1 Samuela 15:1-35
15 TI pehe atu a Samuela kia Saulo, Ne fakafano mai e Iehova au ke fakauku a koe ke eke mo patuiki he hana motu ko Isaraela; hanai, kia fanogonogo mai a koe ke he finagalo a Iehova.
2 Kua talahau mai pehe e Iehova Sapaota, To taui atu e au e tau mena ne eke e Amaleka kia Isaraela, he tu mai a ia ke he puhala he hake mai a ia i Aikupito.
3 Hanai, kia fano a a koe, mo e keli e koe a Amaleka, mo e fakaotioti ai e mutolu hana tau mena oti ni, aua neke fakahao e mutolu a lautolu, ka kia kelipopo e koe e tau tane mo e tau tama fifine, ko e tau tama ikiiki katoa mo e tau tama kai huhu, ko e tau povi katoa mo e tau mamoe, ko e tau kamela mo e tau asini.
4 Ti ui age e Saulo ke he motu ke o age, ti totou ai e ia a lautolu i Tilaima, ne ua e teau afe tagata he kau ne o ke he tau hui ha lautolu, ti hogofulu e afe he tau tagata Iuta.
5 Ti hoko atu a Saulo ke he taha maga a Amaleka, ti tatao ai a ia ke he pahua.
6 Ti pehe age a Saulo ke he tau tagata Kenī, Omai ā a mutolu, ke o kehe, mo e hifo mai ia Amaleka, neke keli e au a koe fakalataha mo ia; ha ko e mena fakaalofa a koe ke he fanau a Isaraela oti he o hake mai a lautolu i Aikupito; ti o kehe ai e tau tagata Keni ia Amaleka.
7 Ti keli e Saulo a Amaleka ke kamata mai i Havihia ke hoko atu ki Sura, kua fehagai ia mo Aikupito.
8 Ti uta moui e ia a Akako ko e patuiki a Amaleka, ka ko e motu oti ne fakaoti at e ia a lautolu ke he melu.
9 Ti fakahao e Saulo mo e motu a Akako, mo e tau mena ne mua he mitaki he tau mamoe mo e tau povi, katoa mo e mena mitaki ha i ai, mo e tau punua mamoe, mo e tau mena mitaki oti, nakai mafai a lautolu ke fakaotioti ai; ka ko e tau manu oti ne kelea mo e gagao, ne fakaotioti ni e lautolu a lautolu.
10 Ti hoko mai ai e kupu he Atua kia Samuela, kua pehe mai,
11 Kua tokihala au ha kua kotofa ai e au a Saulo ke eke mo patuiki, ha kua liu kehe a ia ia au, ti nakai fakamoli ai e ia haku a tau kupu. Ti mamahi ai a Samuela, ti ui atu a ia kia Iehova ke he po ia ato ahogia.
12 Ti uhu matike a Samuela ke feleveia ai mo Saulo ke he magaaho pogipogi, ti talahau ai kia Samuela, pehe age, Ne hau a Saulo ki Karamelu, kitiala, kua fakatu ai e ia e fakamailoga māna, ti tafilu a ia mo e fano atu ai ti hifo a ia ki Kilikala.
13 Kua hoko atu a Samuela kia Saulo, ti pehe mai a Saulo kia ia, Kia fakamonuina atu e Iehova a koe; kua fakamoli tuai e au e kupu a Iehova.
14 Ti pehe atu a Samuela kia Saulo, Ti ko e heigoa kia e tagi nai he tau mamoe ke he haku a tau teliga, mo e tagi he tau povi kua logona ai e au?
15 Ti pehe mai ai a Saulo, Ne ta mai e au a lautolu i Amaleka; ne fakahao he tau tagata e tau mamoe mo e tau povi ne mua he mitaki, ke eke ai e poa kia Iehova hau a Atua; ka ko e tau mena ne toe ne fakaoti ni e lautolu.
16 Ti pehe age a Samuela kia Saulo, Aukiala, ke tala atu e au kia koe e tau mena ne vagahau mai ai e Iehova kia au ne po. Ti pehe age a ia kia ia, Ati vagahau mai a.
17 Ti pehe age a Samuela, pete ni ko e tagata fakateaga a koe ke he hau a manatu, Nakai kia eke a koe mo iki he tau magafaoa a Isaraela? ti fakauku e Iehova a koe ke eke mo patuiki a Isaraela;
18 Ti fakafano atu e Iehova a koe ke he fenoga, ti pehe atu a ia, Fano a a koe, mo e fakaoti e koe e tau tagata hala, ko e tau tagata Amaleka, mo e tau a koe mo lautolu ato fakaotioti ai e koe a lautolu;
19 Ko e ha nakai fanogonogo ai a koe ke he leo a Iehova, ka e oho atu a koe ke he tau mena ne fofo he tau, mo e eke ai e koe e mena kelea ki mua a Iehova?
20 Ti pehe mai a Saulo kia Samuela, Ko e mena fanogonogo ni au ke he leo a Iehova; ti fano au ke he fenoga ne fakafano atu ai e Iehova au; ti ta mai ai e au a Akako ko e patuiki a Amaleka, mo e fakaotioti e au a Amaleka.
21 Ka kua ta mai ai he motu e tau mena ne fofo he tau ko e tau mamoe mo e tau povi, ko e tau mena ne mua he mitaki he tau mena ne tuku atu ke he Atua, ke eke ai e poa kia Iehova hau a Atua i Kilikala.
22 Ti pehe atu a Samuela, Kua tatai kia e fiafia a Iehova ke he tau poa huhunu mo e tau poa, mo e hana fiafia ke he fanogonogo ke he leo a Iehova? Kitiala, ko e fanogonogo kua mua hana mitaki ke he poa mo e omaoma kua mua hana mitaki ke he gako he tau mamoe tane.
23 Ha ko e fakafualoto kua tatai ia mo e hala ha lautolu kua eke e tau lagatau he tau taulatua; ko e mahani matauka kua tatai ia mo e tapuaki ke he tau tupua. Kua tiaki e koe e kupu a Iehova ko e mena ia kua tiaki ai e ia a koe nakai tuai eke a koe mo patuiki.
24 Ti pehe mai a Saulo kia Samuela, Kua hala tuai au ha kua holi ai e au e finagalo a Iehova katoa mo e kupu hau; ha ko e mena matakutaku au ke he motu, mo e fanogonogo au ke he tau kupu ha lautolu.
25 Ko e hanai, kua ole atu e au kia koe ke fakamagalo e koe haku a hala, ti liu mai a koe mo au, kia hufeilo ai au kia Iehova.
26 Ti pehe atu a Samuela kia Saulo, Nakai liu atu au mo koe, ha kua tiaki e koe e kupu a Iehova, kua tiaki foki e Iehova a koe, ke nakai eke a koe mo patuiki a Isaraela.
27 Ha ne tafilu a Samuela ke fano, ti toto ai e ia e kala he hana tapulu, ti mahe ai.
28 Ti pehe atu a Samuela kia ia, Kua fofo e Iehova e kautu a Isaraela mai ia koe ke he aho nai, mo e foaki atu ai ke he taha ne mua he mitaki hana mahani ke he mahani hau.
29 Nakai ni pikopiko a ia ne Lilifu i Isaraela, nakai tokihala foki a ia; nukua nakai ko e tagata a ia ke tokihala ai.
30 Ti pehe mai a ia, Kua hala tuai au, ka e ole atu e au kia koe, ke fakalilifu mai a koe kia au ki mua he tau patu he haku a motu, ki mua foki a Isaraela, ti liu a koe mo au, ke hufeilo au kia Iehova hāu a Atua.
31 Ti liu ai a Samuela, kua mui atu kia Saulo; ti hufeilo ai a Saulo kia Iehova.
32 Ti pehe atu a Samuela, Kia ta mai e mutolu kia au a Akako ko e patuiki a Amaleka, Ti hau ai a Akako kia ia mo e fiafia; kua pehe mai a Akako, Ko e moli ni kua mole atu e mamahi he mate.
33 Ti pehe atu a Samuela, Tuga ne eke he pelu hau ke nakai fai tama e tau fifine, ti pihia foki hau a matua fifine ke he tau fifine, to nakai fai tama a ia. Ti tūtū ai e Samuela a Akako ki mua a Iehova i Kilikala.
34 Ti fano a Samuela ki Rama, ka e hake a Saulo ke he hana fale i Kipeā a Saulo.
35 Ti nakai liu a Samuela ke ahi a Saulo, ke hoko ke he aho ne mate ai a ia; ka e mānu a Samuela ha ko Saulo; ti tokihala a Iehova he kotofa e ia a Saulo ke eke mo patuiki a Isaraela.