1 Samuela 18:1-30
18 KUA oti atu hana vagahau kia Saulo, ti pipiki taha ai e loto a Ionatana ke he loto a Tavita, ti fakaalofa atu a Ionatana kia ia, tuga ne fakaalofa a ia kia ia ni.
2 Ti uta e Saulo a ia ke he aho ia, ti nakai tuai toka e ia a ia ke liu ke he magafaoa he hana matua.
3 Ti eke ai e Ionatana e maveheaga mo Tavita, ha kua fakaalofa a ia kia ia tuga ne fakaalofa a ia kia ia ni.
4 Ti āki e Ionatana hana tapulu loa ne tapulu ai a ia, ti ta atu ai e ia kia Tavita, mo e hana tapulu tino, katoa mo e hana pelu, mo e hana kaufana, katoa mo e hana pipi.
5 Ti fano a Tavita ke he tau mena oti ne fakafano atu ai e Saulo a ia, kua mahani iloilo a ia; ti kotofa ai e Saulo a ia ke pule ke he kau, ti mitaki ia ke he motu oti, katoa mo e tau fekafekau a Saulo.
6 Kua o mai a lautolu ka kua liu mai a Tavita he keliaga he tagata Filisitia, ti o atu ai e tau fifine mai he tau maga oti i Isaraela kua lologo a lautolu, mo e koli, ke feleveia ai a lautolu mo e patuiki ko Saulo, mo e tau topā, mo e fiafia, mo e tau mena apa fakatagi.
7 Ti lologo fakafepa ai e tau fifine ke he tau lologo ha lautolu, kua pehe age, Kua keli e Saulo hana tau afe tagata, ka ko Tavita, hana tau hogofulu afe tagata.
8 Ti ita lahi ai a Saulo, kua kelea kia ia e tau kupu ia; ti pehe age a ia, Kua tuku atu e lautolu kia Tavita e tau hogofulu e afe, ka ko au, kua tuku mai e lautolu kia au e tau afe, kua toe e kautu hokoia ni ke uta māna.
9 Ti kamata mai he aho ia he lamalamati a Saulo kia Tavita.
10 Kua hoko ke he aho a pogipogi, ti hoko ai e agaga kelea mai he Atua kia Saulo, ti talahau mena ai e ia ke he hana fale; ka ko Tavita, ne ta ai e ia e kitara ke he hana lima, tuga ne eke ai e ia ke he taha aho mo e taha aho; ti ha i ai e tao ke he lima a Saulo.
11 Ti velo ai e Saulo e tao, kua pehe age, to keli e au a Tavita ke tuina ai a ia mo e kaupa he fale; ke e kalo lagaua ai e Tavita ki mua hana.
12 Ti matakutaku a Saulo kia Tavita ha kua ha ia ia a Iehova, ka kua haele kehe a ia ia Saulo.
13 Ti fakafano atu e Saulo a ia ke fano kehe ia ia, ti kotofa e ia a ia mo takitaki he tokoafe; ti fina atu a ia ti liu mai a ia ki mua he motu.
14 Kua mahani iloilo a Tavita ke he tau mena oti; ne fakalataha foki mo ia a Iehova.
15 Ne kitia e Saulo kua iloilo lahi a ia, ti matakutaku a ia kia ia.
16 Ka e fakaalofa a Isaraela oti katoa mo Iuta kia Tavita; ha kua fina atu a ia mo e hau ai a ia ki mua ha lautolu.
17 Ti pehe mai a Saulo kia Tavita, Kitiala, ko e tama fifini fakamua haku, ko Merapa, to ta atu e au a ia ke nonofo mo koe ka kia fakamalolo a koe ke he haku tau fekau, ke tau ai ke he tau tau a Iehova; nukua pehe a Saulo aua neke hoko haku lima kia ia, ka kia hoko kia ia e tau lima he tau tagata Filisitia.
18 Ti pehe atu a Tavita kia Saulo, Ko hai kia au? ko e heigoa foki haku a moui, mo e magafaoa he haku a matua ia Isaraela, kia eke ai au mo figona he patuiki?
19 Kua hoko ke he vaha ke ta atu ai a Merapa ko e tama fifine a Saulo kia Tavita, ka e ta age a ia kia Atarielu ko e tagata Mehola ke eke mo hoana hana.
20 Kua fakaalofa a Mekala ko e tama fifine a Saulo kia Tavita; kua talahau ai e lautolu e mena ia kia Saulo, ti mitaki e mena ia kia ia.
21 Ti pehe age a Saulo, To ta age e au a ia kia ia, ti eke a ia mo hele kia ia ke hoko ai e tau lima he tau tagata Filisitia kia ia. Ti pehe mai a Saulo kia Tavita, To eke e koe mo figona haku ke he aho nai, ko e lagaua ia.
22 Ti poaki e Saulo ke he hana tau fekafekau, kua pehe age. Kia vagahau fakatekiteki a mutolu kia Tavita, kua pehe age, Kitiala, kua fiafia e patuiki kia koe, kua fakaalofa foki hana tau fekafekau oti kia koe; hanai, kia eke a koe mo figona he patuiki.
23 Ti vagahau mai ai e tau fekafekau a Saulo e tau kupu na ke he tau teliga a Tavita; ti pehe atu a Tavita, Ko e mena fakateaga kia ke he manatu ha mutolu ke eke mo figona he patuiki, ko au foki ko e tagata nofogati mo e fakateaga.
24 Ti tala age e tau fekafekau a Saulo kia ia, kua pehe age, Ko e tau kupu pehena ne vagahau mai ai a Tavita.
25 Ti pehe age a Saulo, Kia tala age a mutolu kia Tavita, pehe, Nakai fia eke he patuiki ha mena ke fakafua aki a ia, ka ko e tau kili he kakano he tau tagata Filisitia ne taha e teau, ke taui atu ai ke he tau fi he patuiki, ka e manatu e Saulo ke mate ai a Tavita ke he tau lima he tau tagata Filisitia.
26 Kua tala age he tau fekafekau e tau kupu na kia Tavita; ti mitaki e tau kupu na kia Tavita ke eke a ia mo figona he patuiki. Kua nakaila katoa e tau aho;
27 Ti matike a Tavita, ti fano ai a ia katoa mo e hana tau tagata; ti keli e lautolu e tau tagata Filisitia ne ua e teau, ti ta mai e Tavita e tau kili he kakano ha lautolu, kua fakakatoa atu ai e ia ke he patuiki, ke eke ai a ia mo figona he patuiki. Ti ta mai ai e Saulo hana tama fifine ko Mekala kia ia ke eke mo hoana hana.
28 Kua fioia e Saulo, mo e iloa e ia, kua fakalataha a Iehova mo Tavita; ko Mekala foki ko e tama fifine a Saulo kua fakaalofa a ia kia ia.
29 Ti au atu ai he matakutaku a Saulo kia Tavita; ti eke ni a Tavita mo fi a Saulo ke he tau aho oti.
30 Ti o atu e tau iki he tau tagata Filisitia; ko e tau aho oti ne o atu ai a lautolu, ne mua e mahani iloilo a Tavita ke he tau fekafekau oti a Saulo. Ti talahau lahi ai hana higoa.