1 Samuela 2:1-36
2 TI liogi a Hana kua pehe a ia, Kua fiafia haku loto kia Iehova; kua fakatokoluga ai e Iehova, haku a hoe; kua fakamaga e au haku a gutu kia lautolu kua fai fi mai kia au, ha kua fiafia au ke he fakamouiaga mai ia koe.
2 Kua nakai tapu taha ke tatai mo Iehova; ha ko e mena nakai ha i ai taha ka ko koe ni; ti nakai fai maka tumau ke tuga na Atua ha tautolu.
3 Aua neke vagahau fakahakehake pihia foki a mutolu; aua neke to mai ai he tau gutu ha mutolu e tau kupu fakahogohogo; ha ko Iehova ko e Atua iloilo a ia, ko ia foki ne fafati ai e tau mahani,
4 Kua fatifati e tau kaufana he tau tagata toa; ka ko lautolu ne tutu tauveli, kua pipi ha lautolu a tau tokupu ke he malolo.
5 Ko lautolu ne mamakona kua eke a lautolu mo tau fekafekau ke moua ai e tau mena kai; ka ko lautolu ne fia kai kua okioki tuai a lautolu; ko ia ne tufua kua fanau ai e ia e tau tama tokofitu, ka ko ia ne tokologa hana fanau kua lolelole ni a ia.
6 Ne kelipopo e Iehova, ti fakamoui ai e ia; ne tahifo ai e ia kehe tukuaga, ti liu ta hake mai ai e ia.
7 Ko Iehova ke nofogati ai e tagata, ko ia foki ke maukoloa ai, ko ia kua fakatokolalo ai, ko ia foki ke ta hake ai ki luga;
8 Kua fakatu hake e ia e tau lalo tagata mai he kelekele, ti lagaaki e ia e tau tagata nonofogati mai he toloaga veve, kia fakanonofo ai a lautolu fakalataha mo e tau iki, kia eke foki mo tufaaga ha lautolu e nofoaiki lilifu; ha ko e tau fakave he lalolagi ha Iehova ia, ti tuku atu ai e ia e lalolagi ki luga.
9 To leveki e ia e tau hui he hana tau tagata tapu, ka to fakanonono ke he pouli e tau tagata mahani kelea; ha ko e mena nakai ko e malolo ke kautu ai he tagata.
10 To malipilipi ai a lautolu kua taufetoko mo Iehova; to fakapakū mai e ia ke he lagi ki luga ha lautolu; to pule a Iehova ke he tau kala he lalolagi; to foaki atu e ia e malolo ke he hana patuiki, to fakatokoluga foki e ia e hoe hana ne fakauku ai e ia.
11 Ti fano a Elekana ki Rama ke he hana fale, ka e nofo e tama ke fekafekau kia Iehova ki mua a Eli, ko e ekepoa.
12 Ka ko e tau tama tane a Eli, ko e tau tagata matahavala a laua, nakai iloa e laua a Iehova.
13 Ko e mahani hanai he tau ekepoa ke he motu; ka uta he taha tagata e poa, ka tunu e maga kakano, ti fina age ai e fekafekau he ekepoa mo e huki mata tolu ke he hana lima;
14 Ti huki ai ke he kumete, po ke pani, po ke ulo, po ke taha mena ne tunu mena ai, ko e tau mena oti ne ta hake ai he huki kua uta ni he ekepoa māna; ne eke ai pihia e laua kia Isaraela oti ne o hake ki Sailo.
15 Ne fina age e fekafekau he ekepoa, ka kua nakaila huhunu e gako, mo e pehe age a ia ke he tagata hana e poa, Ta mai la e maga kakano ke tunu ma e ekepoa; ha ko e mena nakai uta e ia ia koe e maga kakano moho ka ko e maga kakano mata ni.
16 Ka pehe age e tagata kia ia, Kia huhunu fakamua e lautolu e gako, ti uta e koe māu e mena kua loto a koe ki ai, ti pehe age a ia kia ia, Nakai ka e tamai ai e koe mogoho nai, ka nakai, ti fofo ni e au.
17 Ti lahi ue atu e hala he tau fuata na ki mua a Iehova, ha kua vihiatia ai he tau tagata e poa kia Iehova.
18 Ka ko Samuela, ne fekafekau ai aia ki mua a Iehova; ti tapulu ai e tama ke he efota ie lino.
19 Ti taute he matua fifine hana e tapulu tote māna, ti uta ai kia ia ke he taha tau mo e taha tau, ka o hake a laua mo e tane hana ke uta ai e poa ne eke ai ke he tau tau.
20 Ti fakamonuina e Eli a Elekana mo e hana hoana, mo e pehe atu, Kia foaki mai e Iehova kia koe e fanau ke he fifine nai, ke hukui aki a ia ne tuku atu ai kia Iehova. Ti o atu a laua ke he kaina ha laua.
21 Ti ahi ai e Iehova a Hana, ti fatu a ia, Ti fanau ai e ia; ne tokotolu e tama tane hana, ti tokoua e tama fifine. Ti tupu e tama ko Samuela ki mua a Iehova.
22 Ne motua lahi a Eli, ti logona e ia e tau mena oti ne eke he tau tama tane hana kia Isaraela oti, mo e momohe a lautolu mo e tau fifine ne fekafekau ai ke he gutuhala he fale uta fano he tutuutaga.
23 Ti pehe age a ia kia laua ko e ha ne eke e mua e tau mena nai? ha kua logona e au mai he motu oti nai e tau kupu ke he mahani kelea ha mua;
24 Tokai, haku a tau tama na e, he nakai mitaki e tala kua logona ai e au kia mua, kua fakahehe e mua e motu a Iehova;
25 Kaeke ke hala e tagata ke he taha tagata to fakafili he Atua a ia; ka ko e mena ka hala e tagata kia Iehova ko hai kia ke olealo atu māna? Ka e nakai fanogonogo a laua ke he tau kupu he matua ha laua ha kua finagalo a Iehova ke keli a laua.
26 Ne tupu ai e tama ko Samuela, ti ofania a ia e Iehova katoa mo e tau tagata.
27 Ti fina atu ai taha tagata he Atua kia Eli, ti pehe atu a ia kia ia, Kua vagahau mai pehe a Iehova, Ne fakakite fakatonu atu e au kia ke he magafaoa he hāu a matua, he nonofo a lautolu i Aikupito ke he magafaoa a Farao?
28 Ti fifili kia e au a ia mai he tau magafaoa oti a Isaraela ke eke mo ekepoa kia au, ke hake a ia ke he haku a fatapoa, ke huhunu ai e mena manogi, ke tapulu ai a ia ke he efota ki mua haku? Ti foaki kia e au ke he magafaoa he hau a matua e tau poa oti he fanau a Isaraela kua eke ke he afi?
29 Ko e ha ne holi ai e mutolu haku a tau poa, mo e haku a tau poa mena kai, ne poaki atu e au ke eke ke he haku a fale; ti mua foki hau a fakalilifu ke he hau a tau tama tane ke he hau a fakalilifu mai kia au, ke lalahi ai a mutolu ke he tau tufaaga ne homo he tau poa oti he haku a motu ko Isaraela.
30 Ko e mena ia kua vagahau mai ai e Iehova ko e Atua a Isaraela, Ne pehe atu au ke he magafaoa hāu mo e magafaoa he hau a matua, ke o fano tukulagi a lautolu ki mua haku; ka ko ainei, kua pehe mai a Iehova, Kia mamao ia au e mena ia, ka ko lautolu kua fakalilifu mai kia au, to fakalilifu atu e au kia lautolu; ka ko lautolu kua fakavihia mai kia au, to talahaua a lautolu kua fakateaga.
31 Kitiala, ko e hoko mai ne fai e tau aho, ke fafati e au e lima hau mo e tau lima he magafaoa he hau a matua, kia nakai toe ai ha tagata motua ke he hau a magafaoa.
32 Ti kitia atu e koe e matematekelea he haku a fale ke he tau mena oti ke fakamonuina ai a Isaraela; to nakai ni fai tagata motua ke he hau a magafaoa ke he tau aho oti.
33 Ko e tagata he magafaoa hau ke nakai hehele kehe e au mo e haku a fatapoa, to fakapouli ai e ia hau a tau mata, mo e fakamamahi hau a loto; ka to mamate ai e tau tagata oti he hau a magafaoa ko e tau fuata agaia ni a lautolu.
34 Ko e fakamailoga kia koe hanai he hoko ai ke he na tama tane tokoua hāu ko Hofeni mo Fineaso, to mamate ni a laua ke he aho taha.
35 To fakatu ai e au e ekepoa fakamoli, to eke ai e ia ke lata mo e haku a loto mo e haku tau manatu, to ati hake foki e au e fale tumau māna; to faifano a ia ke he tau aho oti ki mua hana ne fakauku ai e au.
36 Ko lautolu oti ke toe he magafaoa hau, to takitaha a lautolu mo e o age mo e fakaveli fakafohifo kia ia ke moua ai e tupe ario mo e areto pukupuku, to pehe age foki, Kia kotofa la e koe au ke he taha gahua he ekepoa, ke kai ai e au taha mena kai.