1 Samuela 10:1-27
10 TI toto e Samuela e lupo lolo, ti liligi ai e ia ki luga hana ulu, mo e figita e ia a ia; kua pehe age. Nakai kia fakauku e Iehova a koe ke eke mo iki he hana tufaaga?
2 Ka fano kehe a koe ia au ke he aho nai, ti moua atu e koe e tau tagata tokoua ke he tukuaga a Rahela ke he katofia a Peniamina i Selesa; ti pehe atu a laua kia koe, Kua moua tuai e tau asini ne fano a koe ke kumi; kitiala, kua toka he matua hau hana manatu ke he tau asini, ka kua fakaatukehe a ia ha ko mua, kua pehe a ia, Ke eke aki ha ha ko e haku tama?
3 Ti fano a koe he mena ia; ti hoko atu a koe ke he aluna a Taporā, ti feleveia ai a mutolu mo e tau tagata tokotolu ha ne o hake a lautolu ke he Atua i Peteli; kua uta he taha tolu e punua koti, ko e taha kua uta tolu e areto pukupuku, ko e taha kua uta a lupo kilimanu uaina.
4 To fakaalofa mai a lautolu kia koe, ti ta mai ai e lautolu kia koe ua e areto pukupuku, ti talia ai e koe mai he tau lima ha lautolu.
5 Ka mole ia ti hoko a koe ke he mouga he Atua, ne ha i ai e kau leoleo he taue he tau tagata Filisitia; ka hoko a koe ke he mena ia ke he maga, ti feleveia ai mo e vahega he tau perofeta kua o hifo a lautolu mai he mena tokoluga ti ha ha i mua ha lautolu e napeli, mo e topā mo e tau kofe, mo e kitara, ne fakatagi, ti perofeta age ai a lautolu.
6 Ti hoko kia koe e Agaaga a Iehova, ti perofeta ai a koe fakalataha mo lautolu; ti liliu ai a koe ke tuga ne tagata kehe.
7 Ka hoko mai e tau fakamailoga na kia koe, ti eke e koe e tau mena ne loto a koe ki ai kua manatu e koe kua lata, ha kua ha ha ia koe e Atua.
8 Ti mua hifo a koe kia au ki Kilikala; kitiala to fina atu au kia koe ke eke ai e tau poa huhunu, mo e taute ai e tau poa fakaaue. Fitu e aho ke tatali mai ai a koe he he haku a fina atu kia koe, ti fakailoa atu e au kia koe e tau mena ke eke e koe.
9 Kua tafilu atu hana tua ke fano kehe a ia ia Samuela, ti liliu ai he Atua hana loto; ti hoko ai e tau fakamailoga oti ia ke he aho ia ni.
10 Kua hoko atu a laua ke he mouga, kitiala ko e vahega he tau perofeta kua feleveia mo ia, ti hoko kia ia e Agaaga he Atua, ti perofeta ai a ia fakalataha mo lautolu.
11 Ko lautolu oti ne iloa a ia fakamua, ne kitekite a lautolu, kitiala, ne perofeta mai a ia fakalataha mo e tau perofeta; ti pehe ai e tau tagata, ko e taha ke he taha, Ko e heigoa kia e mena nai kua hoko ke he tama a Kiso? Kua fakalataha kia a Saulo foki mo e tau perofeta?
12 Ti tali mai ai taha tagata he mena ia, kua pehe mai, Ko hai foki ha lautolu a tau matua? Ko e mena ia ne pehe ai e kupu fakatai, Kua fakalataha kia a Saulo foki mo e tau perofeta?
13 Kua oti he perofeta age a ia, ti hake ai a ia ke he mena tokoluga.
14 Ti pehe mai e matakainaga he matua a Saulo kia ia mo e hana fekafekau, Ne o a mua ki fe? Ti pehe atu a ia, Ne o a maua ke kumi e tau asini, kua kitia e maua, kua nakai ha i ai ti o ai a maua kia Samuela.
15 Ti pehe mai e matakainaga he matua a Saulo, Kia tala mai la e koe kia au po ke heigoa ne tala atu ai e Samuela kia mua?
16 Ti pehe atu a Saulo ke he matakainaga he hana matua, Ne tala mai e ia kia maua kua moua tuai e tau asini; ka ko e kupu ke he kautu ne vagahau mai ai e Samuela, nakai fakakite atu e ia kia ia.
17 Ti fakapotopoto ai e Samuela e motu oti ki mua a Iehova i Misepa.
18 Ti pehe atu a ia ke he fanau a Isaraela, Kua talahua mai pehe a Iehova ko e Atua a Isaraela, Ko au ni, ne ta hake ai e au a Isaraela i Aikupito, ti laveaki e au a mutolu mai he tau lima he tau tagata Aikupito, mo e tau lima he tau kautu oti ne favale atu kia mutolu.
19 Ka ko mutolu kua tiaki e mutolu ke he aho nai ha mutolu a Atua ne fakamoui e ia a mutolu mai he tau mena oti ne kelea ai a mutolu mo e tau mena oti ne matamatekelea ai a mutolu; ti pehe atu a mutolu kia ia, Kia kotofa e koe e patuiki ma mautolu. Hanai, kia tutu a a mutolu ki mua a Iehova, ko e ha mutolu a tau magafaoa mo e ha mutolu a tau takiafe.
20 Ti fakatata mai ai e Samuela e tau magafaoa oti a Isaraela; ti fifili ai e magafaoa a Peniamina.
21 Ti fakatata mai ai e ia e magafaoa a Peniamina, ne o mai fakamatafeiga a lautolu ke he tau magafaoa ha lautolu, ti moua ai e magafaoa a Matere; ti fifili ai a Saulo ko e tama a Kiso; ti kumi e lautolu a ia, ka e nakai moua a ia.
22 Ti liu huhu atu a lautolu kia Iehova, Kua toe nakai ha tagata ke hau ki hinai? Ti pehe mai ai a Iehova, Kitiala, kua fakamumuli ai a ia ke he tau koloa.
23 Ti tafepoi atu a lautolu ti ta mai ai e lautolu a ia he mena na; ti tu atu a ia ki mua he motu, ti liu hifo he hana tukeua e tokoluga he tau tagata oti.
24 Ti pehe atu a Samuela ke he motu oti, Kua kitia nakai e mutolu a ia kua fifili e Iehova, kua nakai ha i ai taha ke he motu oti ke tatai mo ia? Ti kalaga ai e motu oti, kua pehe, Kia moui e patuiki!
25 Ti talahau atu e Samuela ke he motu e kakano he kautu, mo e tohi ai e ia ke he tohi, ti toka ai e ia ki mua a Iehova. Ti fakafano atu e Samuela e motu oti ke takitaha mo e fano ke he hana kaina.
26 Ti fano foki a Saulo ke he hana kaina i Kipea, ti o mo ia e kau ko lautolu ne fakaako ai he Atua e tau loto ha lautolu.
27 Ka e pehe e tau tagata matahavala, Po ke laveaki fefe he tagata na a tautolu? Ti fakavihia e lautolu a ia; ti nakai ta mai e lautolu ha mena fakaalofa kia ia; ka e fakamate ai a ia.