1 Samuela 21:1-15
21 TI fano a Tavita ki Nove kia Ahimeleke ko e ekepoa; ti fina age a Ahimeleke mo e vivivivi ke feleveia mo Tavita; ti pehe age a ia kia ia, Ko e heigoa kia e mena ne haele mai ai a koe tokotaha, ka e nakai fai tagata ke tokoua aki a koe?
2 Ti pehe age a Tavita kia Ahimeleke ko e ekepoa, Ne poaki mai e patuiki e fekau ke eke e au, kua pehe mai, Aua neke iloa e taha e fekau ne fakafano atu ai e au a koe, mo e poaki atu ai e au kia koe; kua fakatonu atu foki e au ke he tau fekafekau e mena ke o a lautolu ki ai.
3 Hanai, ko e heigoa ne toka ai ia koe? Kia ta mai ā e koe falu a areto ne lima, po ke taha mena ke moua ai e koe.
4 Ti tali age e ekepoa kia Tavita, kua pehe age, Nakai toka ai e areto nakai tapu ia au, ka ko e tau areto tapu ni, kaeke ni kua nonofo kehe e tau fuata mo e tau hoana ha lautolu ti maeke ke ta atu.
5 Ti tali age a Tavita ke he ekepoa, kua pehe age kia ia, Ko e moli, ko e po tolu ia he nonofo kehe a mautolu mo e ha mautolu a tau hoana; ne mea e tau mena he tau fuata he hau ai au, pete he nakai ko e fenoga tapu ne o ai; ti au atu ai e tapu ha lautolu a tau mena ke he aho nai.
6 Ti ta age ai he ekepoa kia ia e areto tapu; ha ko e mena nakai ha i ai e areto, ka ko e areto fakatokatoka ki mua, ne uta kehe mai mua a Iehova ke tuku ai e tau areto vevela ke he aho ne uta kehe ai.
7 Ne ha i ai ke he aho ia taha fekafekau a Saulo, ne taofi ai a ia ki mua a Iehova; ko e hana higoa ko Toeke ko e tagata Etoma, ne pule a ia ke he tau leveki mamoe a Saulo.
8 Ti pehe age a Tavita kia Ahimeleke, Nakai kia ha ia koe ki hinei e tao po ke pelu? ha kua nakai ta mai foki e au haku a pelu mo e haku a tau kanavaakau, he fakatepetepe e fekau he patuiki.
9 Ti pehe age ai e ekepoa, Ko e pelu a Koriato ko e tagata Filisitia ne keli e koe ke he pahua ko Ela, kitiala, kua afi ai ke he tapulu ki tua he efota; kaeke ke uta e koe ia ti uta ā, ha kua nakai ha i ai taha pelu ka ko e mena ia ni. Ti pehe age a Tavita nakai ni fai pelu ke tatai mo e mena na; ta mai ā kia au.
10 Ti matike a Tavita, ti hola ai a ia ke he aho ia ia Saulo, ti fano ai a ia kia Akisa ko e patuiki a Kata.
11 Ti pehe age e tau fekafekau a Akisa kia ia, Nakai kia ko Tavita aenai, ko e patuiki he motu? Nakai kia ko e tagata aenai ne lologo fakafepa ai a lautolu ke he tau lologo ha lautolu, kua pehe age, Kua keli e Saulo hana tau afe tagata, ka ko Tavita hana tau hogofulu afe tagata?
12 Kua tuku e Tavita e tau kupu na ke he hana loto, ti matakutaku lahi ai a ia ki mua a Akisa ko e patuiki a Kata.
13 Ti liliu kehe e ia hana mahani ki mua ha lautolu, kua heketia fakavai a ia ke he tau lima ha lautolu; ti tukituki e ia ke he tau puipui he gutuhala mo e fakalua ai e ia hana ifo ke he hafe hana.
14 Ti pehe age a Akisa ke he hana tau fekafekau, kitiala, kua kitia e mutolu e tagata kua heketia a ia, kua ta mai e mutolu a ia kia au he ha?
15 Kua hogeia tagata heketia kia au, ne ta mai ai e mutolu e tagata na ke mahani heketia a ia ki mua haku? ke hau kia e tagata ke he fale haku?