1 Samuela 13:1-23
13 NE (tolugofulu) e tau tau a Saulo he eke a ia mo patuiki, ti ua e tau he eke a ia mo patuiki a Isaraela.
2 Ti fifili ai e Saulo e tau tagata Isaraela ne tolu e afe; ha ha ia Saulo ua e afe i Mikemasi mo e mouga ko Peteli; ti ha ia Ionatana i Kipea a Peniamina taha e afe; ka ko e tau tagata ne toe ne fakafano atu e ia a lautolu kia takitaha mo e fano ke he hana fale ie.
3 Ti keli e Ionatana e kau leoleo he tau tagata Filisitia ha ha i Kipea; ti logona ai he tau tagata Filisitia. Ti ulo ai e Saulo e pu ke he motu oti, kua pehe age a ia, Kia fanogonogo ai e tau Heperu.
4 Ti logona ai e Isaraela oti, pehe, Kua keli e Saulo e kau leoleo he tau tagata Filisitia; kua vihiatia foki a Isaraela he tau tagata Filisitia. Ti fakapotopoto ai e motu kia Saulo i Kilikala.
5 Ti fakapotopoto ai e tau tagata Filisitia ke tau mo Isaraela, ko e tau kariota ne tolugofulu e afe, ti ono e afe e tagata ne heke solofanua, mo e tau tagata tuga ne oneone ke he mataafaga he tokologa; ti o hake a lautolu mo e heapi ai a lautolu i Mikemasi ke he fahi uta a Petavene.
6 Kua kitia he tau tagata Isaraela kua apitia a lautolu, (ha kua fakaatukehe ni e motu) ti fakamumuli ai e tau tagata ke he tau ana, mo e vao vihi, mo e tau maka, mo e tau kolo tokoluga, mo e tau luo.
7 Ti o atu e falu he tau tagata Heperu ke he fahi atu a Ioritana, ne hohoko atu a lautolu ke he tau motu a Kato mo Kiliata; ka e nofo agaia a Saulo i Kilikala, kua mumui atu e motu oti kia ia mo e vivivivi.
8 Ne tatali a ia ke he tau aho fitu, ko e tau aho ia ne kotofa ai e Samuela, ka e nakai hoko atu a Samuela ki Kilikala ne mavehevehe fano foki e motu ha ha ia ia.
9 Ti pehe age a Saulo, Kia ta mai ā kia au e poa huhunu mo e poa fakaaue; ti eke ai e ia e poa huhunu.
10 Kua oti he eke e ia e poa huhunu, kitiala ko Samuela, kua hoko atu; ti fano a Saulo ke feleveia mo ia, mo e fakaalofa atu kia ia.
11 Ti pehe mai a Samuela, Ko e heigoa kia e mena kua eke e koe? Ti pehe atu a Saulo, Ne kitia e au kua mavehevehe fano e motu ha ha ia au, ko koe foki kua nakai hau ke he aho ne kotofa ai, mo e fakapotopoto ai e tau tagata Filisitia i Mikemasi,
12 Ko e mena ia ne pehe au, To hifo mai aenei e tau tagata Filisitia kia au ki Kilikala, ka e nakai la olelalo atu e au kia Iehova; ti fakamalolo ai au, mo e eke e au e poa huhunu.
13 Ti pehe mai a Samuela kia Saulo, Kua goagoa a koe ke he mena na kua eke, kua nakai omaoma a koe ke he poaki a Iehova hāu a Atua ne poaki atu ai e ia kia koe; aua ia po kua fakamau ai ni e Iehova hau a pule kia Isaraela ke tukulagi.
14 Ka ko ainei nakai tumau hau a pule; kua kumi tuai e Iehova e tagata māna ke lata mo e hana finagalo, kua poaki e Iehova kia ia ke eke mo iki he hana motu, ha kua nakai omaoma a koe ke he mena ne poaki mai ai e Iehova kia koe.
15 Ti matike a Samuela, ti hake ai a ia i Kilikala ki Kipea a Peniamina; ti totou ai e Saulo e tau tagata ne ha ha ia ia, ko e katoatoa tokai ko e ono e teau e tagata.
16 Ko Saulo foki, mo Ionatana hana tama, mo e tau tagata ha ha ia laua, ne nonofo a lautolu i Kipea a Peniamina; ka kua heapi ai e tau tagata Filisitia i Mikemasi.
17 Ti o age e tau tagata ke moumou mai he heaga api he tau tagata Filisitia ke he tau kau ne tolu; ne hagao atu taha kau ke he puhala ke o atu ki Ofira ke he motu ko Suala;
18 Ti hagao atu e taha kau ke he puhala ke o atu ki Petehorana, ti hagao atu e taha kau ke he puhala ke he fonua ne fehagai mo e pahua a Sipoima tata age ke he tutakale.
19 Kua nakai fai tufuga eke lapatoa ke he motu oti ko Isaraela, ha kua pehe age e tau tagata Filisitia, neke taute he tau tagata Heperu e tau pelu po ke tau tao.
20 Ne o hifo e tau tagata Isaraela oti ke he tau tagata Filisitia ke takitaha mo e fakamata ai hana koho lapatoa, mo e lapatoa he hana arote, mo e hana toki, mo e hana helesaito.
21 Ka e ha ha ia lautolu e kilikili, ma e tau helesaito, mo e tau lapatoa he tau arote, mo e tau huki matatolu, mo e tau toki, ke fakamata foki e tau huki ke ta hoka aki e tau povi.
22 Ko e mena ia nakai ha i ai e tau telu po ke tau tao ke he tau lima he tau tagata ne fakalataha mo Saulo mo Ionatana ke he aho ne tau ai; ka e fai mena ni a Saulo mo Ionatana hana tama.
23 Ti o atu e kau leoleo he tau tagata Filisitia ke he puhala ke o atu ki Mikemasi.