1 Samuela 12:1-25
12 TI pehe atu a Samuela kia Isaraela oti, Kitiala, kua fanogonogo atu e au ke he tau kupu ha mutolu ke he tau mena oti ne vagahau mai ai e mutolu kia au, kua kotofa ai e au e patuiki ke pule kia mutolu.
2 Ko e hanai, kitiala, kua faifano ai e patuiki ki mua ha mutolu; ka ko au, kua motua tuai au mo e uluhina; kitiala, ha ha ia mutolu foki haku a tau tama tane; ko au foki, kua faifano au ki mua ha mutolu tali mai haku a vaha fuata, kua hoko mai ke he aho nai.
3 Kitiala au, kia hokotaki e mutolu au ki mua a Iehova, ki mua foki ia ia ne fakauku e ia; ko e povi ia hai ne uta e au? po ke asini a hai kua uta e au? po ke koloa a hai ne moua e au he fakavai? po ko hai ne fakamamahi ai e au? ne talia e au ia hai e taui ke ufiufi aki haku a tau mata ia ia? ti liuaki atu e au ia kia mutolu.
4 Ti pehe mai ai a lautolu, Nakai fakavai e koe ke moua ai e koloa ha mautolu, ti nakai fakamamahi mai e koe a mautolu, ti nakai uta e koe ha mena taha he taha tagata.
5 Ti pehe atu a ia kia lautolu, Kua fioia ni e Iehova a mutolu ke he aho nai, ti fioia ni e ia ne fakauku e ia, kua nakai moua e mutolu ha mena kia au; ti pehe mai a lautolu, Kua fioia ni e ia.
6 Ti pehe atu a Samuela ke he motu, Ko Iehova ne fakatu a Mose mo Arona, ko ia foki ne ta hake ha mutolu a tau matua mai he motu ko Aikupito.
7 Hanai, kia tutu mai a a mutolu, ti fakafili ai e au a mutolu ki mua a Iehova ke he tau mena tonu oti a Iehova ne eke ai e ia kia mutolu mo e ha mutolu a tau matua.
8 Ne fina atu a Iakopo ki Aikupito, ti tagi ai ha mutolu a tau matua kia Iehova; ti fakafano atu e Iehova a Mose mo Arona, ti ta mai ai e laua ha mutolu a tau matua i Aikupito, ti fakanonofo ai a lautolu ke he mena nai.
9 Ne nimo ia lautolu a Iehova ha lautolu a Atua, ti tuku atu e ia a lautolu ke he lima a Sisera ko e takitaki kau a Hasora, mo e tau lima he tau tagata Filisitia, mo e lima he patuiki a Moapi, ti tau a lautolu mo lautolu.
10 Ti tagi ai a lautolu kia Iehova, kua pehe atu, Kua hala a mautolu, ha kua tiaki e mautolu a Iehova ka e fekafekau atu a mautolu kia Paala mo Asaira; ka ko e hanai, kia laveaki mai e koe a mautolu he tau lima ha lautolu ne fai fi mai kia mautolu, ti fekafekau atu ai a mautolu kia koe.
11 Ti fakafano mai e Iehova a Ierupaala, mo Petana, mo Iefeta, mo Samuela, ti laveaki mai e ia a mutolu he tau lima ha lautolu ne fai fi kia mutolu ke he tau fahi oti; ti nonofo a mutolu mo e nakai haofia.
12 To kitia e mutolu kua hau a Nahasa ko e patuiki he fanau a Amoni ke tau mo mutolu, ti pehe mai a mutolu kia au, Nakai, ka e kotofa e koe e patuiki ke pule kia mautolu; ka ko Iehova ha mutolu a Atua, ko he ha mutolu a patuiki a ia.
13 Hanai, kitiala, ko e patuiki aenei kua fifili ai e mutolu, ne ole ai e mutolu; ti kitiala, kua foaki mai e Iehova e patuiki ke pule kia mutolu.
14 Kaeke ke matakutaku a mutolu kia Iehova, mo e fekafekau ai a mutolu kia ia, mo e fanogonogo a mutolu ke he hana leo, ka e nakai totoko atu a mutolu ke he finagalo a Iehova; ti mumui atu a mutolu kia Iehova ha mutolu a Atua, ko mutolu, katoa mo e ha mutolu a patuiki kua pule kia mutolu.
15 Ka ko e mena kaeke ke nakai fanogonogo a mutolu ke he leo a Iehova, ka e totoko atu a mutolu ke he leo a Iehova, ka e totoko atu a mutolu ke he finagalo a Iehova, ti hoko atu e lima a Iehova kia mutolu, tuga ne hoko ai ke he ha mutolu a tau matua.
16 Hanai, kia tutu ā mo e kitekite a mutolu ke he mena lahi nai ko e eke ne fai e Iehova ki mua ha mutolu.
17 Nakai kia eke ai e heleheleaga saito ke he aho nai? To ui atu e au kia Iehova, ti foaki mai e ia e pakulagi mo e uha, ti iloa ai e mutolu, mo e kitia ai e mutolu, kua kelea lahi e mena kua eke e mutolu ki mua a Iehova, he ole e mutolu e patuiki ma mutolu.
18 Ti ui atu e Samuela kia Iehova, ti foaki mai ai e Iehova e pakulagi mo e uha ke he aho ia, ti matakutaku lahi ai e motu oti kia Iehova mo Samuela.
19 Ti pehe mai e motu oti kia Samuela, Kia liogi a koe kia Iehova hau a Atua ha ko e hāu a tau fekafekau ke aua neke mamate a mautolu; ha kua lafi atu ai e mautolu ke he tau hala oti ha mautolu e mena kelea nai, kua ole atu ai e patuiki ma mautolu.
20 Ti pehe atu a Samuela ke he motu, Ua matakutaku a mutolu, kua eke e mutolu e tau mena kelea oti nai, ka e aua neke afe a mutolu he mumui atu kia Iehova; ka kia fekafekau a mutolu kia Iehova mo e ha mutolu a tau loto katoa.
21 Aua foki neke o kehe a mutolu ia ia, ha ko e mena ka o kehe a mutolu ti mumui atu ai a mutolu ke he tau mena noa kua nakai aoga, ti nakai maeke kia lautolu ke laveaki a mutolu, ha ko e tau mena noa ni a lautolu.
22 Ha ko e mena nakai tiaki e Iehova hana motu ha ko e hana higoa lilifu, ha kua finagalo a Iehova ke eke a mutolu mo motu hana.
23 Ko au foki, kia mamao ia au he hala au kia Iehova he toka haku a liogi ha ko mutolu; ka to fakaako e au a mutolu ke he puhala mitaki mo e hako.
24 Ka kia matakutaku ni a mutolu kia Iehova, mo e fekafekau a mutolu kia ia mo e fakamoli, mo e ha mutolu a tau loto katoa; ha ko e mena, manamanatu ā mutolu ke he tau mena lalahi kua eke e ia ma mutolu.
25 Ka ko e mena, ka mahani kelea agaia a mutolu, to mahaikava ni a mutolu katoa mo e ha mutolu a patuiki.