia mo patuiki i Heperona, ti tolugofulu ma tolu e tau ne eke a ia mo patuiki i Ierusalema.
28 Kua mate a ia, kua motua lahi ni a ia kua loga hana tau tau, mo e lahi hana koloa; mo e hana lilifu; ti eke hana tama ko Solomona mo patuiki ke hukui aki a ia.
29 Ko e tau mena ne eke he patuiki ko Tavita, ko e tau mena fakamua mo e tau mena fakamui, kitiala, kua tohi ai ke he tala he tagata kitekite ko Samuela, mo e tala a Natano ko e perofeta, mo e tala a Kato ko e tagata Kitekite,
30 Katoa mo e tala ke he vaha oti ne patuiki ai a ia, mo e hana malolo, mo e tau mena ne hohoko kia ia, mo Isaraela, katoa mo e tau kautu oti he tau motu.