1 Samuela 23:1-29
23 NE talahau mai e lautolu kia Tavita, kua pehe mai, Kitiala, kua tau e tau tagata Filisitia mo Kaila, ti fofo e lautolu e tau saito ne toka ai ke he tau mena ne haha ai e saito.
2 Ti huhu ai a Tavita kia Iehova, kua pehe atu, To fano nakai au mo e keli e tau tagata Filisitia na? Ti pehe mai a Iehova kia Tavita, Fano ā, ti keli e koe e tau tagata Filisitia, mo e laveaki ai e koe a Kaila.
3 Ti pehe age e tau tagata a Tavita kia ia, Kitiala, kua matakutaku a tautolu i hinei i Iuta; ka e au atu ai he pihia kaeke ke o a tautolu ki Kaila ke he kau he tau tagata Filisitia.
4 Ti huhu foki a Tavita kia Iehova; ti tali mai ai a Iehova kia ia, kua pehe mai, Matike ā ti hifo a koe ki Kaila; ha ko e mena to tuku atu e au e tau tagata Filisitia ke he hau a lima.
5 Ti o atu ai a Tavita mo e hana tau tagata ki Kaila; ti tau a lautolu mo e tau tagata Filisitia, ti fofo ai e lautolu ha lautolu a tau mena, mo e keli e lautolu a lautolu ke he keliaga lahi, ti laveaki ai e Tavita a lautolu ne nonofo i Kaila.
6 Ne hola mai e tama a Ahimeleke ko Aviata kia Tavita ki Kaila, ne hifo ai a ia mo e efota ke he hana lima.
7 Kua tala atu kia Saulo, kua fano a Tavita ki Kaila; ti pehe age ai a Saulo, Kua tiaki he Atua a ia, ke tuku mai a ia ke he haku lima, kua puipui tuai a ia ha kua hu atu a ia ke he maga kua ha i ai e tau pahala, mo e tau fakamau fakalava.
8 Ti ogoogo atu ai e Saulo ke he motu oti ke o mai ke tau, ke o hifo a lautolu ki Kaila, ke pa takai ai e lautolu a Tavita mo e hana tau tagata.
9 Kua iloa e Tavita kua eke lagatau kelea a Saulo kia ia, ti pehe age a ia ke he ekepoa ko Aviata, Kia ta mai la e efota.
10 Ti pehe atu a Tavita, Iehova na e, ko e Atua a Isaraela, kua logona ni he fekafekau hau kua tauteute a Saulo ke hau ki Kaila ke moumou ai e maga ha ko au.
11 To tuku atu nakai he tau tagata Kaila au ke he lima hana? to hifo mai nakai a Saulo tuga ne logona ai he fekafekau hau? Iehova na e ko e Atua a Isaraela, kia talahau mai a koe ke he hau a fekafekau. Ti pehe mai a Iehova, To hifo mai ni a ia.
12 Ti pehe atu a Tavita, To tuku atu nakai he tau tagata Kaila au mo e haku a tau tagata ke he lima a Saulo? Ti pehe mai a Iehova, To tuku atu ai ni e lautolu a mutolu.
13 Ti matike a Tavita mo e hana tau tagata, ko e katoatoa ha lautolu tokai ko e ono e teau tagata, ti o kehe ai a lautolu i Kaila, kua o fakahanoa ni a lautolu. Kua talahau atu kia Saulo kua hola a Tavita i Kaila; ti tiaki ai e ia, nakai tuai fano a ia ki ai.
14 Kua nofo a Tavita ke he vao ke he taue, kua nofo a ia ke he mouga ke he vao ko Sifi; ti kumi e Saulo a ia ke he tau aho oti ka e nakai tuku atu he Atua a ia ke he hana lima.
15 Kua kitia e Tavita kua fina atu a Saulo ke kumi a ia ke tamate ai, ti ha i ai a Tavita ke he vao ko Sifi ke he vao motua.
16 Ti matike a Ionatana ko e tama a Saulo, ti fina age ai a ia kia Tavita ke he vao motua, kua fakamalolo ai e ia a ia ke he Atua;
17 Ti pehe age a ia kia ia, Aua neke matakutaku a koe, ha ko e mena nakai moua a koe he lima a Saulo haku matua; ka to eke a koe mo patuiki a Isaraela, ko au foki to eke au mo tagata ke hoa aki a koe; ti iloa ni pihia he matua haku ko Saulo.
18 Ti eke ai e laua e maveheaga ki mua a Iehova; ti nofo ai a Tavita ke he vao motua, ka e fano a Ionatana ke he hana fale.
19 Ti o hake e tau tagata Sifi kia Saulo i Kipeā, kua pehe age, Nakai kia fakamumuli ai a Tavita ia mautolu ke he tau taue ke he vao motua ke he mouga ko Hakila ha ha he fahi toga a Iesimoni?
20 Ko e hanai, ko e patuiki na e, kia haele hifo a koe ke he tau mena oti kua manako e finagalo hau ke haele hifo ki ai; ko e ha mautolu ke tuku atu a ia ke he lima he patuiki.
21 Ti pehe age ai a Saulo, Kia fakamonuina a mutolu e Iehova, ha kua fakaalofa mai a mutolu kia au.
22 Kia o a mutolu mo e liu tauteute fakamitaki, mo e iloa, mo e kitekite ke he mena ne mahani ai a ia; po ko hai foki kua kitia a ia; ha kua tala mai kia au kua mua he iloilo hana tau lagatau.
23 Ti kitekite a mutolu mo e iloa hana tau huaga oti ne hu ai a ia; ti liliu mai a mutolu kia au mo e tonu, ti o ai a tautolu mo mutolu; kaeke ke ha i ai a ia ke he motu to kumi e au a ia ke he tau afe oti a Iuta.
24 Ti mamatike ai a lautolu, ti o a lautolu ki Sifi, kua mumua atu a lautolu kia Saulo; ka ko Tavita mo e hana tau tagata ha ha he vao ko Maona a lautolu, ke he kelekele tatai ke he fahi toga a Iesimoni.
25 Ti o atu a Saulo mo e hana tau tagata ke kumi a ia; kua talahau atu kia Tavita, ti hifo ai a ia ke he kaumaka, ti nofo ai a ia ke he vao ko Maona. Kua logona e Saulo ti tutuli ai e ia a Tavita ke he vao ko Maona.
26 Ti fano a Saulo ke he taha fahi he mouga ka ko Tavita mo e hana tau tagata ha ha he taha fahi mouga a lautolu. Ti alumaki a Tavita ke fano kehe ia Saulo, ka ko Saulo mo e hana tau tagata kua agaagai e lautolu a Tavita mo e hana tau tagata ke tapatapaki a lautolu.
27 Ti fina age ai e fekau kia Saulo, kua pehe age, Kia haele mai fakaave a koe, ha kua feoho mai e tau tagata Filisitia ke he motu.
28 Ti liu ai a Saulo he tutuli e ia a Tavita, ti fano a ia ke tau mo e tau tagata Filisitia; ko e mena ia ne ui ai e mena ia ko e Maka he veveheaga.
29 Ti hake ai a Tavita he mena ia, ti nofo ai a ia ke he tau taue i Enekati.