1 Peteru 3:1-22
3 KIA pihia a mutolu ko e tau fifine, kia omaoma ke he tau tane ha mutolu ni, kaeke foki kua faliuliu falu ke he kupu, kia moua a lautolu he mahani mitaki he tau hoana ha lautolu, ka e nakai vagahau,
2 Ka kitekite age a lautolu kia mutolu kua nonofo fakatekiteki mo e matakutaku.
3 Aua neke eke ha lautolu a tauteaga ke he tino, ko e fili he lauulu ia, mo e taute ke he auro, mo e fakatapulu ke he tau tapulu;
4 Ka ko e tagata galo he loto, kia taute a ia ke he mena nakai tuai popo, ko e loto mahani molu mo e mafola, ko e koloa uho haia ki mua he Atua.
5 Ha ko e mena ne pihia foki e tau fifine tapu i tuai ne tauteute e lautolu a lautolu, ko lautolu ne amaamanaki ke he Atua, ne omaoma a lautolu ke he tau tane ha lautolu.
6 Ne pihia a Sara he fanogonogo a ia kia Aperahamo, ne totoku e ia a ia ko e Iki; kua eke foki a mutolu mo tau tama hana, ka mahani mitaki a mutolu, mo e nakai matakutaku ke he taha mena ke matakutaku ai.
7 Kia pihia foki a mutolu ko e tau tane, kia nonofo fakalataha mo lautolu mo e iloilo, kia fakalilifu ke he hoana, ha ko e kapiniu a ia kua mua he lolelole kia koe, ha kua eke foki mo tau hakeaga fakalataha ke he moui kua foaki noa mai, neke fakalavelave ha mutolu a tau liogi.
8 Ko e fakahikuaga hanai, kia loto fakalataha a mutolu oti, kia feofanaki, kia fakaalofa ke he tau matakainaga, kia hofihofi noa e fakaalofa, kia mahani totonu,
9 Aua neke taui atu e kelea ke he kelea, po ke amuamu ke he amuamu; ka kia fakamonuina atu e mutolu, ha kua iloa ko e mena ia ne ui ai a mutolu, kia moua e mutolu e monuina.
10 Ha ko ia kua manako ke he moui, ke iloa foki e tau aho mitaki, kia toka he alelo hana e vagahau kelea, ko e hana tau laugutu foki neke vagahau fakavai.
11 Kia kalo kehe mo e kelea, ka kia eke e tau mena mitaki; kia kumi e mafola mo e tutuli ki ai.
12 Ha kua hagao e na fofoga he Iki ke he tau tagata tututonu, kua fanogonogo mai foki hana tau teliga ke he tau liogi ha lautolu. Ka kua fofoga mai e Iki mo e ita ke he tau tagata mahani kelea.
13 Ko hai foki ke favale kia mutolu kaeke ke fifitaki a mutolu ke he mahani mitaki?
14 Kaeke foki ke fakamamahi a mutolu ha ko e tututonu, uhoaki a mutolu; ti aua neke matakutaku a mutolu ke he ha lautolu a fakamatakutaku mai, aua foki neke fakaatukehe.
15 Ka kia tapu e Iki ko e Atua ke he tau loto ha mutolu. Kia mautali a mutolu ke tali atu mo e mahani molu mo e matakutaku kia lautolu oti kua hūhu mai kia mutolu ke he kakano he amaamanaki ha ha ia mutolu.
16 Kia ha ha ia mutolu e loto manamanatu hifo mitaki, ko e mena foki kua fakakelea ai e lautolu a mutolu tuga ne mahani kelea e mutolu, kia mā a lautolu kua hokotaki pikopiko ha mutolu a mahani mitaki ha ia Keriso.
17 Ha ko e mena mitaki he fakamamahi a mutolu ha ko e mahani mitaki, ka finagalo ki ai e Atua, ka e kelea he fakamamahi a mutolu ha ko e mahani kelea.
18 Ha ko Keriso foki, lagataha ne mamahi ai a ia ha ko e tau hala, ko e tututonu ko e hukui he tau tagata nakai tututonu, kia takitaki e ia a tautolu ke he Atua, ne kelipopo a ia ke he tino, ka kua fakamoui a ia ke he Agaga;
19 Ne haele atu ai a ia, mo e fakamatala atu ke he tau agaga ha he fale puipui;
20 Ko lautolu ne faliuliu i tuai, he fakatalitali mai e fakauka he Atua i tuai ke he vaha kia Noa, ka kua taute ai e vaka, ne hao ai ke he vai e tau tagata tokogaogao, ko e tokovalu ni.
21 Ko e fakatai foki he mena ia ko e papatisoaga, kua fakamoui ai ainei a tautolu, (nakai ko e fakatoka kehe e pilo he tino, ka ko e tali atu he loto manamanatu hifo mitaki ke he Atua,) ke he liu tu mai a Iesu Keriso;
22 Ko ia kua haele tuai ke he lagi, ha he fahi matau he Atua a ia, kua fakatokolalo foki kia ia e tau agelu, mo e tau pule mo e tau toa.