1 Samuela 1:1-28
1 KO e taha tagata i Ramata-sofimo ke he mouga ko Efaraimo, ko e hana higoa ko Elekana ko e tama a Ierohama, ko e tama a ia a Elihu, ko e tama a ia a Tohu, ko e tama a ia a Sufi, ko e tagata Efarata.
2 Ne tokoua e hoana hana, ko Hana e higoa he taha, ko Penina e higoa he taha; ne fai fanau a Penina, ka e nakai fai tama a Hana.
3 Ne hake e tagata ia mai hana maga ke he taha tau mo e taha tau ki Sailo ke hufeilo, mo e eke poa ai kia Iehova Sapaota; ti ha ha i ai ke he mena ia e tau tama tane tokoua a Eli, ko Hofeni mo Fineaso, ko e tau ekepoa a Iehova.
4 Ka hoko foki ke he aho ke eke ai e poa a Elekana, ti age ai e ia e tau tufaaga kia Penina hana hoana, mo e hana tau tama tane oti, katoa mo e hana tau tama fifine.
5 Ka e age e ia kia Hana e tufaaga ne tatai mo e ua e tufaaga, ha kua fakaalofa a ia kia Hana; ka e pule a Iehova ke nakai fanau a ia.
6 Ti fakaohooho a ia ia ia ne fai fi kia ia, ne fakahogohogomanava foki a ia kia ia ke ita ai a ia; ha kua pule a Iehova ke nakai fanau a ia.
7 Ne eke pihia e Elekana ke he taha tau mo e taha tau, ka hake ai a Hana ke he fale a Iehova, ti fakahogohogomanava ai pihia he fifine kia ia, ti tagi ai a ia, mo e nakai kai a ia.
8 Ti pehe age hana tane ko Elekana kia ia Hana na e, kua tagi a koe he ha? Ti nakai kai he ha a koe? Ti mamahi he ha e loto hau? Nakai kia mua he mitaki au kia koe ke he tau tama tane ne tokohogofulu?
9 Kua oti ha lautolu a kai kua oti foki ha lautolu a inu i Sailo ti matike ai a Hana. Ne nofo foki a Eli ko e ekepoa ke he nofoa ke he pou he gutuhala he faituga a Iehova.
10 Ka ko e fifine, ne mamahi hana loto, ti liogi a ia kia Iehova mo e tagi lahi a ia.
11 Ti omonuo ai a ia, kua pehe atu, Iehova Sapaota na e, kaeke ke kitekite mai a koe ke he matematekelea he hau a fekafekau fifine, mo e manatu mai e koe kia au, ti nakai nimo kia koe hau a fekafekau fifine, mo e foaki mai e koe ke he hau a fekafekau fifine e tama tane, ti foaki atu ai e au a ia kia Iehova ke he tau aho oti he hana moui; to nakai hoko foki e tafi ke he hana ulu.
12 Ne fakaloa ai e ia hana liogi ki mua a Iehova, ti kitekite atu a Eli ke he hana gutu.
13 Ka ko Hana ne liogi ni a ia ke he hana loto, ne gahuahua hokoia hana tau laugutu, ka e nakai logona ai hana leo, ti piko ni a Eli kua konahia a ia.
14 Ti pehe age a Eli kia ia, To konahia a koe ato a fe? kia tiaki ā hāu a konahia ke he uaina.
15 Ti tali age a Hana kua pehe age kia ia, Ko e iki na e, nakai; ko au ko e fifine ne mamahi e loto, nakai inu ai au e uaina po ke kava, ka kua liligi atu e au hoku loto kia Iehova.
16 Aua neke totou e koe hau a fekafekau fifine fakalataha mo e tau fifine matahavala; ha ko e lahi he haku a manamanatu mo e haku a matematekelea kua liogi ai au ke hoko mai ke he magaaho nai.
17 Ti tali age a Eli kia ia, kua pehe age, Kia fano ā koe mo e monuina; kia foaki mai foki he Atua a Isaraela e tau mena kua ole e koe kia ia.
18 Ti pehe age a ia, kia ofania mai e koe hau a fekafekau fifine. Ti fano ai e fifine ia, ti kai a ia ti nakai tuai mata momoko a ia.
19 Ti uhu matike a lautolu ke he aho a pogipogi, mo e hufeilo a lautolu ki mua a Iehova; ti liliu a lautolu, ti hohoko atu ai a lautolu ke he fale ha lautolu i Rama. Ne iloa e Elekana hana hoana ko Hana, ti manatu ai e Iehova a ia.
20 Kua hoko ke he vaha ke lata ai, ti fatu a Hana, ti fanau mai e ia e tama tane; ti ui ai e ia hana higoa ko Samuela; ne pehe a ia. Ha ko e mena ole e au a ia kia Iehova.
21 Ne o hake e tagata ia ko Elekana mo e hana magafaoa oti, ke eke poa kia Iehova, ko e poa kua eke ke he tau tau, mo e mena ne omonuo ai a ia.
22 Ka e nakai hake a Hana ha kua pehe age a ia ke he hana tane, Tokai ato tapani ai e tama, ti uta e au a ia, ke kitia ai a ia ki mua a Iehova, ti nofo fakaoti a ia ke he mena ia.
23 Ti pehe age ai hana tane ko Elekana kia ia, Kia eke la e mena kua loto a koe ki ai; ati nofo ā koe ato tapani a ia; ka kia fakamau ai ni e Iehova hana kupu. Ti nofo ai e fifine mo e fakahuhu e ia hana tama, ato tapani a ia.
24 Kua tapani a ia ti o hake a laua mo ia ti uta ai e lautolu tolu e punua povi tane, mo e taha e efa falaoa, mo e lupo kili manu uaina, ti o atu a lautolu ke he fale a Iehova i Sailo; ko e tama tote agaia a ia.
25 Ti tamate e lautolu taha povi, ti uta ai e lautolu e tama kia Eli.
26 Ti pehe age a Hana kia ia, Ko e iki na e, kua moui a koe ma iki na e, ko au ko e fifine ne tu ki hinei mo koe; he liogi ai au kia Iehova;
27 Ko e tama nai ne liogi atu ai e au; ti foaki mai ai e Iehova e mena ne ole atu e au kia ia.
28 Ko au foki kua tuku atu e au a ia kia Iehova; ke he tau aho oti ke moui ai a ia; ti hufeilo ai a ia kia Iehova.