1 Samuela 17:1-58
17 KUA fakapotopoto ai he tau tagata Filisitia ha lautolu a tau kau ke tau. Kua fakapotopoto a lautolu i Suka ha ha i ai ke he tau tagata Iuta; ti heapi ai a lautolu ke he vaha a Suka mo Aseka i Efesa-tamima.
2 Ti fakapotopoto ai a Saulo mo e tau tagata Isaraela, ti heapi ai a lautolu ke he pahua ko Ela, ti tatanaki atu ai a lautolu ke tau ke he tau tagata Filisitia.
3 Ti tutu mai e tau tagata Filisitia ke he mouga ke he taha fahi, ka e tutu atu e tau tagata Isaraela ke he mouga ke he taha fahi, ka ko e pahua ke he vaha ha lautolu.
4 Ti fina age ai e toa mai he heaga api he tau tagata Filisitia, ko Koriato hana higoa, ne hau ai i Kata; ko e hana tokoluga, ko e ono e kupita ti hagatike taha.
5 Ha ha i ai ke he hana ulu e potiki apa kula, ti tapulu ai a ia ke he ufi fatafata ne eke po ke tau hinafi ika; ko e mamafa he hana ufifatafata ko e lima e afe e sikeli apa kula.
6 Ne ha i ai foki e tau ufi hui apa kula ke he hana tau hui, mo e tao apa kula ke he hana vahega tua.
7 Ko e fuata tao hana kua tuga ne akau fakalava he tagata lalaga ie, ko e mata tao he hana tao ne ono e teau sikeli lapatoa hana mamafa; ti mua atu kia ia taha ne toto e akau papa.
8 Ti tu a ia mo e ui age a ia ke he tau kau a Isaraela kua pehe age kia lautolu, Ko e ha ne o mai ai a mutolu mo e tatanaki mai a mutolu ke tau? Nakai kia ko e tagata Filisitia au, ka ko mutolu ko e tau fekafekau a Saulo a mutolu? kia fifili a e mutolu e tagata ma mutolu ti hifo mai a ia kia au;
9 Kaeke ke maeke kia ia ke tau mo au, mo e kelipopo au, ti eke ai a mautolu mo tau fekafekau kia mutolu; ka ko e mena ka eke ke kautu au kia ia mo e kelipopo a ia, ti eke a mutolu mo tau fekafekau kia mautolu, ti fekafekau mai a mutolu kia mautolu.
10 Ti pehe age e tagata Filisitia, Ko au nai, kua fakamā e au e tau kau a Isaraela ke he aho nai; ta mai ā kia au e tagata ke tau ai a maua mo ia.
11 Ne logona e Saulo mo Isaraela oti e tau kupu na he tagata Filisitia, ti fakaatukehe ai, mo e matakutaku lahi a lautolu.
12 Ko Tavita ko e tama a ia he tagata Efarata na, i Petelehema i Iuta, ne higoa ko Iese, ne tokovalu e tama tane hana; ti talahaua a ia ko e tagata motua ke he vaha ia Saulo.
13 Ko e tau tama tane fakamua a Iese ne tokotolu ne o a lautolu mo Saulo ke he tau; ko e tau higoa he hana tau tama tokotolu ne o ke he tau hanai, ko e tama uluaki ko Eliapo, ko e tama ne tatao hifo ai ko Apinatapu, haia ko e tama ne toluaki ko Sama haia.
14 Ko Tavita ko e tama fakamui a ia; ka ko e tokotolu ne momotua ne mumui atu a lautolu kia Saulo.
15 Ne fina atu a Tavita kia Saulo, ti liu mai ai a ia, ke leveki e tau mamoe he hana matua i Petelehema.
16 Ne fakatata mai e tagata Filisitia ke he pogipogi, mo e afiafi ti tu mai a ia ke he tau aho ne fagofulu.
17 Ti pehe age a Iese ke he hana tama ko Tavita, Kia uta a e koe e efa he tau fua saito tunu nai, mo e tau areto pukupuku nai ne hogofulu, ti poi atu a koe ke he lafu taokete hau ke he heaga api;
18 Ti uta e koe e tau maga nai ne hogofulu he puke huhu tuli ke he iki he ha lautolu a tokoafe, mo e ahi hau a tau matakainaga po ke monuina nakai a lautolu, mo e ta mai ai ha lautolu a fakamoli.
19 Ko Saulo mo lautolu, mo e tau tagata Isaraela oti ha ha he pahua ko Ela a lautolu, kua tau mo e tau tagata Filisitia.
20 Ti uhu ala a Tavita ke he aho a pogipogi, ti tuku atu e ia e tau mamoe ke he tagata ke leveki, ti uta e ia e tau mena, ti fano a ia tuga ne poaki mai e Iese kia ia; kua hoko a ia ke he mena ne toka ai e tau nofoa fakataveli, ko e o ha ne fai e kau ke he male tau, ti kalaga ai a lautolu ke tau.
21 Ha kua tatanaki ai ke tau a Isaraela mo e tau tagata Filisitia, ti fakafeao e na kua ua.
22 Ti tuku atu e Tavita e tau mena ha ha ia ia ke he tau lima he tagata kua leoleo ai e tau mena, ti poi atu a ia ke he kau, ti fano a ia mo e fakaalofa atu ke he hana tau matakainaga.
23 Kua vagahau a ia mo lautolu, kitiala, kua hake ai e toa, ko Koliato hana higoa ko e tagata Filisitia ko e tagata Kata, mai he kau a Filisitia, ti vagahau a ia tuga hana tau kupu ne vagahau ai a ia fakamua; ti logona ai e Tavita.
24 Ko e tau tagata Isaraela oti kua kitekite atu a lautolu ke he tagata, ti fehola ai a lautolu ki mua hana, mo e matakutaku lahi ai a lautolu.
25 Ti pehe age e taha tagata Isaraela, Kua kitia nakai e mutolu e tagata nai kua hake mai? ko e mena hake mai a ia ke fakafiu kia Isaraela; ko e tagata foki ke keli a ia to fakakoloa ai he patuiki a ia ke he tau koloa loga, to age foki hana tama fine kia ia ke eke mo hoana hana, to eke foki e ia ke toka noa ai e magafaoa he hana matua i Isaraela.
26 Ti huhu age a Tavita ke he tau tagata ne tutu fakalataha mo ia, kua pehe age, Ko e heigoa kia e mena ke eke ma e tagata ka keli e ia e tagata Filisitia nai, mo e uta kehe ai e ma ia Isaraela; ha ko hai kia e tagata Filisitia nakai peritome nai, ke fakama ai e ia e kau he Atua moui?
27 Ti tali age e tau tagata kia ia tuga ne tau kupu ne talahau ai fakamua, kua pehe age, to eke ni pihia ke he tagata ka keli e ia a ia.
28 Ti logona ai e Eliapo ko e hana taokete fakamua, he vagahau ai e ia mo e tau tagata, ti tupu ai e ita a Eliapo kia Tavita, ti pehe mai a ia Ko e heigoa e mena ne hifo mai ai a koe? Ti toka e koe kia hai e tau mamoe gahoa na ke he tutakale? kua iloa e au hau a mahani fakatokoluga, mo e kelea he hāu a loto, kua fia kitekite a koe ke he tau, ko e mena ia ne hifo mai ai a koe,
29 Ti pehe atu a Tavita, Ko e heigoa kia kua eke ai e au? Kua eke pule noa kia e au?
30 Ti haga kehe a ia ia ia, kua hagao atu ke he taha, ti vagahau atu a ia ke he tau kupu agaia; ti tali mai ai he tau tagata tuga ne tau kupu fakamua.
31 Kua logona e lautolu e tau kupu ne vagahau ai e Tavita, ti talahau atu ai e lautolu kia Saulo. Ti fakafano atu e ia mo e ta mai ai a ia.
32 Ti pehe atu a Tavita kia Saulo, Aua neke lolelole ai e loto he taha tagata ha ko ia, to fano ni hau a fakafekau ke tau mo e tagata Filisitia na.
33 Ti pehe mai a Saulo kia Tavita, Nakai ni maeke ke tau a mua mo e tagata Filisitia na, ha ko e tama tote a koe, ka ko ia ko e toa tali mai he vaha tote.
34 Ti pehe atu ai a Tavita kia Saulo, Ne leveki he fekafekau hau e tau mamoe he hana matua; ka fina atu foki e leona poke urosa, mo e uta e punua mamoe mai he fuifui mamoe;
35 Ti tutuli e au a ia, mo e keli e au a ia, mo e hamuti mai e au e mena he gutu hana; ne tu mai a ia kia au, ti toto ai e au hana hafe mo e keli e au a ia, ti mate ai.
36 Ne keli he fekafekau hau e leona katoa mo e urosa; to eke foki e tagata Filisitia nakai peritome na ke tuga ne taha ia laua, ha kua fakafiu ai e ia ke he kau he Atua moui.
37 Ti pehe atu foki a Tavita, Ko Iehova ne laveaki au mai he lima he leona mo e lima he urosa; ko ia ni ke laveaki au mai he lima he tagata Filisitia na. Ti pehe mai a Saulo kia Tavita, Ati fano a a koe, to fakalataha mo koe foki a Iehova.
38 Ti fakatapulu ai e Saulo a Tavita ke he hana tapulu, ti tuku ai e ia e potiki apa kula ke he hana ulu, ne fakatapulu foki e ia a ia ke he ufifatafata apa kula.
39 Ti pipi ai e Tavita hana pelu ki luga hana tapulu; ti fakafifitaki ai e ia to fano, ha kua nakai mahani ai a ia. Ti pehe atu a Tavita kia Saulo, Nakai maeke au ke fano mo e tau mena nai, ha kua nakaila mahani ai au. Ti tuku kehe ai e Tavita e tau mena na ia ia.
40 Ti uta e ia hana tokotoko ke he hana lima, mo e fifili ai e ia lima e maka molemole mai he vai he vailele, ti fafao ai e ia ke he kato he leveki mamoe ha ha ia ia, ko e kato ni haia, ti ha he lima hana hana filo ke liti aki e tau maka; ti fakatata atu a ia ke he tagata Filisitia.
41 Ti hau ai e tagata Filisitia, kua fakatata mai kia Tavita, ti mua atu kia ia e tagata ne toto ai hana akau pāpā.
42 Ti kitekite mai e tagata Filisitia, kua kitia e ia a Tavita, ti fakateaga ai a ia kia ia; ha ko e fuata tote a ia, ti kula hana tau lau ulu, ti mata mitaki ni a ia.
43 Ti pehe mai e tagata Filisitia kia Tavita, Ko e kuli kia au ne hau ai a koe kia au mo e tokotoko? Ti kaialu ai he tagata Filisitia kia Tavita ke he hana tau atua.
44 Ti pehe e tagata Filisitia kia Tavita, Hau ā kia au, to foaki atu ai e au hau a tino ke he tau manu lele he pulagi mo e tau manu huifa he vao.
45 Ti pehe atu ai a Tavita ke he tagata Filisitia, Kua hau a koe kia au mo e pelu, mo e tao mo e tao leoleo; ka ko au, kua fina atu au kia koe ke he higoa a Iehova Sapaota, ko e Atua he tau kau a Isaraela ne fakafiu a koe ki ai.
46 To tuku mai e Iehova a koe ke he haku lima ke he aho nai, ti keli e au a koe, mo e uta kehe ai e au hau a ulu ia koe; ti foaki atu foki e au e tau tino mamate he kau he tau tagata Filisitia ke he aho nai ke he tau manu lele he pulagi, mo e tau manu favale he vao; ke iloa ai he lalolagi oti, ha ha ia Isaraela e Atua.
47 Ke iloa ai foki he fakapotopotoaga oti nai, nakai fakamoui ai e Iehova ha tagata ke he pelu mo e tao; ha ko e mena ha ha ia Iehova e pule ke he tau, ti tuku mai e ia a mutolu ke he tau lima ha mautolu.
48 Kua matike e tagata Filisitia, kua fina age, mo e fakatata mai ke feleveia mo Tavita; ti alumaki a Tavita, ti poi atu a ia ke he kau, ke feleveia ai a laua mo e tagata Filisitia.
49 Ti aamo hifo ai e Tavita hana lima ke he kato, ti eke mai e ia e maka, ti liti aki e ia ke he filo, kua lauia ai e tagata Filisitia ke he hana mata le, ti komo ai e maka ke he hana mata le, ti veli fakafohifo ai a ia ke he kelekele.
50 Ne kautu ai a Tavita ke he tagata Filisitia ke he maka mo e filo ne liti aki e maka ne keli e ia a ia ti mate ai a ia, ka e nakai ha i ai ha pelu ke he lima a Tavita;
51 Ti poi atu a Tavita, kua tu a ia ki luga he tagata Filisitia, ti toto ai e ia hana pelu, kua aki mai ai e ia he hana tokaaga, ti keli ai e ia a ia mo e hio kehe ai hana ulu. Kua kitia he tau tagata Filisitia kua mate ha lautolu a toa ti fehola ai a lautolu.
52 Ti tutu ai e tau tagata Isaraela mo Iuta, kua kalaga a lautolu, ti tutuli a lautolu ke he tau tagata Filisitia oti ke hoko atu ke he pahua ke hoko foki ke he tau gutuhala a Ekerona. Ne veveli ai e tau tagata Filisitia, ne tuina ke he puhala a Saraima, kua hoko ki Kata, kua hoko foki ki Ekerona.
53 Ti liliu mai e fanau a Isaraela ne tutuli atu ke he tau tagata Filisitia, ti fofo ai e lautolu e tau mena ke he heagaapi ha lautolu.
54 Ti uta e Tavita e ulu he tagata Filisitia, ti ta mai ai e ia ki Ierusalema, ka e tuku ai e ia hana tau mena ke he hana fale ie.
55 Ne kitekite atu a Saulo kia Tavita he fano a ia ke feleveia ai mo e tagata Filisitia, ti pehe age a ia kia Apineru ko e takitaki kau, Apineru na e? ko e tama a hai e fuata nai? Ti pehe age a Apineru, Kua moui a koe, ko e patuiki na e, nakai iloa e au.
56 Ti pehe age ai e patuiki, Kia huhu la e koe, po ke tama a hai e taulekaleka na?
57 Kua liu mai a Tavita he keli e ia e tagata Filisitia, ti uta ai e Apineru a ia, ti ta mai e ia a ia ki mua a Saulo, ti ha ha he lima hana e ulu he tagata Filisitia.
58 Ti pehe mai a Saulo kia ia, Ko e tama a hai a koe, ma mea? Ti pehe atu a Tavita, Ko e tama au he hau a fekafekau ko Iese i Petelehema.